କରାଚୀ,୨୦।୧୨: ପାକିସ୍ତାନର ପୂର୍ବତନ ଅଧିନାୟକ ଶୋଏବ ମଲିକଙ୍କ ଭଣଜା ମହମ୍ମଦ ହୁରାଇରା ସୋମବାର ଇତିହାସ ରଚିଛନ୍ତି। ସେ ଦେଶର ଦ୍ୱିତୀୟ ସର୍ବକନିଷ୍ଠ କ୍ରିକେଟର ଭାବେ କୁଏଦ-ଏର-ଆଜାମ ଟ୍ରଫିରେ ହାସଲ କରିଛନ୍ତି ତ୍ରିଶତକ। ଚଳିତ ସିଜନରେ ପ୍ରଥମ ଶ୍ରେଣୀ ପଦାର୍ପଣ କରିଥିବା ହୁରାଇରା ୧୯ ବର୍ଷ ଓ ୨୩୯ ଦିନ ବୟସରେ ଏହି ସଫଳତା ହାସଲ କରିଛନ୍ତି। ଏ ନେଇ ପାକିସ୍ତାନ କ୍ରିକେଟ ବୋର୍ଡ (ପିସିବି) ଟୁଇଟ୍ କରି ସୂଚନା ଦେଇଛି।
ନର୍ଦନ ପକ୍ଷରୁ ପ୍ରତିନିଧିତ୍ୱ କରୁଥିବା ହୁରାଇରା ବେଲୁଚିସ୍ତାନ ବିପକ୍ଷ ମ୍ୟାଚ୍ରେ ୩୪୧ ବଲରେ ୩୧୧ ରନ୍ର ଅପରାଜିତ ପାଳି ଖେଳିଥିଲେ। ତାଙ୍କ ଇନିଂସରେ ସାମିଲ ଥିଲା ୪୦ ଚୌକା ଓ ୪ ଛକା। ଉଲ୍ଲେଖଯୋଗ୍ୟ, ହୁରାଇରା ୧୯ ବର୍ଷରୁ କମ୍ ପାକିସ୍ତାନ ଦଳରେ ହାଇଦର ଅଲି ଓ ରୋହେଲ ନାଜିରଙ୍କ ସହ ଖେଳିଥିଲେ। ପାକିସ୍ତାନ ମାଟିରେ ତ୍ରିଶତକ ହାସଲ କରିବାରେ ସେ ୨୨ତମ ଖେଳାଳି। ଏହି ତାଲିକାରେ ମାଇକ ବ୍ରେଆର୍ଲି, ମାର୍କ ଟେଲର ଓ ବୀରେନ୍ଦ୍ର ସେହ୍ବାଗଙ୍କ ଭଳି ବିଦେଶୀ ଖେଳାଳି ରହିଛନ୍ତି।
