ଭଦ୍ରକ ଅଫିସ, ୨୪ା୭- ଭଦ୍ରକ ଜିଲା ଭଣ୍ଡାରିପୋଖରୀ ତହସିଲ ଅଧୀନ ବୈତରଣୀ ନଦୀର ବନ୍ଦାଳୋ ମଢିଆଳିଠାରୁ ଷୋଳମପୁର ପଞ୍ଚାୟତର ଦାଣ୍ଡକୂଳ ପର୍ଯ୍ୟନ୍ତ ବିଭିନ୍ନ ଘାଟରୁ ପ୍ରଶାସନ ଜାଣତରେ ଶହ ଶହ ଟ୍ରିପ ବାଲି ଚୋରା ଚାଲାଣ ହେଉଛି। ବାଲି ମାଫିଆମାନେ ପ୍ରତ୍ୟେକ ଦିନ ପ୍ରଶାସନ ଆଖିରେ ଧୂଳି ଦେଇ ନଦୀ ପଠାରୁ ବାଲି ଚୋରା ଚାଲାଣ କରି ମାଲାମାଲ ହେଉଛନ୍ତି। ନଦୀ ଗର୍ଭ ଓ ପଠାରୁ ବେଆଇନ ଖନନ ଯୋଗୁ ଅତଡ଼ା ଖାଇ ଓସାର ହେବା ସହ ନଦୀ ଗତିପଥ ମଧ୍ୟ ବଦଳିବାରେ ଲାଗିଛି। ନଦୀରେ ଅଳ୍ପ ପାଣି ଆସିଲେ ସିଧା ଗାଁ ମୁହାଁ ହେଉଛି। ଏହାକୁ ନେଇ ସ୍ଥାନୀୟ ବାସିନ୍ଦା ଭୟଭୀତ ହୋଇପଡ଼ିଛନ୍ତି।
ମଣିନାଥପୁର, ମୁଢ଼ାପଦା, ଦାଣ୍ଡକୂଳ, ନେରଡ଼ା, ଝୁଟଣା, ବନ୍ଦାଳୋ ଆଦି ଅଞ୍ଚଳରେ ଦୈନନ୍ଦିନ ଶହ ଶହ ଟ୍ରିପ ବାଲି ଚୋରାଚାଲାଣ ହେଉଛି। ଅନ୍ୟପକ୍ଷେ ବେଆଇନ ବାଲି ଚାଲାଣକାରୀଙ୍କ ଉପରେ ପ୍ରଶାସନର କାର୍ଯ୍ୟାନୁଷ୍ଠାନ ଧର୍ମକୁ ଆଖିଠାର ସଦୃଶ। ଭଦ୍ରକ ଜିଲାର ଭଣ୍ଡାରିପୋଖରୀ, ଧାମନଗର ଓ ଚାନ୍ଦବାଲି ବ୍ଲକର କିଛି ପଞ୍ଚାୟତ ଏହି ନଦୀ ଅବବାହିକାରେ ଅବସ୍ଥିତ। ପ୍ରତ୍ୟେକବର୍ଷ ବୈତରଣୀରେ ବନ୍ୟା ଆସିଲେ ମୁଖ୍ୟତଃ ଏହି ୩ଟି ବ୍ଲକ ବିଶେଷ ଭାବେ କ୍ଷତିଗ୍ରସ୍ତ ହୋଇଥାଏ। ଏବେ ଏହି ନଦୀପଠା ବାଲି ମାଫିଆମାନଙ୍କ ପାଇଁ ଚରାଭୂଇଁ ପାଲଟିଛି। ମୁଖ୍ୟତଃ ଭଣ୍ଡାରିପୋଖରୀ ବ୍ଲକର ଆଖୁଆପଦାଠାରୁ ଧାମନଗର ବ୍ଲକର ଦିହୁଡ଼ି ଆନନ୍ଦପୁର ପର୍ଯ୍ୟନ୍ତ ବୈତରଣୀ ନଦୀପଠାରୁ ବେଧଡକ ଭାବେ ବେଆଇନ ବାଲି ଖୋଳା ଚାଲିଛି।
ପ୍ରଶାସନ ଏଥିପ୍ରତି କଠୋର ଆଭିମୁଖ୍ୟ ପୋଷଣ କରିବା ପରିବର୍ତ୍ତେ ଲୋକ ଦେଖାଣିଆ ଚଢ଼ାଉ କରୁଛି। ମାଫିଆମାନେ ରାତି ଅଧରେ ପଠାରେ ଗାଡ଼ି ଲଗାଇ ଟନ ଟନ ବାଲି ଉଠାଇ ନେଉଛନ୍ତି। ଏପରିକି ନଦୀପଠାରେ ଜେସିବି ଲଗାଇ ବାଲି ଲୋଡ଼ କରାଯାଉଥିବା ଦୃଶ୍ୟ ମଧ୍ୟ ଦେଖିବାକୁ ମିଳୁଛି। ଚଳିତବର୍ଷ ଜୁନ୍ ୨୫ତାରିଖ ରାତି ୩ଟାରୁ ପ୍ରଶାସନ ପକ୍ଷରୁ ଚଢ଼ାଉ କରାଯାଇ ୨୧ଟି ଗାଡ଼ି ଜବତ କରାଯାଇଥିଲା ଏବଂ ସ୍ଥାନୀୟ କିଛି ଲୋକାଲ ଗାଡ଼ି ମାଲିକ ପୋଲିସକୁ ମାଡ଼ ମାରି ଖସିଯାଇଥିଲେ। ପରବର୍ତ୍ତୀ ମୁହୂର୍ତ୍ତରେ ଏହାକୁ ନେଇ ମାମଲା ହୋଇ କେତେଜଣ ବ୍ୟକ୍ତି ଗିରଫ ମଧ୍ୟ ହୋଇଥିଲେ। ଏପରିକି କେତେଜଣ ଅସାଧୁ ପୋଲିସ କର୍ମଚାରୀଙ୍କ ପୂର୍ବ ସୂଚନା ପାଇ ଅନ୍ୟ କିଛି ଗାଡ଼ି ଫେରାର ହୋଇଯାଇଥିଲେ। ପୁଣିଥରେ ଆରମ୍ଭ ହୋଇଛି ବାଲିମାଫିଆଙ୍କ ରାଜୁତି। ଏନେଇ ଉପଜିଲାପାଳ ପୀତାମ୍ବର ସାମଲଙ୍କୁ ପଚାରିବାରୁ ପ୍ରଶାସନ ପକ୍ଷରୁ ବିଭିନ୍ନ ବାଲି ଖାଦାନରେ ଚଢ଼ାଉ କରାଯାଇ ଗାଡ଼ିଗୁଡ଼ିକରୁ ଜରିମାନା ଆଦାୟ କରାଯାଉଛି। ଆବଶ୍ୟକ ପଡ଼ିଲେ ଗାଡ଼ି ମାଲିକଙ୍କ ନାଁରେ ମକଦ୍ଦମା ରୁଜୁ କରାଯାଉଛି ବୋଲି କହିଥିଲେ।
