ନୂଆଦିଲ୍ଲୀ,୧୫।୯: ଯଦି ଆପଣ ଜଣେ ମହିଳା ଏବଂ ନିଜର ନୂଆ ବ୍ୟବସାୟ ଆରମ୍ଭ କରିବାର ସ୍ୱପ୍ନ ଦେଖୁଛନ୍ତି କିମ୍ୱା ନିଜର ଚାଲୁଥିବା ବ୍ୟବସାୟକୁ ଆଗକୁ ବଢ଼ାଇବାକୁ ଚାହୁଁଛନ୍ତି, ତେବେ ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ (SBI) ଆପଣଙ୍କ ପାଇଁ ଏକ ଉତ୍ତମ ସୁଯୋଗ ନେଇ ଆସିଛି। SBI ଏହାର ସ୍ତ୍ରୀ ଶକ୍ତି ଯୋଜନା (Stree Shakti Scheme) ଅଧୀନରେ ମହିଳା ଉଦ୍ୟୋଗୀମାନଙ୍କୁ ସହଜ କିସ୍ତି ଏବଂ ରିହାତି ସୁଧ ହାରରେ ଋଣ ସୁବିଧା ଯୋଗାଇ ଦେଉଛି।
ବ୍ୟବସାୟ, ମ୍ୟାନୁଫ୍ୟାକ୍ଚରିଂ, ବିଉଟି ପାର୍ଲର ଠାରୁ ଆରମ୍ଭ କରି ଫୁଡ କ୍ୟାଟରିଂ ପର୍ଯ୍ୟନ୍ତ, ପ୍ରତ୍ୟେକ ପ୍ରକାରର ବ୍ୟବସାୟ ପାଇଁ SBI ମହିଳାମାନଙ୍କୁ ଆର୍ଥିକ ସହାୟତା ପ୍ରଦାନ କରୁଛି। ଆସନ୍ତୁ ଜାଣିବା SBI Stree Shakti Scheme କ’ଣ, ଏଥିରେ କେତେ ରିହାତି ମିଳିବ ଏବଂ ଏଥିପାଇଁ କିପରି ଆବେଦନ କରିପାରିବେ।
ସ୍ତ୍ରୀ ଶକ୍ତି ଯୋଜନା କ’ଣ ଏବଂ ଋଣର ସୀମା କେତେ?
SBIର ଏହି ଯୋଜନା ମହିଳା ଉଦ୍ୟୋଗୀମାନଙ୍କୁ ଆର୍ଥିକ ସହାୟତା ଯୋଗାଇବା ପାଇଁ ପ୍ରସ୍ତୁତ କରାଯାଇଛି। ଏହି ଯୋଜନାର ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ୨ କୋଟି ଟଙ୍କା ପର୍ଯ୍ୟନ୍ତ ଋଣ ଉପରେ ମହିଳାମାନଙ୍କୁ ସୁଧ ହାରରେ ୦.୫୦% (ଅଧା ପ୍ରତିଶତ) ପର୍ଯ୍ୟନ୍ତ ସୱତନ୍ତ୍ର ରିହାତି ମିଳିଥାଏ। ଏହାଦ୍ୱାରା ଆପଣଙ୍କ ଋଣ ଖର୍ଚ୍ଚ ଯଥେଷ୍ଟ କମିଯାଏ।
ଏହି ଋଣ ମ୍ୟାନୁଫ୍ୟାକ୍ଚରିଂ, ଟ୍ରେଡିଂ ଏବଂ ସର୍ଭିସ ସେକ୍ଟର ସହିତ ଜଡ଼ିତ ବ୍ୟବସାୟ ପାଇଁ ଉପଲବ୍ଧ। ଆବଶ୍ୟକତା ଅନୁସାରେ ବ୍ୟବସାୟ ପାଇଁ ୱାର୍କିଂ କ୍ୟାପିଟାଲ ଏବଂ ଟର୍ମ ଲୋନ ଉଭୟ ନିଆଯାଇପାରିବ।
ବିଭିନ୍ନ ପ୍ରକାରର ବ୍ୟବସାୟ ପାଇଁ SBI ଏହି ଯୋଜନା ଅଧୀନରେ କିଛି ସୱତନ୍ତ୍ର ସ୍କିମ ମଧ୍ୟ ପ୍ରସ୍ତୁତ କରିଛି:
ଅନ୍ନପୂର୍ଣ୍ଣା ଯୋଜନା (Annapurna Scheme): ଏହା ସେହି ମହିଳାମାନଙ୍କ ପାଇଁ ଉଦ୍ଦିଷ୍ଟ, ଯେଉଁମାନେ ଖାଦ୍ୟ ସମ୍ୱନ୍ଧୀୟ ବ୍ୟବସାୟ ଯେପରିକି କ୍ୟାଟରିଂ, ରେଷ୍ଟୁରାଣ୍ଟ, ଟିଫିନ ସର୍ଭିସ ଇତ୍ୟାଦି ଆରମ୍ଭ କରିବାକୁ ଚାହୁଁଛନ୍ତି।
ଶୃଙ୍ଗାର ଯୋଜନା (Shringar Scheme): ବିଉଟି ପାର୍ଲର, ସ୍ପା କିମ୍ୱା କସମେଟିକ୍ସ ବ୍ୟବସାୟ ଚଳାଉଥିବା ମହିଳାମାନଙ୍କ ପାଇଁ ଏହି ସୱତନ୍ତ୍ର ସ୍କିମ ତିଆରି କରାଯାଇଛି।
* ଟର୍ମ ଲୋନ ପାଇଁ ବ୍ୟାଙ୍କ ୭ ରୁ ୧୦ ବର୍ଷ ପର୍ଯ୍ୟନ୍ତ ସମୟ ଦେଇଥାଏ, ଯାହାଦ୍ୱାରା ଆପଣ କୌଣସି ଚାପ ବିନା ବ୍ୟବସାୟ ବଢ଼ାଇ ପାରିବେ ଏବଂ ଋଣ ପରିଶୋଧ କରିପାରିବେ।
* ଯୋଗ୍ୟ ମହିଳା ଉଦ୍ୟୋଗୀମାନଙ୍କୁ CGTMSE (କ୍ରେଡିଟ ଗ୍ୟାରେଣ୍ଟି ଫଣ୍ଡ ଟ୍ରଷ୍ଟ ଫର୍ ମାଇକ୍ରୋ ଆଣ୍ଡ ସ୍ମଲ ଏଣ୍ଟରପ୍ରାଇଜେସ) ଅଧୀନରେ କ୍ରେଡିଟ ଗ୍ୟାରେଣ୍ଟି ସହାୟତା ମିଳିଥାଏ।
* କିଛି ର୍ନିଦ୍ଦିଷ୍ଟ କ୍ଷେତ୍ରରେ ୧ କୋଟି ଟଙ୍କା ପର୍ଯ୍ୟନ୍ତ ଋଣ ପାଇଁ କୌଣସି ସମ୍ପତ୍ତି (କୋଲାଟେରାଲ) ବନ୍ଧକ ନରଖି ମଧ୍ୟ ଋଣ ମିଳିପାରେ।
* ସାଧାରଣତଃ ଆବେଦନକାରୀଙ୍କୁ ମୋଟ ଋଣ ରାଶିର ୧୫% ରୁ ୨୫% ନିଜ ଆଡୁ (ମାର୍ଜିନ ମନି) ଲଗାଇବାକୁ ପଡ଼ିଥାଏ।
ଋଣ ପାଇଁ ଆବଶ୍ୟକୀୟ ଦସ୍ତାବିଜ
* ପ୍ୟାନ କାର୍ଡ, ଭୋଟର ଆଇଡି କିମ୍ୱା ପରିଚୟ ସମ୍ୱନ୍ଧୀୟ ପ୍ରମାଣପତ୍ର।
* ବାସସ୍ଥାନ ପ୍ରମାଣପତ୍ର (Proof of Residence)।
* ଆପଣଙ୍କ ଯୋଜନା କିମ୍ୱା ପ୍ରୋଜେକ୍ଟ ରିପୋର୍ଟ।
* ଗତ ୩ ବର୍ଷର ଆର୍ଥିକ ରେକର୍ଡ, ଇନକମ ଟ୍ୟାକ୍ସ ରିଟର୍ଣ୍ଣ (ITR) ଏବଂ ବିଗତ ୬ ମାସର ବ୍ୟାଙ୍କ ଷ୍ଟେଟମେଣ୍ଟ।
ଆବେଦନ କିପରି କରିବେ?
ଆପଣ SBIର ଅଫିସିଆଲ ୱେବସାଇଟ ମାଧ୍ୟମରେ ଅନଲାଇନ ଆବେଦନ କରିପାରିବେ କିମ୍ୱା ଆପଣଙ୍କ ନିକଟସ୍ଥ SBI ବ୍ୟାଙ୍କ ଶାଖାକୁ ଯାଇ ଯୋଗାଯୋଗ କରିପାରିବେ। ବ୍ୟାଙ୍କଗୁଡ଼ିକରେ ମହିଳାମାନଙ୍କ ସହାୟତା ପାଇଁ ସୱତନ୍ତ୍ର ହେଲ୍ପ ଡେସ୍କ ମଧ୍ୟ ଉପଲବ୍ଧ ଥାଏ।
