ନୂଆଦିଲ୍ଳୀ,୧୪ା୯(ପି.ଟି.): ଏସିଆ କପ ଟି ୨୦ କ୍ରିକେଟ ଟୁର୍ନାମେଣ୍ଟରେ ଭାରତୀୟ ଦଳ ଅତ୍ୟନ୍ତ ଦୟନୀୟ ପ୍ରଦର୍ଶନ ସହିତ ସୁପର-୪ ପର୍ଯ୍ୟାୟରୁ ବିଦାୟ ନେଇଥିଲା। ଭାରତୀୟ ଦଳର ଏହି ବିଫଳତାକୁ ନେଇ ବିସିସିଆଇ ପକ୍ଷରୁ ଏକ ସମୀକ୍ଷା କରାଯାଇଥିଲା। ସଭାପତି ସୌରଭ ଗାଙ୍ଗୁଲି, ସମ୍ପାଦକ ଜୟ ଶାହ ଓ ଜାତୀୟ ଚୟନ କମିଟିକୁ ନେଇ ଏହି ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା। ଭାରତର ଖରାପ ପ୍ରଦର୍ଶନ ପାଇଁ ମିଡିଲ ଓଭର ବ୍ୟାଟିଂ ଦାୟୀ ବୋଲି ଏହି ବୈଠକ ପରେ କୁହାଯାଇଛି। ଆସନ୍ତା ଅକ୍ଟୋବର ୧୬ ତାରିଖରୁ ଅନୁଷ୍ଠିତ ହେବାକୁ ଥିବା ବିଶ୍ୱକପ ଓ ଅଷ୍ଟ୍ରେଲିଆ ଓ ଦକ୍ଷିଣ ଆଫ୍ରିକା ବିପକ୍ଷ ଟି୨୦ ସିରିଜ୍ ପାଇଁ ସୋମବାର ଦଳ ଘୋଷଣା କରାଯାଇଥିଲା। ଦଳ ଘୋଷଣା ସହିତ ଗାଙ୍ଗୁଲି ଓ ଶାହା ଚୟନକର୍ତ୍ତାଙ୍କ ସହିତ ଏସିଆ କପ୍ ବିଫଳତାର ପୋଷ୍ଟମର୍ଟମ କରିଥିଲେ। ତେବେ କେବଳ ସମସ୍ୟା ସମ୍ପର୍କରେ ଆଲୋଚନା କରିବା ପରିବର୍ତ୍ତେ ଏହାର ସମାଧାନ ବାହାର କରିବା ଉପରେ ଅଧିକ ଗୁରୁତ୍ୱ ଦିଆଯାଇଥିଲା। ଆସନ୍ତା ଟି ୨୦ ବିଶ୍ୱକପରେ କେଉଁ ଦିଗରେ ଉନ୍ନତି ଆବଶ୍ୟକ ତା ଉପରେ ମଧ୍ୟ ଆଲୋଚନା କରାଯାଇଥିଲା। ଖରାପ ପ୍ରଦର୍ଶନର ଏକାଧିକ ଦିଗ ଉପରେ ଆଲୋଚନା କରାଯାଇଥିବା ବେଳେ ମିଡିଲ ଓଭରରେ ଭାରତର ଧୀମା ବ୍ୟାଟିଂ ପରାଜୟର ମୁଖ୍ୟକାରଣ ବୋଲି କୁହାଯାଇଛି। ଏହି ଦଳରେ ଅନେକ ବିଶ୍ୱସ୍ତରୀୟ ଖେଳାଳି ରହିଛନ୍ତି ଯେଉଁମାନେ ପରିବର୍ତ୍ତିତ ପରସ୍ଥିତି ହିସାବରେ ଖାପଖୁଆଇ ଖେଳିପାରନ୍ତି। ଏସିଆ କପରେ ୭-୧୫ ଓଭର ମଧ୍ୟରେ ଭାରତୀୟ ଦଳ ଏହାର ସ୍କୋରିଂ ରେଟ ବଢାଇବାରେ ସମର୍ଥ ହେଉନଥିଲା। ରନର ପିଛା କରି ହେଉ କି ପ୍ରଥମେ ବ୍ୟାଟିଂ କରି ହେଉ ଏହି ସମୟରେ ହିଁ ଭାରତୀୟ ବ୍ୟାଟିଂ ବିଫଳ ହେଇଥିଲା। କେବଳ ଆଫଗାନିସ୍ତାନ ବିପକ୍ଷ ମ୍ୟାଚକୁ ବାଦ ଦେଲେ ଅନ୍ୟ ସମସ୍ତ ମ୍ୟାଚରେ ଭାରତୀୟ ବ୍ୟାଟ୍ସମ୍ୟାନ ଦ୍ରୁତ ରନ ସ୍କୋର କରିବାରେ ବିଫଳ ହୋଇଥିଲେ। ପାକିସ୍ତନ ବିପକ୍ଷ ପ୍ରଥମ ମ୍ୟାଚରେ ଭାରତ ଉକ୍ତ ୯ ଓଭରରେ ୫୯ ରନ୍ କରି ୩ ଉଇକେଟ ହରାଇଥିଲା। ସେହିପରି ହଂକଂ ବିପକ୍ଷରେ ୬୨ ରନ୍ କରିଥିବା ବେଳେ ସୁପର୪ରେ ପାକିସ୍ତାନ ବିପକ୍ଷରେ ୧ ଉଇକେଟ ହରାଇ ୬୨ ରନ କରିଥିଲା। ଶ୍ରୀଲଙ୍କା ବିପକ୍ଷ ସୁପର ୪ ମୁକାବିଲାରେ ଭାରତ ୭୮ ରନ ସଂଗ୍ରହ କରିଥିଲା। ସ୍ପିନରଙ୍କୁ ଖେଳିବାରେ ଭାରତୀୟ ବ୍ୟାଟର ବିଫଳ ହୋଇଛନ୍ତି। ସେହିପରି ଟପ୍ ଅର୍ଡର ବ୍ୟାଟିଂ ମଧ୍ୟ ଆଶାନୂରୂପ ହୋଇ ପାରିନାହିଁ। ଟପ୍ ଅର୍ଡର ବିଫଳ ହେବା ଭାରତର ଖରାପ ପ୍ରଦର୍ଶନର ଆଉ ଏକ ମୁଖ୍ୟ କାରଣ।
ବିଚାର ହୋଇନି ସାମସନଙ୍କ ନାମ: ଟି ୨୦ ବିଶ୍ୱକପ ଦଳରୁ ଉଇକେଟ କିପର ସଞ୍ଜୁ ସାମସନ ବାଦ ପଡିବା ନେଇ ବେଶ ବାଦ ବିବାଦ ସୃଷ୍ଟି ହୋଇଛି। ଏପରିକି ଦଳ ଘୋଷଣା ପୂର୍ବରୁ ସଞ୍ଜୁ ଫେବରିଟ୍ ଥିବା ନେଇ ଆଲୋଚନା ହୋଇଥିଲା। ତେବେ ତାଙ୍କୁ ୧୫ ଜଣିଆ ଦଳ କିମ୍ବା ଷ୍ଟାଣ୍ଡବାଇ ଖେଳାଳିଙ୍କ ମଧ୍ୟରେ ସାମିଲ କରାଯାଇନଥିଲା। ଏହାର ସ୍ପଷ୍ଟୀକରଣ ଦେଇ ଜଣେ ବିସିସିଆଇ କର୍ମକର୍ତ୍ତା କହିଛନ୍ତି ସଞ୍ଜୁଙ୍କ ନାମ ବିଚାରକୁ ମଧ୍ୟ ନିଆଯାଇନଥିଲା। ଭାରତୀୟ ଟପ୍ ଅର୍ଡରରେ ପନ୍ତ ଏକମାତ୍ର ବାମହାତୀ ଖେଳାଳି ରହିଥିବା ବେଳେ ତାଙ୍କୁ ବାଦ ଦେବା ସମ୍ପର୍କରେ ଚିନ୍ତା ମଧ୍ୟ କରାଯାଇନଥିଲା। ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜ ପାଇଁ ସାମସନଙ୍କ ନାମ ବିଚଚାର କରାଯାଇପାରେ ବୋଲି ବିସିସିଆଇ ସୂତ୍ରରୁ ପ୍ରକାଶ।
