ଝାରସୁଗୁଡା ଅଫିସ୍,୩।୮: ଝାରସୁଗୁଡା ଜିଲା ଲଇକେରା ଥାନା ଓ କୁଲବିଲା ଥାନା ଅଞ୍ଚଳର ବିଭିନ୍ନ ଗ୍ରାମର ଏସ୍ଏଚ୍ଜି ଗ୍ରୁପ୍ ସଦସ୍ୟାମାନଙ୍କୁ ପ୍ରଧାନମନ୍ତ୍ରୀ ମୁଦ୍ରା ଯୋଜନାରେ ଋଣ କରାଇଦେବା କହି ଲକ୍ଷାଧିକ ଟଙ୍କା ଠକେଇ ହୋଇଥିବା ପୋଲିସ୍ରେ ଅଭିଯୋଗ ହୋଇଛି। ଏଥିରେ ସମ୍ପୃକ୍ତ ଅଭିଯୁକ୍ତ ଦମ୍ପତିଙ୍କୁ ପୋଲିସ୍ ବୁଧବାର ବଢେଇମୁଣ୍ଡା ସ୍ଥିତ ଭଡାଘରୁ ଗିରଫକରି କୋର୍ଟ ଚାଲଣ କରିଛି। ଗିରଫ ଦମ୍ପତି ହେଲେ ସମ୍ବଲପୁର ଜିଲା କୁଚିଣ୍ଡା ମନ୍ଦିର ଛକର ସ୍ବାମୀ ଭୀମରାଜ ସୋନୀ(୪୦) ଓ ସ୍ତ୍ରୀ ସୁଜାତା ପଟେଲ(୩୫)। ଉଭୟଙ୍କ ନିକଟରୁ ପୋଲିସ୍ ୨ ମୋବାଇଲ୍, ଆଧାରକାର୍ଡ, ଭୋଟରକାର୍ଡ, ବ୍ୟାଙ୍କ ପାସ୍ବୁକ୍, ନକଲି ଲୋନ୍ ମଞୁରୀ ପତ୍ର, ଅଭିଯୁକ୍ତ ଦମ୍ପତିଙ୍କ ନକଲି ପରିଚୟପତ୍ର ଆଦି ଜବତ କରିଛି । ଏସ୍ପି ରାହୁଲ ଜୈନ ଏକ ଖବରଦାତା ସମ୍ମିଳନୀରେ ଏସମ୍ପର୍କରେ ସବିଶେଷ ସୂଚନା ପ୍ରଦାନ କରିଛନ୍ତି।
ଦୀର୍ଘ ମାସେ ଧରି ସୁଜାତା ନିଜକୁ ପ୍ରଧାନମନ୍ତ୍ରୀ ମୁଦ୍ରା ଯୋଜନାର ଫିଲ୍ଡ ଅଫିସର୍ ଭାବେ ପରିଚୟଦେଇ ଗାଁ ଗାଁ ବୁଲି ଏସ୍ଏଚ୍ଜି ଗ୍ରୁପ୍ର ସଦସ୍ୟାଙ୍କୁ ୧ପ୍ରତିଶତ ସୁଧହାରରେ ଋଣ ଯୋଗାଇ ଦେବାପାଇଁ ପ୍ରବର୍ତ୍ତାଉ ଥିଲେ। ୪୦ ହଜାର ଟଙ୍କା ଋଣପାଇଁ ୩୩୦ ଟଙ୍କା ପ୍ରୋସେସିଂ ଫି ଓ ବୀମା ଦେୟପାଇଁ ୧,୫୫୦ଟଙ୍କା, ୮୦ହଜାର ଟଙ୍କା ଋଣପାଇଁ ୬୬୦ଟଙ୍କା ପ୍ରୋସେସିଂ ଫି ଓ ୩,୧୦୦ଟଙ୍କା ବୀମା ଦେୟ ଦେବାକୁ କହିଥିଲେ। ଶତାଧିକ ମହିଳା ସଦସ୍ୟା ତଥା ଋଣଗ୍ରହିତାଙ୍କ ନିକଟରୁ କହିଥିବା ଟଙ୍କା ମଧ୍ୟ ଅସୁଲ କରିଥିଲେ। ସେମାନଙ୍କୁ ଋଣ ଯୋଗାଇ ଦେବାପାଇଁ ବିଟିଏମ୍ ନିକଟକୁ ଡାକିଥିଲେ। ଋଣ ଗ୍ରହୀତା ମହିଳା ସଦସ୍ୟାମାନେ ବିଟିଏମ୍ ଛକରେ ପହଞ୍ଚି ଫିଲ୍ଡ ଅଫିସର୍ଙ୍କୁ ଖୋଜିଥିଲେ। ସେଠାରେ ଏହି ସଂସ୍ଥାର କୌଣସି ଅଫିସ୍ ନ ଥିଲା କି ଫିଲ୍ଡ ଅଫିସର୍ଙ୍କ ଦେଖା ନ ଥିଲା । ଏହାପରେ ଋଣଗ୍ରହୀତାମାନେ ତାଙ୍କୁ ଫୋନ୍କଲ୍ କରିଥିଲେ ହେଁ ଫିଲ୍ଡ ଅଫିସର୍ ସୁଜାତାଙ୍କ ଫୋନ୍ ସୁଇଚ୍ ଅଫ୍ ରହିଥିଲା । ପରେ ଋଣ ଗ୍ରହୀତା ମହିଳା ସଦସ୍ୟାମାନେ ଠକେଇର ଶିକାର ହୋଇଥିବା ଜାଣିବାକୁ ପାଇଥିଲେ। ଏନେଇ କୁଲାବିରା ଥାନା ଅନ୍ତର୍ଗତ ସିରିଆପାଲି ଗ୍ରାମର ଦୀପିକା ସିଂହ ଓ ଲଇକେରା ଥାନା ଅନ୍ତର୍ଗତ ଗୁଡିଗାଁ ଗ୍ରାମର ନଳୀନ ପଟେଲ ପୋଲିସ୍ରେ ପୃଥକ ଅଭିଯୋଗ କରିଥିଲେ। ଏନେଇ ପୋଲିସ୍ କୁଲାବିରା ଥାନା କେଶ ନଂ ୧୧୨/୨୨ ଓ ଲଇକେରା ଥାନା କେଶ ନଂ ୧୮୧/୨୨ରେ ପୃଥକ ମାମଲା ରୁଜୁ ହୋଇଥିଲା। ଏନେଇ ଏସ୍ପି ଜୈନଙ୍କ ନିର୍ଦ୍ଦେଶକ୍ରମେ ଲଇକେରା ଆଇଆଇସି ତ୍ରିପାଠୀ, କୁଲାବିରା ଆଇଆଇସି ତ୍ରିପାଠୀ ଏଏସ୍ଆଇ ଅଞଳୀ ପାତ୍ର ପ୍ରମୁଖଙ୍କୁନେଇ ଏକ ତଦନ୍ତ ଟିମ୍ ଗଠନ କରାଯାଇଥିଲା। ତଦନ୍ତ ପରେ ଏହି ଠକେଇରେ କୁଚିଣ୍ଡାର ଦମ୍ପତି ସମ୍ପୃକ୍ତ ଥିବା ଏବଂ ସେମାନେ ଝାରସୁଗୁଡାର ବଢେଇମୁଣ୍ଡାରେ ଭଡା ରହୁଥିବା ଜଣାପଡ଼ିଥିଲା। ଝାରସୁଗୁଡା ଟାଉନ ଥାନା ପୋଲିସ୍ର ସହାୟତାନେଇ ପୋଲିସ୍ ଟିମ୍ ଭଡାଘରେ ଚଢାଉକରି ଦମ୍ପତିଙ୍କୁ ଗିରଫ କରିଥିଲା। ଭଡାଘରୁ ପୋଲିସ୍ ବିଭିନ୍ନ ଜାଲ କାଗଜପତ୍ର ଜବତ କରିଥିଲା। ପୋଲିସ୍ ତଦନ୍ତ ପରେ ଗିରଫ ଅଭିଯୁକ୍ତ ଦମ୍ପତିଙ୍କ ନାମରେ ପଞାବ ନ୍ୟାଶନାଲ ବ୍ୟାଙ୍କ ଓ କାନଡା ବ୍ୟାଙ୍କରେ ଆକାଉଣ୍ଟ ଥିବା ଜାଣିବାକୁ ପାଇଛି। ଏଥିରେ ଲକ୍ଷାଧିକ ଟଙ୍କା ରହିଥିବାବେଳେ ପୋଲିସ୍ ଏହି ଆକାଉଣ୍ଟକୁ ଅଚଳ କରିଦେଇଥିବା ଜଣାପଡିଛି ।
