ବରଗଡ଼ ଅଫିସ୍,୧୧।୯: ନୂଆଁଖାଇରେ ପଶ୍ଚିମ ଓଡ଼ିଶା ଉତ୍ସବ ମୁଖର ହୋଇପଡ଼ି ଥିବାବେଳେ ବରଗଡ଼ ସହର ପୁରୁଣା ବସ୍ଷ୍ଟାଣ୍ଡ ପଛପଟେ ଥିବା ଝୁମ୍ପୁଡ଼ିପଡ଼ାରେ ଏକ ଅଭାବନୀୟ ଘଟଣା ଦେଖିବାକୁ ମିଳିଥିଲା । ସତ୍କାର ପାଇଁ କେହି ଆତ୍ମୀୟ ସ୍ବଜନ ନ ପହଞ୍ଚିବାରୁ ଏଠାରେ ମୃତା ମଳି ମିର୍ଦ୍ଧା(୬୦)ଙ୍କ ମୃତଦେହ ଦୀର୍ଘ ୧୫ଘଣ୍ଟା ଧରି ପଡ଼ି ରହିଥିଲା। ଖବର ପାଇ ବରଗଡ଼ର ସାମାଜିକ ଅନୁଷ୍ଠାନ ସଂକଳ୍ପ ପରିବାରର ସ୍ବେଚ୍ଛାସେବୀମାନେ ନୂଆଁଖାଇ ପାଳନ ଛାଡ଼ି ମୃତାଙ୍କ ଘରେ ପହଞ୍ଚିଥିଲେ। ପରେ ମୃତଦେହ ସ୍ଥାନୀୟ ଜୀରାନଦୀ କୂଳକୁ ନେଇ ସତ୍କାର କରିଥିଲେ ।
ପ୍ରକାଶ ଯେ, ମୃତା ବୃଦ୍ଧା ଦୀର୍ଘଦିନ ଧରି ଶଯ୍ୟାଶାୟୀ ଥିଲେ। ଶୁକ୍ରବାର ସନ୍ଧ୍ୟା ୬ଟାରେ ତାଙ୍କର ମୃତ୍ୟୁ ହୋଇଥିଲା । ମୃତ୍ୟୁଶଯ୍ୟାରେ ତାଙ୍କ ସ୍ବାମୀ ମୁକୁନ୍ଦ ଏବଂ ଝିଅ ସଞ୍ଜୁ ଉପସ୍ଥିତ ଥିଲେ । ମଳିଙ୍କ ମୃତ୍ୟୁ ପରେ ଅନ୍ୟତ୍ର ରହୁଥିବା ତାଙ୍କ ପୁଅଙ୍କୁ ସୂଚନା ଦିଆଯାଇଥିଲା । ମାତ୍ର ମାଆଙ୍କ ମୃତ୍ୟୁଖବର ପାଇବା ସତ୍ତ୍ବେ ନୂଆଁଖାଇ ଆଳ ଦେଖାଇ ସେ ଆସି ପାରିବେ ନାହିଁ ବୋଲି କହିଥିବା ମୃତା ମଳିଙ୍କ ଝିଅ ସଞ୍ଜୁ କହିଛନ୍ତି । ଏହାପରେ ସ୍ଥାନୀୟ ଲୋକେ ସଂକଳ୍ପ ପରିବାରକୁ ସୂଚନା ଦେଇଥିଲେ । ଖବର ପାଇ ଶନିବାର ପୂର୍ବାହ୍ନ ପ୍ରାୟ ୯ଟାରେ ଅନୁଷ୍ଠାନର ବିକାଶ ଅଗ୍ରୱାଲ, ଜି. ରମେଶ, ନିଧାନ ଦନ୍ତା, ସନ୍ତୋଷ ଦନ୍ତା, ସନ୍ତୋଷ ସାହୁ ପ୍ରମୁଖ ମୃତାବୃଦ୍ଧାଙ୍କ ଘରକୁ ପହଞ୍ଚିଥିଲେ ଏବଂ ମୃତଦେହ ନେଇ ଜୀରାନଦୀ କୂଳ ସ୍ବର୍ଗଦ୍ୱାରରେ ଦାହ କରିଥିଲେ।
