ନୂଆଦିଲ୍ଲୀ,୨୪ା୭(ପି.ଟି.):ରାଜସ୍ଥାନର ପୂର୍ବତନ ଉପମୁଖ୍ୟମନ୍ତ୍ରୀ ସଚିନ ପାଇଲଟଙ୍କ ସମେତ ୧୯ ବିଦ୍ରୋହୀ ବିଧାୟକଙ୍କ ପିଟିଶନ ଉପରେ ହାଇକୋର୍ଟ ଶୁକ୍ରବାର ରାୟ ପ୍ରଦାନ କରିବେ। ସୁପ୍ରିମକୋର୍ଟ ମାମଲାରେ ହସ୍ତକ୍ଷେପ କରିବାକୁ ମନା କରିଦେବା ପରେ ରାଜସ୍ଥାନ ବିଧାନସଭା ବାଚସ୍ପତି ସି.ପି. ଜୋଷୀ ନିରାଶ ହୋଇଛନ୍ତି। କଂଗ୍ରେସ ବିଧାୟକ ଦଳ ବୈଠକରେ ଯୋଗଦେଇ ନ ଥିବା ୧୯ ବିଧାୟକଙ୍କୁ ଅଯୋଗ୍ୟ କରିବା ପାଇଁ ନୋଟିସ ଜାରି କରିଥିବା ବାଚସ୍ପତି ହାଇକୋର୍ଟଙ୍କ ରାୟ ଉପରେ ହସ୍ତକ୍ଷେପ ପାଇଁ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ସୁପ୍ରିମକୋର୍ଟରୁ ବାଚସ୍ପତିଙ୍କୁ କୌଣସି ଅନ୍ତରୀଣ ସହାୟତା ମିଳିନାହିଁ।
ଜଷ୍ଟିସ୍ ଅରୁଣ ମିଶ୍ର, ବି.ଆର୍. ଗଭାଇ ଏବଂ କ୍ରିଷ୍ଣ ମୁରାରୀଙ୍କୁ ନେଇ ଗଠିତ ଖଣ୍ଡପୀଠ କହିଥିଲେ, ଜୋଷୀ ତାଙ୍କ ଆବେଦନରେ ଗୁରୁତ୍ୱପୂର୍ଣ୍ଣ ପ୍ରଶ୍ନ ଉଠାଇଛନ୍ତି। ଏଥିପାଇଁ ଦୀର୍ଘ ଶୁଣାଣିର ଆବଶ୍ୟକତା ରହିଛି। ତେବେ ହାଇକୋର୍ଟ ରାୟ ପ୍ରଦାନ କରିବାରେ ଆମେ ବାଧା ଦେଇପାରିବୁ ନାହିଁ। ବିଧାୟକମାନଙ୍କ ଭିନ୍ନମତର ସ୍ବରକୁ ଚପାଇ ଦିଆଯାଇପାରିବ ନାହିଁ କି ଗଣତନ୍ତ୍ରର ପଥରୋଧ କରାଯାଇପାରିବ ନାହିଁ ବୋଲି ଖଣ୍ଡପୀଠ କହିଥିଲେ। ଜୁଲାଇ ୧୪ ଦଳବଦଳ ନୋଟିସର ଜବାବ ଦେବା ପାଇଁ ବିଦ୍ରୋହୀ ବିଧାୟକମାନଙ୍କୁ ରାଜସ୍ଥାନ ହାଇକୋର୍ଟ ଅଧିକ ସମୟ ଦେବାକୁ ନିଷ୍ପତ୍ତି ନେବାରୁ ବାଚସ୍ପତି ଜୋଷୀ ଏହାକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଥିଲେ। ବାଚସ୍ପତିଙ୍କୁ ତରଫରୁ ବରିଷ୍ଠ ଆଇନଜୀବୀ କପିଲ ସିବଲ ଯୁକ୍ତି ଦର୍ଶାଇଥିଲେ, ବିଧାୟକମାନଙ୍କର ଯଦି ଭିନ୍ନ ମତ ଦେବାର ଥିଲା ସେମାନେ ଦଳ ଆଗରେ ତାହା କହିପାରିଥାନ୍ତେ। ଏହାର ଉତ୍ତରରେ କଂଗ୍ରେସ ଦଳରେ ଗଣତନ୍ତ୍ର ଅଛି କି ବୋଲି ଜଷ୍ଟିସ୍ ମିଶ୍ର ପ୍ରଶ୍ନ କରିଥିଲେ। ବିଧାନସଭା ଚାଲୁ ନ ଥିବାବେଳେ ଦଳୀୟ ବୈଠକରେ ଯୋଗଦେବା ପାଇଁ ହୁଇପ୍ ଜାରି କରାଯାଇପାରିବ କି ବୋଲି ଖଣ୍ଡପୀଠ ସିବଲଙ୍କୁ ପଚାରିଥିଲେ। ତେବେ ବୈଠକ ପାଇଁ ହୁଇପ୍ ନୁହେଁ ନୋଟିସ ଜାରି କରାଯାଇଥିଲା ବୋଲି ସିବଲ କହିଥିଲେ। ବିଧାୟକମାନେ ନିଜ ଦଳ ବିରୋଧରେ ସ୍ବର ଉଠାଇପାରିବେ ନାହିଁ କି ବୋଲି ଜଷ୍ଟିସ୍ ମିଶ୍ର ପ୍ରଶ୍ନ କରିଥିଲେ। ବିଧାୟକମାନେ ବୈଠକରେ ଯୋଗ ନ ଦେବା ଦଳବିରୋଧୀ କାର୍ଯ୍ୟ ବୋଲି ବାଚସ୍ପତିଙ୍କ ତରଫରୁ ଆଇନଜୀବୀ ସିବଲ କହିଥିଲେ। ବିଧାୟକମାନଙ୍କୁ ଅଯୋଗ୍ୟ ଘୋଷଣା ପ୍ରକ୍ରିୟାକୁ ଅନୁମତି ମିଳିବ କି ନାହିଁ ତାହା ଅନୁଧ୍ୟାନ କରାଯାଉଛି ବୋଲି ଖଣ୍ଡପୀଠ କହିଥିଲେ।
