ସୁରତ,୫।୮:ଗୁଜରାଟର ସୁରତରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ମୋବାଇଲ ଫୋନ ନିଶା ପିଲାମାନଙ୍କ ଜୀବନ ଉପରେ କେତେ ପ୍ରଭାବ ପକାଇପାରେ ତାହାର ଏକ ହୃଦୟ ବିଦାରକ ଉଦାହରଣ ଭାଡ ରୋଡ ଅଞ୍ଚଳରେ ଦେଖିବାକୁ ମିଳିଛି। ଏଠାରେ ସପ୍ତମ ଶ୍ରେଣୀରେ ପଢ଼ୁଥିବା ଜଣେ ୧୩ ବର୍ଷୀୟ ବାଳକ ଫାଶି ଦେଇ ଆତ୍ମହତ୍ୟା କରିଛନ୍ତି। କାରଣ ତାଙ୍କ ବାପାମା’ ତାଙ୍କୁ ମୋବାଇଲ ଛାଡ଼ି ହୋମଓ୍ବାର୍କ କରିବାକୁ କହିଥିଲେ। ଏହି ଦୁଃଖଦ ଘଟଣା ପରେ ସମଗ୍ର ପରିବାର ଗଭୀର ମର୍ମାହତ। ଏହି ଘଟଣା ଅନ୍ୟ ମାତାପିତାଙ୍କ ପାଇଁ ଏକ ଚେତାବନୀ।
ମୂଳତଃ ଓଡ଼ିଶାର ଏକ ପରିବାର କିଛି ଦିନ ଧରି ସୁରତରେ ରହୁଥିଲେ। ପରିବାରରେ ବାପାମା’, ଗୋଟିଏ ଝିଅ ଏବଂ ଗୋଟିଏ ୧୩ ବର୍ଷୀୟ ପୁଅ ଥିଲେ। ବାପା ଏକ ତନ୍ତ କାରଖାନାରେ ଶ୍ରମିକ ଭାବରେ କାମ କରନ୍ତି। ମୃତ ଛାତ୍ର ସୁରତ ନଗର ନିଗମର ପୌର ପ୍ରାଥମିକ ଶିକ୍ଷା କମିଟି ଦ୍ୱାରା ପରିଚାଳିତ ଏକ ସ୍କୁଲରେ ସପ୍ତମ ଶ୍ରେଣୀରେ ପାଠ ପଢ଼ୁଥିଲେ।
ଛାତ୍ର ଜଣଙ୍କୁ ମୋବାଇଲ୍ରେ ଗେମ ଖେଳିବାର ନିଶା ଘାରିଥିଲା। ଘଟଣା ଦିନ ବାପାମା ତାଙ୍କୁ ଗାଳି ଦେଇ ନ ଥିଲେ; ବରଂ ସେମାନେ ବୁଝାସୁଝା କରି ମୋବାଇଲ ବନ୍ଦ କରି ସ୍କୁଲ ହୋମୱାର୍କ ସାରିବାକୁ କହିଥିଲେ। କିନ୍ତୁ ସେ ରାଗିକି ଯାଇ ରୁମ୍ରେ ସିଲିଂ ଫ୍ୟାନ୍ରେ ସ୍କାର୍ଫ ବ୍ୟବହାର କରି ଆତ୍ମହତ୍ୟା କରିଥିଲେ।
ମୋବାଇଲ ଗେମିଂ ନିଶା ଯୋଗୁ ନିକଟ ଅତୀତରେ ଛାତ୍ର ଜଣଙ୍କର ଆଚରଣ ଜିଦ୍ଖୋର ଏବଂ ଆକ୍ରମଣାତ୍ମକ ହୋଇଯାଇଥିଲା ବୋଲି ପରବାର ଲୋକେ କହିଛନ୍ତି। ପୋଲିସ ସମ୍ପୂର୍ଣ୍ଣ ଘଟଣାର ତଦନ୍ତ କରୁଛି ଏବଂ ଆତ୍ମହତ୍ୟା ପଛର ସଠିକ କାରଣ ଜାଣିବାକୁ ଚେଷ୍ଟା କରୁଛି।
Dharitri – Odisha’s No.1 Odia Daily
