କେନ୍ଦୁଝର, ୨୯ା୧୦(ଡି.ଏନ.ଏ.)- ଆଜିକାଲି ଯୁବପିଢ଼ିଙ୍କ ମନୋରଞ୍ଜନର ମାଧ୍ୟମ ହେଉଛି ସୋସିଆଲ ମିଡିଆ। ତେବେ ଏହା ଖାଲି ମନୋରଞ୍ଜନ ନୁହେଁ କାହାକୁ ଏହି ସୋସିଆଲ ମିଡିଆ ସ୍ବତନ୍ତ୍ର ପରିଚୟ ଦେଇଛି। ଏହାର ଉଦାହରଣ ହେଉଛନ୍ତି ଜଣେ ଯୁକ୍ତ ଦୁଇ ଛାତ୍ର। କେନ୍ଦୁଝର ସଦର ବ୍ଲକର ପଦ୍ମପୁର ଆଞ୍ଚଳିକ ମହାବିଦ୍ୟାଳୟର ଯୁକ୍ତ ଦୁଇ ବିଜ୍ଞାନ ବିଭାଗରେ ଦ୍ୱିତୀୟ ବର୍ଷରେ ପଢୁଥିବା ଉଦିତ ନାରାୟଣ ମହାନ୍ତ ୟୁଟ୍ୟୁବ୍ ଦେଖି ତାକୁ ଏକ ଭଲ କାମରେ ଲଗାଇଛନ୍ତି। ସମଗ୍ର ଦେଶରେ କରୋନା ମହାମାରୀ ଜାରି ରହିଛି। ଏହାର ସଂକ୍ରମଣ ପାଇଁ ବହୁ ଲୋକ ନିଜର କାମଧନ୍ଦା ହରାଇଛନ୍ତି। କିନ୍ତୁ ଉଦିତ ସୋସିଆଲ ମିଡିଆରୁ କାମ ଶିଖି ଅନ୍ୟମାନଙ୍କ ପାଇଁ ପ୍ରେରଣା ସାଜିଛନ୍ତି। ସେ ପ୍ରମାଣ କରିଛନ୍ତି ଯେ, ମଣିଷ ମନରେ ଥିବା ଅଦମ୍ୟ ଇଚ୍ଛା ତାକୁ ସଫଳତାର ଶୀର୍ଷରେ ପହଞ୍ଚାଇବ।
ଉଦିତ୍ ୟୁଟ୍ୟୁବ୍ରୁ ଦେଖି ନିଜ ଘରେ ଅଳ୍ପ ଜାଗାରେ ମାଛ ଚାଷ କରିଛନ୍ତି। ତାଙ୍କ ଘର ସଦର ବ୍ଲକ କାଉଁରୀକଳାଠାରେ ଅବସ୍ଥିତ। କଲେଜ ବନ୍ଦ ଥିବାରୁ ବାହାରେ ନ ବୁଲି ଜୈବିକ ପଦ୍ଧତିରେ ମାଛ ଚାଷ ପାଇଁ ମନ ବଳାଇ ଏ ଦିଗରେ ଆଗେଇ ଆସିଛନ୍ତି। ନିଜ ଘରେ ଦଶ ହଜାର ଲିଟର ପାଣି କୁଣ୍ଡ ୨ଟି କରି ମାଛ ଯାଆଁଳା ଛାଡ଼ି ମାଛ ଚାଷ କରୁଛନ୍ତି। ୪ ରୁ ୫ ମାସ ମଧ୍ୟରେ ଦୁଇଟି କୁଣ୍ଡରୁ ପ୍ରାୟ ୮୦୦ କେଜି ମାଛ ପାଇବେ ବୋଲି ଉଦିତ ନାରାୟଣ ଆଶା ରଖିଛନ୍ତି। ଏଥିରୁ ମାଛ ଦାନା ଆଣ୍ଟିବାଇଓଟିକ୍ ଓ ଅନ୍ୟାନ୍ୟ ଆନୁଷଙ୍ଗିକ ଖର୍ଚ୍ଚ ବାଦ ଭଲ ଦୁଇ ପଇସା ରୋଜଗାାର ହେବ ବୋଲି ସେ କହିଛନ୍ତି। ପୁଅର ଆଗ୍ରହ ଦେଖି ବାପା କେଶବ ମହାନ୍ତ ଏ ଦିଗରେ ଉଦିତଙ୍କୁ ଅର୍ଥ ସାହାଯ୍ୟ ସହ ଅନ୍ୟାନ୍ୟ ସହାୟତା ମଧ୍ୟ ଯୋଗାଇ ଦେଇଛନ୍ତି। ପ୍ରଥମ ଥର ଚାଷରେ ଅଧିକ ଖର୍ଚ୍ଚ ହେଲେବି ପରବର୍ତ୍ତୀ ସମୟରେ ଏ ଖର୍ଚ୍ଚ କମିଯାଏ ବୋଲି ଉଦିତ ପ୍ରକାଶ କରିଛନ୍ତି। ଜୈବିକ ପଦ୍ଧତିରେ ମାଛ ଚାଷ ଆରମ୍ଭ କରି ଉଦିତ ଅନ୍ୟ ଯୁବକ ଓ ଛାତ୍ରମାନଙ୍କ ପାଇଁ ପ୍ରେରଣା ସାଜିଛନ୍ତି କହିଲେ ଅତ୍ୟୁକ୍ତି ହେବ ନାହିଁ।
