ପୁରୀ ଅଫିସ,୧୪।୫: ଶ୍ରୀମନ୍ଦିର ଐତିହ୍ୟ କରିଡରକୁ ନେଇ ସାନି ବିବାଦ ମୁଣ୍ଡ ଟେକିଛି। ନିଷିଦ୍ଧାଞ୍ଚଳ ବାହାରେ ଶ୍ରୀଜଗଗନ୍ନାଥ ଅଭ୍ୟର୍ଥନା କେନ୍ଦ୍ର ନିର୍ମାଣ କରାଯିବା ପାଇଁ ନିଷ୍ପତ୍ତି ହେବା ପରେ ଏହାକୁ ସ୍ଥାନୀୟ ବାସିନ୍ଦା ଓ ସେବାୟତ ବିରୋଧ କରିଛନ୍ତି। ଶହେ ମିଟର ପରିଧି ବାହାରେ ଅର୍ଥାତ୍ ନିୟନ୍ତ୍ରିତ ଅଞ୍ଚଳରେ ଅଭ୍ୟର୍ଥନା କେନ୍ଦ୍ର ନିର୍ମାଣ ହେଲେ ଆହୁରି ଜମି ଅଧିଗ୍ରହଣ କରିବାକୁ ପଡ଼ିବ। ସମ୍ପ୍ରତି ୭୫ ମିଟର ଜମି ଅଧିଗ୍ରହଣ ହୋଇଥିବା ବେଳେ ନିଷିଦ୍ଧାଞ୍ଚଳ ପାଇଁ ଅତିକମ୍ରେ ଶହେ ମିଟର ପରିଧିରେ ନିର୍ମାଣ ହୋଇପାରିବ ନାହିଁ। ଏହା ପରବର୍ତ୍ତୀ ଅଞ୍ଚଳରେ ନିର୍ମାଣ ହୋଇପାରିବ। ଅର୍ଥାତ୍ ଶହେ ମିଟରରୁ ଯେତିକି ଅଧିକ ଜମି ଅଧିଗ୍ରହଣ ହେବ, ସଂପୃକ୍ତ ଅଞ୍ଚଳରେ ଅଭ୍ୟର୍ଥନା କେନ୍ଦ୍ର ନିର୍ମାଣ କରାଯିବ ବୋଲି ପ୍ରଶାସନିକ ସ୍ତରରେ ଆଲୋଚନା ହେଉଛି। ତେବେ ଶ୍ରୀମନ୍ଦିରର ଦକ୍ଷିଣ-ପୂର୍ବ ଦିଗରେ ହୋଇଥିବା ବ୍ୟାପକ ଖନନ ଲାଗି ଡିଟେଲ୍ସ ପ୍ରୋଜେକ୍ଟ ରିପୋର୍ଟ (ଡିପିଆର୍) ଅନୁମୋଦନ କେବେ ହେଲା ସେନେଇ ପ୍ରଶାସନ ସ୍ପଷ୍ଟୀକରଣ ଦେଉ ବୋଲି ସ୍ଥାନୀୟ ଲୋକେ ଦାବି କରୁଛନ୍ତି। ଫଳରେ ପରିସ୍ଥିତି ଆହୁରି ଜଟିଳ ଆଡ଼କୁ ମୁହଁାଉଛି। ନିୟନ୍ତ୍ରିତ ଅଞ୍ଚଳରେ ଅଭ୍ୟର୍ଥନା କେନ୍ଦ୍ର ନିର୍ମାଣ ହେଲେ ସାନି ଜମି ଅଧିଗ୍ରହଣ ହେବ। ଏହାଦ୍ୱାରା ପୁଣି ଏଏସ୍ଆଇ ଏବଂ ଏନ୍ଏମ୍ଏର ଅନୁମତି ଦରକାର ପଡ଼ିବ। ସେହିପରି ସାନି ଜମି ଅଧିଗ୍ରହଣ ହେଲେ ମାଟିମଣ୍ଡପ ସାହି, କାଳିକା ଦେବୀ ସାହି, ଶୂନ୍ୟ ଗୋଷାଣୀ ଲେନ୍ ଓ ଦୋଳମଣ୍ଡପ ସାହିର ବହୁ ଅଞ୍ଚଳ ବ୍ୟାପକ ଭାବେ ପ୍ରଭାବିତ ହେବ। ବହୁ ବାସିନ୍ଦା ଓ ବରିଷ୍ଠ ସେବାୟତଙ୍କ ଘର ଭଙ୍ଗାଯିବ। ତେଣୁ ଏହାକୁ ଗ୍ରହଣ କରାଯିବ ନାହିଁ ବୋଲି ବରିଷ୍ଠ ସେବାୟତ ବିନାୟକ ଦାସ ମହାପାତ୍ର କହିଛନ୍ତି। ସେ କହିଛନ୍ତି, ୭୫ ମିଟର ଉଚ୍ଛେଦକୁ ଗ୍ରହଣ କରିଥିଲୁ। ମହାପ୍ରଭୁଙ୍କ କାମରେ ପୁରୀ ସହରବାସୀ ତ୍ୟାଗ କରିଥିଲେ। ମାତ୍ର ସମ୍ପ୍ରତି ଉଚ୍ଛେଦ ହେଲେ ବିରୋଧ କରାଯିବ। ଶହେ ମିଟର ବାହାରେ ଅନ୍ୟ କୌଣସି ସ୍ଥାନରେ ଅଭ୍ୟର୍ଥନା କେନ୍ଦ୍ର ନିର୍ମାଣ କରାଯାଉ। ସେହିଭଳି ଶୂନ୍ୟଗୋଷାଣୀ ଗଳି ବାସିନ୍ଦା ନାରାୟଣ ମହାପାତ୍ର କହିଛନ୍ତି, ଜୀବନ ଦେବୁ ପଛେ ଜାଗା ଦେବୁନି। ଭିଟାମାଟି ଛାଡ଼ିବାର ପ୍ରଶ୍ନ ଉଠୁନାହିଁ। ଆଉ ଜମି ଉଚ୍ଛେଦ କଲେ ପ୍ରଶାସନକୁ ବିରୋଧ କରାଯିବ। ଅନ୍ୟପକ୍ଷରେ ଅଭ୍ୟର୍ଥନା କେନ୍ଦ୍ର ପାଇଁ ଯେଉଁ ଖନନ ହୋଇଥିଲା ତାହା ପ୍ରଶାସନର ଭୁଲ୍। ଏଥିଲାଗି କିଏ ଅନୁମତି ଦେଲା, କାହା ନିର୍ଦ୍ଦେଶରେ କେନ୍ଦ୍ର ନିର୍ମାଣ ହେଲା ସେନେଇ ପ୍ରଶ୍ନ ଉଠିଛି। ସରକାରଙ୍କର ଯେଉଁ ରାଜସ୍ବ ନଷ୍ଟ ହେଲା। ସେଥିପାଇଁ ନିର୍ଦ୍ଦିଷ୍ଟ ଅଧିକାରୀ ଦାୟୀ ହେବା ଦରକାର। ରାଜ୍ୟ ସରକାରଙ୍କ ଦୂରଦୃଷ୍ଟିର ଅଭାବ କାରଣରୁ ଏଭଳି ପରିସ୍ଥିତି ଉପୁଜିଲା। ତେଣୁ ସଂପୃକ୍ତ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବା ଉଚିତ ବୋଲି ସୂଚନା ଅଧିକାର କର୍ମୀ ଦିଲୀପ ବରାଳ କହିଛନ୍ତି।
