ଦୁବାଇ, ୧୫।୧୦: ଆଇପିଏଲ୍ର ତ୍ରୟୋଦଶ ସଂସ୍କରଣରେ ବୁଧବାର ଅନୁଷ୍ଠିତ ଏକ ମ୍ୟାଚ୍ରେ ଦିଲ୍ଲୀ କ୍ୟାପିଟାଲ୍ସ ୧୩ ରନରେ ରାଜସ୍ଥାନ ରୟାଲ୍ସକୁ ପରାସ୍ତ କରିଛି। ଏହି ମ୍ୟାଚ୍ରେ ଦିଲ୍ଲୀର ଓପନିଂ ବ୍ୟାଟ୍ସମ୍ୟାନ ଶିଖର ଧାଓ୍ବନ ୫୭ ରନର ଚମତ୍କାର ଇନିଂସ ଖେଳିବା ସହ ଏକ କୀର୍ତ୍ତିମାନ ସ୍ଥାପନ କରିଛନ୍ତି। ଆଇପିଏଲ୍ ଇତିହାସରେ ଅର୍ଦ୍ଧଶତକ ମାମଲାରେ ସେ ରୋହିତ୍ ଶର୍ମା, ବିରାଟ କୋହଲି ଓ ସୁରେଶ ରାଇନାଙ୍କୁ ଟପି ଯାଇଛନ୍ତି।
ଧାଓ୍ବନଙ୍କ ଏହା ୩୯ତମ ଅର୍ଦ୍ଧଶତକ ଥିଲା। ଅପରପକ୍ଷରେ କୋହଲି, ରୋହିତ୍ ଓ ରାଇନା ଆଇପିଏଲ୍ରେ ୩୮ଟି ଲେଖାଏ ଅର୍ଦ୍ଧଶତକ ହାସଲ କରିଛନ୍ତି। ଏହିକ୍ରମରେ ଧାଓ୍ବନ ଏହି ୩ ଭାରତୀୟ ବ୍ୟାଟ୍ସମ୍ୟାନଙ୍କୁ ପଛରେ ପକାଇ ଦେଇଛନ୍ତି। ତେବେ ଆଇପିଏଲ୍ ଇତିହାସରେ ସନ୍ରାଇଜର୍ସ ହାଇଦ୍ରାବାଦ୍ର ଡେଭିଡ୍ ଓ୍ବାର୍ନର ସର୍ବାଧିକ ଅର୍ଦ୍ଧଶତକ ହାସଲକାରୀ ବ୍ୟାଟ୍ସମ୍ୟାନ ହେବାର ସୌଭାଗ୍ୟ ଲାଭ କରିଛନ୍ତି। ଓ୍ବାର୍ନର ବର୍ତ୍ତମାନ ସୁଦ୍ଧା ଏହି ଲିଗ୍ରେ ମୋଟ୍ ୪୬ ଅର୍ଦ୍ଧଶତକ ଅର୍ଜନ କରିଛନ୍ତି।
