ଥୁଆମୂଳ ରାମପୁର,୩୧।୩(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ଥାନା ଅଞ୍ଚଳରେ ବେପରୁଆ ଭାବରେ ଗାଡିମଟର ଚଳାଚଳ ଯୋଗୁ ସଡ଼କ ଦୁର୍ଘଟଣା ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଏହି କ୍ରମରେ ରହିବାର ବାଇକ ଦୁର୍ଘଟଣାରେ ଜଣଙ୍କ ମୃତୁ ହୋଇଥିବାବେଳେ ସୋମବାର ଆଉ ଜଣଙ୍କ ଜୀବନ ଯାଇଛି।
ମିଳିଥିବା ସୂଚନା ମୁତାବକ କଳାହାଣ୍ଡି ଜିଲା ଥୁଆମୁଳ ରାମପୁର ଥାନା ଅନ୍ତର୍ଗତ ଜବାଙ୍ଗ ଗ୍ରାମର ଚେରୁଙ୍ଗୁ ଗଉଡ଼ (୫୫) ଏବଂ ତାଙ୍କ ବଡ଼ ପୁଅ ରାମେଶ୍ବର ଗଉଡ଼ (୩୫) ଦୁହେଁ ମିଶି ନିଜ ଘରୁ ବାହାରି ବାଇକର ଇଏମଆଇ ପଇସା ପୈଠ କରିବାକୁ ଜୁନାଗଡ଼ ଯାଉଥିବାବେଳେ ଜବାଙ୍ଗ ଗ୍ରାମର ବିଦ୍ୟାଳୟ ନିକଟରେ ମଟରସାଇକେଲ ଭାରସାମ୍ୟ ହରାଇାରୁ କଜବାଇ ପାଖରେ ଛିଟିକି ପଡ଼ିଥିଲେ। ଫଳରେ ଘଟଣାସ୍ଥଳରେ ପୁଅ ରାମେଶ୍ବରଙ୍କ ମୃତ୍ୟୁ ଘଟିଥିବାବେଳେ ବାପା ଚେରୁଙ୍ଗୁ ଅଳ୍ପକେ ବର୍ତ୍ତି ଯାଇଛନ୍ତି l
ଖବର ପାଇ ଥୁଆମୂଳ ରାମପୁର ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ଥୁଆମୁଳ ରାମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ପଠାଇ କେସ ନଂ ୪୧/୨୫ନ୍ଦରେ ଏକ ମାମଲା ରୁଜୁ ଅଧିକ ତଦନ୍ତ ଆରମ୍ଭ କରିଥିବା ପୋଲିସ ପକ୍ଷରୁ ସୂଚନା ମିଳିଛି l ଅନ୍ୟପଟେ ଗରିବ ରାମେଶ୍ବରଙ୍କ ୧ ବର୍ଷର କୁନି ଝିଅ ଥିବାବେଳେ ତାଙ୍କ ସ୍ତ୍ରୀ ଗର୍ଭବତୀ ରହିଛି। ତେବେ ବର୍ତ୍ତମାନ କୁନି ଝିଅ ସହ ସ୍ତ୍ରୀ ପେଟରେ ବଢ଼ୁଥିବା ଶିଶୁର ଭବିଷ୍ୟତ ଅନ୍ଧାରରେ ବୋଲି ଗ୍ରାମବାସୀ ପ୍ରକାଶ କରିବା ସହ ସରକାରଙ୍କ ତରଫରୁ ଏ ପରିବାରଙ୍କୁ ସହାୟତା ଯୋଗାଇ ଦେବାପାଇଁ ଗ୍ରାମବାସୀ ଦାବି ଜଣାଇଛନ୍ତି।
