ନୂଆଦିଲ୍ଲୀ,୪ ।୮: କରୋନା ଭଳି ଏବେ ମଙ୍କିପକ୍ସ ଟିକାକୁ ନେଇ ଦେଶର ଦୁଇଟି ନାମୀ ଟିକା ପ୍ରସ୍ତୁତକାରୀ କମ୍ପାନୀ ମଧ୍ୟରେ ବ୍ୟଗ୍ରତା ଦେଖାଦେଇଛି । ଗତଥର କରୋନା ଭ୍ୟାକ୍ସିନ କୋଭାକ୍ସିନ ପ୍ରସ୍ତୁତକାରୀ ହାଇଦ୍ରାବାଦସ୍ଥିତ ବାୟୋଟେକ କମ୍ପାନୀ ସବୁଠାରୁ ଆଗରେ ରହିଥିଲା । ଏଥର ପୁଣେ ସ୍ଥିତ ସିରମ ଇନଷ୍ଟିଚ୍ୟୁଟ ଅଫ ଇଣ୍ଡିଆ ବି ସରକାରଙ୍କ ସହ ମିଶି ମଙ୍କିପକ୍ସ ଟିକା ପ୍ରସ୍ତୁତ କରିବାକୁ ଚାହୁଁଛି । ହେଲେ ଏପର୍ଯ୍ୟନ୍ତ ଏହି ଦୁଇଟି କମ୍ପାନୀ ସେମାନଙ୍କ ଦାବି ଉପସ୍ଥାପନ କରି ନ ଥିବା ବେଳେ ସ୍ୱାସ୍ଥ୍ୟ ମନ୍ତ୍ରୀଙ୍କ ସହ ହୋଇଥିବା ବୈଠକରେ ଏହି ଦାବି କରାଯାଇଛି ।
ମିଳିଥିବା ସୂଚନା ଅନୁଯାୟୀ, ମଙ୍ଗଳବାର କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଡା. ମନସୁଖ ମାଣ୍ଡବିୟଙ୍କ ସହ ଅନଲାଇନ ହୋଇଥିବା ବୈଠକରେ ଭାରତ ବାୟୋଟେକ ଓ ସିରମ ଉଭୟ କମ୍ପାନୀ ଖୁବଶୀଘ୍ର ମଙ୍କିପକ୍ସ ଟିକା ପ୍ରସ୍ତୁତ କରିବାକୁ ଦାବି କରିଛନ୍ତି । ଏଥିପାଇଁ ସେମାନଙ୍କୁ ଜୀବିତ ଭାଇରସର ଆବଶ୍ୟକତା ପଡିବ ଯେଉଁଥିରେ ଆଇସିଏମଆର ସହଯୋଗ କରିବ ।
ବୈଠକରେ ଯୋଗ ଦେଇଥିବା ଭାରତ ବାୟୋଟେକ କମ୍ପାନୀର ଚେୟାରମ୍ୟାନ ଡା. କୃଷ୍ଣା ଏଲା କହିଛନ୍ତି ଟିକା ଗୁଜରାଟର ଅଙ୍କଲେଶ୍ୱରରେ ପ୍ରସ୍ତୁତ କରାଯିବ । ଏବେ ପର୍ଯ୍ୟନ୍ତ ବିଶ୍ୱର ଦୁଇଟି ସ୍ଥାନରେ ଟିକା ପ୍ରସ୍ତୁତ ହୋଇପାରିବ ସେଥିମଧ୍ୟରୁ ଗୋଟିଏ ଅଙ୍କଲେଶ୍ୱର ଓ ଅନ୍ୟଟି ଜର୍ମାନୀର ବବେରିୟମ ନାଁର୍ଡିକରେ ।
