ମୁମ୍ବାଇ,୨୮ା୪: ମୁମ୍ବାଇର ମୀରା ରୋଡ୍ ଅଞ୍ଚଳର ଏକ ନିର୍ମାଣାଧୀନ ବିଲ୍ଡିଂରେ ୨ ସୁରକ୍ଷା କର୍ମୀଙ୍କୁ ଜଣେ ବ୍ୟକ୍ତି ସେମାନଙ୍କ ଧର୍ମ ପଚାରିବା ସହ ‘କଲ୍ମା’ (ଇସ୍ଲାମ ଧର୍ମ ବିଶ୍ୱାସ) ଗାଇବା ପାଇଁ କହିଥିଲେ। ସେମାନେ କଲ୍ମା ଆବୃତ୍ତି କରି ନ ପାରିବାରୁ ବ୍ୟକ୍ତି ଜଣକ ସେମାନଙ୍କୁ ଛୁରାମାଡ଼ କରିଥିବା ମୋବାଇଲ୍ ଫୁଟେଜ୍ରୁ ଦେଖିବାକୁ ମିିଳିଛି। ଉପର ମହଲାରେ ଥିବା ଜଣେ ଅଜଣା ବ୍ୟକ୍ତି ନିଜ ମୋବାଇଲ ଫୋନ୍ରେ ଉକ୍ତ ୬୦ ମିନିଟ୍ର ଭିଡିଓ ଶୁଟିଂ କରିଛନ୍ତି। ପୋଲିସ ଜାଇବ ଜୁବେର ଅନ୍ସାରୀ(୩୧) ନାମକ ଅଭିଯୁକ୍ତଙ୍କୁ ଗିରଫ କରି ହାଜତକୁ ନେଇଛି।
କହିବା ଅନୁଯାୟୀ, ଅନ୍ସାରୀ ୨ ସୁରକ୍ଷା କର୍ମୀ ରାଜକୁମାର ମିଶ୍ରା ଏବଂ ସୁବ୍ରୋତୋ ସେନ୍ଙ୍କୁ କଲ୍ମା ଆବୃତ୍ତି କରିବାକୁ କହିଥିଲେ। ଗାର୍ଡଦ୍ୱୟ ଏହା ଗାଇପାରିବେ ନାହିଁ ବୋଲି କହିବାରୁ ସେ ଛୁରିରେ ଆକ୍ରମଣ କରିଥିଲେ। ସୋମବାର ଏହି ଆକ୍ରମଣ ଘଟିଥିବାବେଳେ ଆହତ ମିଶ୍ରା ଓ ସେନ୍ଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି। ଆକ୍ରମଣ ପଛରେ ଆତଙ୍କବାଦୀ ଲିଙ୍କ୍ ଥିବା ସନ୍ଦେହ କରାଯାଉଛି। ଏହା ପଛରେ ଜିହାଦି ଉଦ୍ଦେଶ୍ୟ ରହିଛି। ଆକ୍ରମଣକାରୀ ଜଣେ ସ୍ବୟଂ-ଉଗ୍ରବାଦୀ ବୋଲି ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ୍ନବିସ୍ କହିବା ସହ ଘଟଣାର ତଦନ୍ତ ଆଣ୍ଟି ଟେରୋରିଷ୍ଟ ସ୍କ୍ବାଡ୍ (ଏଟିଏସ୍) ଏବଂ ଜାତୀୟ ତଦନ୍ତକାରୀ ସଂସ୍ଥା (ଏନ୍ଆଇଏ) କରୁଥିବା କହିଛନ୍ତି। ମୋଟାମୋଟି ଭାବେ ଏହା ଏକ ସ୍ବୟଂ-ଉଗ୍ରବାଦ ଘଟଣା ଭଳି ଜଣାପଡ଼ୁଛି। ବିଭିନ୍ନ ପୁସ୍ତକ, ଲେଖା ଓ ଇଣ୍ଟରନେଟ୍ ଜରିଆରେ ଅଭିଯୁକ୍ତ ନିଜକୁ କଠୋରପନ୍ଥୀ କରାଇଥିଲେ। ସେ ଜିହାଦୀ ମନୋଭାବ ନେଇ ଅନ୍ୟ ଧର୍ମର ଲୋକଙ୍କୁ ଟାର୍ଗେଟ କରୁଥିଲେ ବୋଲି ଫଡ୍ନବିସ୍ କହିଛନ୍ତି। ଏହି ଘଟଣା ପଛରେ କାହାର ହାତ ରହିଛି ଏବଂ ଅନ୍ୟମାନେ ଏହିଭଳି ଭାବେ କଠୋରପନ୍ଥୀ ହୋଇଛନ୍ତି କି ନାହିଁ, ତାହାର ତଦନ୍ତ କରାଯାଉଛି।
ଅନ୍ସାରୀ ବିଦେଶରେ ଅନେକ ଦିନ ରହିଥିଲେ। ତାଙ୍କ ପରିବାର ଏବେ ଆମେରିକାରେ ରହୁଛନ୍ତି। ଅନ୍ସାରୀ ଭାରତ ଫେରି ପ୍ରଥମେ ମୁମ୍ବାଇର କୁର୍ଲାରେ ଓ ପରେ ମୀରା ରୋଡ୍ ଅନ୍ତର୍ଗତ ନୟା ନଗର ଅଞ୍ଚଳରେ ରହୁଥିଲେ। ଆକ୍ରମଣର ୯୦ ମିନିଟ୍ ମଧ୍ୟରେ ପୋଲିସ ଅନସାରୀଙ୍କୁ ତାଙ୍କ ନୟାନଗର ଭଡ଼ାଘରୁ ଗିରଫ କରିବାରେ ସଫଳ ହାଇଛି। ସେ ନିୟମିତ ଆଇଏସ୍ଆଇଏସ୍ ସମ୍ପର୍କିତ ପ୍ରଚାର ଅନ୍ଲାଇନ୍ରୁ ପଢ଼ୁଥିଲେ ବୋଲି ପୋଲିସ କହିଛି। ଏହାକୁ ତଦନ୍ତର ମୁଖ୍ୟ ଦିଗ ଭାବେ ଗ୍ରହଣ କରାଯାଇଛି।
