ରାଉରକେଲା ଅଫିସ, ୮ା୬: ରାଉରକେଲା ବେଦବ୍ୟାସର ଗୋପାପାଳୀ ଝରାପଡ଼ାର ଜଣେ ୧୭ବର୍ଷର ବାଳକ ଦୁର୍ବଳ ଅବସ୍ଥାରେ ନିଜ ମା’ ବାପାଙ୍କ ପ୍ରତିପୋଷଣ ପାଇଁ ଭିକ୍ଷାବୃତ୍ତି କରୁଛନ୍ତି। କ୍ରିିଷ୍ଣା ଝରା ଜନ୍ମରୁ ଅଜଣା ରୋଗରେ ଆକ୍ରାନ୍ତ ହୋଇ ମରି ମରି ବଂଚୁଛନ୍ତି। ଆର୍ଥିକ ଅଭାବରୁ କ୍ରିଷ୍ଣାଙ୍କ ଚିକିତ୍ସା ହୋଇ ପାରୁନାହିଁ। ଶୀରର ଚର୍ମ ଝଡ଼ୁଥିବା ବେଳେ ହାଡ଼ ପୋପରା ହେବାକୁ ବସିଲାଣି। କ୍ରିଷ୍ଣାଙ୍କ ପରିବାର କହିଲେ ମା’ ଗୁରୁବାରୀ(୩୭) ବାପା ମୁକୁନ(୫୧)। ଖାଦ୍ୟ ଅଭାବରୁ ଦୀର୍ଘବର୍ଷରୁ ମୁକୁନୁ ଶଯ୍ୟାଶାୟୀ ହୋଇ ପଡ଼ିଛନ୍ତି। ଗୁରୁବାରୀ ମୁକୁନଙ୍କ ଦେଖାଶୁଣା କରୁଛନ୍ତି। କ୍ରିଷ୍ଣା ଦୈନିକ ଭିକ୍ଷାବୃତ୍ତି କରି ଯାହା ଦି ପଇସା ଆଣୁଛନ୍ତି ସେଥିରେ ପରିବାରର ଦୁଇଓଳି ପେଟପୁରା ଖଇବା ବ୍ୟବସ୍ଥା ହୋଇପାରୁନାହିଁ। ଏପଟେ ମୁଣ୍ଡ ଗୁଞ୍ଜିବା ପାଇଁ ନିଜର ବୋଲି ଘର ଖଣ୍ଡିଏ ନାହିଁ। ଜଣେ ବ୍ୟକ୍ତିଙ୍କ ଭଙ୍ଗା ଦଦରା ତାଳଛପର ମାଟି ଘରେ ଦୀର୍ଘ ୨୫ ବର୍ଷ ହେଲା ଜୀବନ ବିତାଇ ଆସୁଛନ୍ତି। ସରକାରୀ ଯୋଜନା କହିଲେ କେବଳ ମାସିକ ୧୫କେଜି ରାସନ ଚାଉଳ। ଏହାବ୍ୟତିତ ପରିବାରକୁ ଅନ୍ୟ କୌଣସି ପ୍ରକାରର ସରକାରୀ ସହାୟତା ଏପର୍ଯ୍ୟନ୍ତ ମିଳିପାରି ନାହିଁ। ପରିବାରଟି ଦରିଦ୍ର ସୀମାରେଖ ତଳେ ଥିଲେ ସୁଦ୍ଧା ଏଏଓ୍ବାଇ ସ୍କିମରେ ସାମିଲ କରାଗଲା ନାହଁ। ପୂର୍ବରୁ ଯେଉଁ ଦାରିଦ୍ର ହିତାଧିକାରୀ ଏହି ଯୋଜନାରେ ସାମିଲ ହୋଇଥିଲେ ସେମାନଙ୍କୁ ହିଁ ଏହାର ଲାଭ ମିଳିବ। ବର୍ତ୍ତମାନ ନୂଆଁ ହିତାଧିକାରୀଙ୍କୁ ଏହି ଯୋଜନାରେ ସାମିଲ କରାଯିବା ବନ୍ଦ ହୋଇଯାଇଛି। ଏମିତିକି ଏପର୍ଯ୍ୟନ୍ତ ରୋଗାଗ୍ରସ୍ତ କ୍ରିଷ୍ଣାର ଆଧାରକାର୍ଡ ମଧ୍ୟ ହୋଇପାରିନାହିଁ। ତୁରନ୍ତ ଗରିବ ଅସହାୟ ପରିବାର ପାଇଁ ସରକାର ଓ ପ୍ରଶାସନଙ୍କ ତରଫରୁ ଆବଶ୍ୟକୀୟ ସାହାର୍ଯ୍ୟ ସହଯୋଗ ଯୋଗାଇ ଦିଆଯାଉ ବୋଲି ବୁଦ୍ଧିଜୀବୀ ମହଲରେ ଦାବି ହେଉଛି। ଏନେଇ ଆର୍ଏମ୍ସି ବିଏସ୍ଏସ୍ଓ ଚେତାବନୀ ବଡେଇଙ୍କୁ ପଚାରିବାରୁ, ଏ ବିଷୟ ନିଶ୍ଚିତ ଭାବେ ସମ୍ବେଦନଶୀଳ। ଗୁରୁବାର ଉକ୍ତ ପରିବାର ପାଖକୁ ଯାଇ ତାଙ୍କ ପାଖରୁ ପ୍ରାମାଣିକ ପତ୍ର ସଂଗ୍ରହ କରିବୁ। ଏହାପରେ ଆରଜିଏଚ୍ରେ ଅଜଣାରୋଗର ପୀଡ଼ିତ ପିଲାର ରୋଗ ସମ୍ପର୍କିତ ନିଦାନ ଖୋଜବୁ। ପରିବାରର ଯୋଗ୍ୟତା ମୁତାବକ ସରକାରୀ ଯୋଜନା ପ୍ରଦାନ ପାଇଁ ସମସ୍ତ ପ୍ରକାରର ସହଯୋଗ କରାଯିବା ବୋଲି କହିଥିଲେ। ଏସିଏସ୍ଓ ଶ୍ରୀନିବାସ ସାହୁଙ୍କୁ ପଚାରିବାରୁ , ବର୍ତ୍ତମାନ ଆଉ ଏଏଓ୍ବାଇ ଯୋଜନାରେ ସାମିଲ କରିବା ଅସମ୍ଭବ। ପିଲାର ଆଧାରକାର୍ଡ ହେଲେ ତାଙ୍କ ନାଁରେ ରାସନ ଆଡ୍ କରାଯିବ ବୋଲି ଦର୍ଶାଇଥିଲୋ।
