ରାଙ୍ଗିଓରା(ନ୍ୟୁଜିଲାଣ୍ଡ),୧।୩: ଷ୍ଟାର ଭାରତୀୟ ଓପନର ସ୍ମ୍ରିତି ମନ୍ଧାନା ସୋମବାର ଦକ୍ଷିଣ ଆଫ୍ରିକା ବିପକ୍ଷ ମହିଳା ଟି୨୦ ବିଶ୍ୱକପ୍ ଓ୍ବାର୍ମଅପ୍ ମ୍ୟାଚ୍ରେ କନକଶନର ସମ୍ମୁଖୀନ ହୋଇଛନ୍ତି। ତେବେ ତାଙ୍କ ସ୍ବାସ୍ଥ୍ୟାବସ୍ଥା ସ୍ଥିର ରହିଛି। ତାଙ୍କ ବାମ କାନ ପାଖରେ ଟିସୁ ଜନିତ ସମସ୍ୟା କାରଣରୁ ତାଙ୍କୁ ଏବେ ଅବଜରଭେଶନରେ ରଖାଯାଇଛି।
ରବିବାର ଖେଳାଯାଇଥିବା ମ୍ୟାଚ୍ରେ ଦକ୍ଷିଣ ଆଫ୍ରିକୀୟ ବୋଲର ଶାବନିମ ଇସମାଇଲଙ୍କ ବାଉନ୍ସର ମନ୍ଧାନାଙ୍କ କାନ ପାଖରେ ବଲ ବାଜିଥିଲା। ଏହାପରେ ସେ ଗ୍ରାଉଣ୍ଡରୁ ଚାଲିଯାଇଥିଲେ। ଏହି ମ୍ୟାଚ୍କୁ ଭାରତୀୟ ଦଳ ୨ ରନ୍ରେ ଜିତି ନେଇଛି।
ଏକ ଆଇସିସି ରିପୋର୍ଟ ଅନୁଯାୟୀ, ୨୫ ବର୍ଷୀୟ ମନ୍ଧାନା ଦଳୀୟ ଡାକ୍ତରଙ୍କ ଅବଜରଭେଶନରେ ଅଛନ୍ତି। ତାଙ୍କ ମୁଣ୍ଡରେ ବଲ ବାଜିବା ପରେ ପ୍ରଥମେ ତାଙ୍କୁ ଫିଟ୍ ଘୋଷିତ କରାଯାଇଥିଲା। କିନ୍ତୁ ଗୋଟିଏ ଓଭର ପରେ ଦଳୀୟ ଡାକ୍ତରଙ୍କ ପରାମର୍ଶ କ୍ରମେ ସେ ରିଟାଏର୍ଡ ହୋଇଥିଲେ।
