ତ୍ରିନିଦାଦ୍, ୨।୯: କାରିବୀୟାନ ପ୍ରିମିୟର ଲିଗ୍ (ସିପିଏଲ୍)ର ୨୧ତମ ମ୍ୟାଚ୍ରେ ତ୍ରିନିବାଗୋ ନାଇଟ୍ ରାଇଡର୍ସ ବିଜୟ ଲାଭ କରିଛି। ଏହି ମ୍ୟାଚ୍ରେ ନାଇଟ୍ ରାଇଡର୍ସ ୧୯ ରନରେ ଜାମାଇକା ତଲଓ୍ବାସକୁ ପରାସ୍ତ କରିଛି। ଫଳରେ ବଲିଉଡ୍ ସୁପର୍ଷ୍ଟାର୍ ଶାହରୁଖ ଖାନଙ୍କ ମାଲିକାନାରେ ଥିବା ନାଇଟ୍ ରାଇଡର୍ସ ଦଳ ଟୁର୍ନାମେଣ୍ଟରେ ଲଗାତର ୭ମ ବିଜୟ ଲାଭ କରିଛି। ବିଜୟ ସହ ଶାହରୁଖଙ୍କ ଦଳ ୧୪ ପଏଣ୍ଟ ପାଇ ୬ ଦଳୀୟ ଟେବୁଲ ତାଲିକାର ସର୍ବାଗ୍ରେ ରହିଛି। ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି ନାଇଟ୍ ରାଇଡର୍ସ ୨୦ ଓଭରରେ ୪ ଉଇକେଟ୍ ହରାଇ ୧୮୪ ରନ କରିଥିଲା। ଦଳ ପକ୍ଷରୁ କଲିନ୍ ମୁନ୍ରୋ ସର୍ବାଧିକ ୬୫ ରନ କରିଥିଲେ। ଜବାବରେ ଜାମାଇକା ଆନ୍ଦ୍ରେ ରସେଲ (୫୦ ରନ, ୨୩ ବଲ, ୪ ଛକା, ୫ ଚୌକା)ଙ୍କ ବିସ୍ଫୋରକ ଅପରାଜିତ ଅର୍ଦ୍ଧଶତକ ସତ୍ତ୍ୱେ ନିର୍ଦ୍ଧାରିତ ଓଭରରେ ୬ ଉଇକେଟ୍ ହରାଇ ୧୬୫ ରନ କରିବାକୁ ସମର୍ଥ ହୋଇଥିଲା। ମୁନ୍ରୋ ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ଲାଭ କରିଥିଲେ।
