ଚାନ୍ଦବାଲି, ୭।୩(କିଷାନ ପାତ୍ର): ଭଦ୍ରକ ଜିଲା ଚାନ୍ଦବାଲି ଧାମରା ମୁହାଣ ଚନ୍ଦିନୀପାଳରେ ମତ୍ସ୍ୟଜୀବୀଙ୍କ ଜାଲରେ ପଡ଼ିଛି ବିରଳ ପ୍ରଜାତିର ମାଛ ସୋଲପାଟିଆ। ବଜାରରେ ଏହି ମାଛର ଦାମ୍ ଅଧିକ ରହିଥିବା ବେଳେ ୭ଟି ମାଛକୁ କେଜି ପ୍ରତି ୮ହଜାର ୭୦୦ ଟଙ୍କା ଦରରେ ୧ଲକ୍ଷ ୮ହଜାର ୪୦୦ ଟଙ୍କାରେ ବିକ୍ରି କରାଯାଇଛି। ମଙ୍ଗଳବାର ଧାମରା ଗଭୀର ସମୁଦ୍ରରୁ ଏହି ବିରଳ ପ୍ରଜାତିର ମାଛକୁ ମତ୍ସ୍ୟଜୀବୀମାନେ ଜାଲରେ ଧରିଥିଲେ। ମାଛ କୂଳକୁ ଆଣିବା ପରେ ନିଲାମ ଧରିବା ପାଇଁ ନିଲାମଧାରୀଙ୍କ ଭିଡ଼ ଜମିଥିଲା। କୋଲକାତାର ଜଣେ ବ୍ୟବସାୟୀ ନିଲାମ ଧରିଥିଲେ। ଏହି ମାଛ କିଣି ସେ ଚେନ୍ନାଇର ଏକ ମେଡିସିନ କମ୍ପାନୀକୁ ବିକ୍ରି କରିଥିବା ଜଣାଯାଇଛି। ବିଭିନ୍ନ ପ୍ରକାର ଔଷଧ ପାଇଁ ଏହି ମାଛର ତେଲ ଓ ଚର୍ବି ବ୍ୟବହାର ହେଉଥିବାରୁ ଏହାର ଦର ଅଧିକ ରହିଛି ବୋଲି ମତ୍ସ୍ୟଜୀବୀମାନେ କହିଛନ୍ତି।
