କେନ୍ଦୁଝର,୧୨ା୧(ସ୍ବ.ପ୍ର.): କେନ୍ଦୁଝର ଜିଲାରେ ହାତୀ ମୃତ୍ୟୁ ଚିନ୍ତାଜନକ ହୋଇଛି। ଏହାକୁ ରୋକିବା ପାଇଁ ବନ ବିଭାଗ ପକ୍ଷରୁ ବହୁବିଦ୍ଧ ପଦକ୍ଷେପ ଗ୍ରହଣ କରାଯାଉଛି। ହାତୀମାନଙ୍କ ସୁରକ୍ଷିତ ଯାତାୟାତ ପାଇଁ ବିଭିନ୍ନ ସ୍ଥାନରେ ହାତୀ ଚଲାପଥ ଚିହ୍ନଟ କରାଯାଇଛି। ଉକ୍ତ ସ୍ଥାନଗୁଡ଼ିକରେ ସତର୍କତା ସୂଚନା ଫଳକ ମରାଯାଇଛି। ଏଥିସହ ଅନେକ ସ୍ଥାନରେ ହାତୀ ଯାତାୟାତ ନିମନ୍ତେ ଅଣ୍ଡରପାସ୍ ନିର୍ମାଣ କରାଯାଇଛି। ମାତ୍ର ପାରାଦୀପକୁ ଖଣିଗୁଡ଼ିକରୁ ମାଲ ପରିବହନ ନିମନ୍ତେ ବିଛା ଯାଉଥିବା ସ୍ଲରି ପାଇପ୍ ଲାଇନ୍ ପାଇଁ ଖୋଳାଯାଇଥିବା ଟ୍ରେଞ୍ଚ ହାତୀଙ୍କ ପାଇଁ ବିପଦ ସାଜିଛି। ଫଳରେ ହାତୀ ଅସୁରକ୍ଷିତ ଭାବେ ଯାତାୟାତ କରିବା ସହ ଜନବସତି ମୁହଁା ହେଉଛନ୍ତି।
ପ୍ରକାଶଯୋଗ୍ୟ, ଏନ୍ଏଚ୍ ୨୦ ସଦର ରେଞ୍ଜ ବଡ଼ପଶି ନିକଟ ବିଭିନ୍ନ ସ୍ଥାନରେ ହାତୀ ଗୋଟିଏ ପାଖ ଜଙ୍ଗଲରୁ ଅନ୍ୟ ପାଖକୁ ଯିବା ଆସିବା କରନ୍ତି। ସେସବୁ ସ୍ଥାନରେ ହାତୀପଲ ସୁରକ୍ଷିତ ଯାତାୟାତ ପାଇଁ ବନ ବିଭାଗ ଏକ ପୋଷ୍ଟ ନିର୍ମାଣ କରି କର୍ମଚାରୀ ମୁତୟନ କରିଛି। ହାତୀ ଯାତାୟାତ ନିମନ୍ତେ ଅଣ୍ଡରପାସ୍ ମଧ୍ୟ ନିର୍ମାଣ କରାଯାଇଛି। ଏବେ ଏନ୍ଏଚ୍ ୨୦ କଡ଼ରେ ଜଙ୍ଗଲ ମଧ୍ୟରେ ଦୀର୍ଘ କି.ମି. ବ୍ୟାପୀ ସ୍ଲରି ପାଇପ ଲାଇନ ପାଇଁ ବଡ଼ ବଡ଼ ଟ୍ରେଞ୍ଚ ଖୋଳାଯାଇ ଖୋଲା ଛାଡ଼ି ଦିଆଯାଇଛି। ଫଳରେ ହାତୀପଲ ପାଇଁ ବିପଦ ସୃଷ୍ଟି କରିଛି। ଉକ୍ତ ସ୍ଥାନରେ ଜଙ୍ଗଲ ନଷ୍ଟ କରି ସ୍ଲରି ପାଇପ ବିଛାଯାଉଥିବା ନେଇ ଖବର ପ୍ରକାଶ ପରେ ବନ ବିଭାଗ କାମ ବନ୍ଦ କରିଦେଇଛି। ଫଳରେ କାମ କରୁଥିବା ସଂସ୍ଥା ଉକ୍ତ ସ୍ଥାନରେ ହାତୀ ଚଲାପଥ ଥିବା ଜାଣି ସତ୍ତ୍ୱେ ବିନା ସୁରକ୍ଷା ବ୍ୟବସ୍ଥାରେ ଖୋଳାଯାଇଥିବା ଟ୍ରେଞ୍ଚକୁ ମୁକୁଳା ଛାଡ଼ି ପଳାଇଛି। ଟ୍ରେଞ୍ଚ୍ ଖୋଳାଯାଇଥିବାରୁ ହାତୀପଲ ଜନବସତି ମୁହଁା ହୋଇ ବ୍ୟାପକ କ୍ଷୟକ୍ଷତି ଘଟାଇବା ସମ୍ଭାବନା ସୃଷ୍ଟି ହେଉଛି ବୋଲି ସାମାଜିକ କର୍ମୀ ପ୍ରଦୀପ ମହାନ୍ତି କହିଛନ୍ତି। ସେହିପରି ଅଣ୍ଡରପାସ୍ ନିକଟରେ ମଧ୍ୟ ପାଇପ ବିଛା କାମ ଚାଲିଥିବାରୁ ହାତୀ ଯାତାୟାତରେ ସମସ୍ୟା ସୃଷ୍ଟି ହେଉଛି। ଉକ୍ତ ଟ୍ରେଞ୍ଚରେ ହାତୀ ପଡ଼ିବାର ଆଶଙ୍କା ଥିବାରୁ ଏହାକୁ ନେଇ ପରିବେଶବିତ୍ ଘୋର ଚିନ୍ତା ବ୍ୟକ୍ତ କରିଛନ୍ତି। ଏନେଇ ବନ ବିଭାଗ ତୁରନ୍ତ ପଦକ୍ଷେପ ନେବାକୁ ଦାବି ହୋଇଛି। ରେଞ୍ଜ ଅଧିକାରୀ ବିଜୟ ମହାନ୍ତ କହିଛନ୍ତି, ପାଇପ ବିଛା କାମ ବନ୍ଦ ରହିଛି। ତେବେ ହାତୀ ଚଳପ୍ରଚଳ ଅଞ୍ଚଳ ହୋଇଥିବାରୁ ସୁରକ୍ଷା ବ୍ୟବସ୍ଥା କରିବାକୁ କାମ କରୁଥିବା ସଂସ୍ଥାକୁ କୁହାଯାଇଛି। ନଚେତ୍ ଅଘଟଣ ଘଟିଲେ ସେମାନେ ଦାୟୀ ରହିବେ ବୋଲି ମହାନ୍ତ କହିଥିଲେ।
