ବଲାଙ୍ଗୀର, ୧୦ା୯ (ବୀରେନ୍ଦ୍ର କୁମାର ଝାଙ୍କର): ବଲାଙ୍ଗୀର ସଦର ଥାନା ପୋଲିସ ସିଦ୍ଧାନ୍ତ ବଗର୍ତ୍ତୀ ହତ୍ୟାକାଣ୍ଡର ରବିବାର ପର୍ଦ୍ଦାଫାଶ କରିଛି। ହତ୍ୟାକାଣ୍ଡରେ ସମ୍ପୃକ୍ତ ୫ ଜଣଙ୍କୁ ପୋଲିସ ଗିରଫ କରି ସିନ୍ ରିକ୍ରିଏସନ୍ କରାଇଛି।
ଗିରଫ ଅଭିଯୁକ୍ତମାନେ ହେଲେ ସାଲେପାଲି ଗ୍ରାମର ମନୀଷ ସୁନା (୨୨), କୁନା ଜାଲ (୨୮), ସୁଦୀନ ଜାନୀ (୩୫), ଉଦିଲ ଖାନ୍ (୨୦) ଏବଂ ରାଜେଶ ଜେନା (୨୨)। ପୋଲିସ ଏସ୍ଡିପିଓ ତୋଫାନ୍ ବାଗ କହିଛନ୍ତି ଯେ, ପୂର୍ବ ଶତ୍ରୁତାକୁ ନେଇ ଏହି ହତ୍ୟାକାଣ୍ଡ ହୋଇଥିଲା। ପୁଇଁତଳା ଥାନା କେଶରକେଲା ଗ୍ରାମର ସିଦ୍ଧାନ୍ତ ବଗର୍ତ୍ତୀ(୨୫) ବଲାଙ୍ଗୀର ସୁଦପଡାଠାରେ ଥିବା ଏକ ଲୁଗା ଦୋକାନରେ ସେଲ୍ସମ୍ୟାନ୍ ଭାବେ କାମ କରୁଥିଲେ। ଗତ ୩ ତାରିଖ ଅପରାହ୍ନରେ ଉକ୍ତ ଦୋକାନକୁ ଦୁଇଜଣ ଯୁବକ ଏକ ସ୍କୁଟିରେ ଆସି ସିଦ୍ଧାନ୍ତଙ୍କୁ ଡାକିଥିଲେ। ମେଡିକାଲରେ କାମ ଅଛି କହିଥିଲେ। ଏହାର କିଛି ଘଣ୍ଟା ପରେ ସନ୍ଧ୍ୟାରେ ଖୁଜେନପାଲି ମଦଭାଟି ନିକଟରେ ସିଦ୍ଧାନ୍ତଙ୍କ ରକ୍ତାକ୍ତ ଶରୀର ପଡିଥିବା ଖବର ମିଳିଥିଲା।
ଖବର ପାଇ ସଦର ଥାନା ପୋଲିସ ଘଟଣାସ୍ଥଳରେ ପହଞ୍ଚି ଥିଲା। ସ୍ଥାନୀୟ ଲୋକେ ଆମ୍ବୁଲାନ୍ସ ଡାକି ସିଦ୍ଧାନ୍ତଙ୍କୁ ଭୀମ ଭୋଇ ମେଡିକାଲ କଲେଜ ହସ୍ପିଟାଲ ପଠାଇଥିଲେ। ତେବେ ହସ୍ପିଟାଲରେ ପହଞ୍ଚତ୍ଲା ପରେ ତାଙ୍କର ମୃତ୍ୟୁ ହୋଇଯାଇଥିଲା। କିଏ ଏବଂ କେଉଁ କାରଣରୁ ସିଦ୍ଧାନ୍ତଙ୍କୁ ହତ୍ୟା କରିଥିଲେ ତାହା ଅସ୍ପଷ୍ଟ ରହିଥିଲା।
ସିଦ୍ଧାନ୍ତଙ୍କ ବାପା ପୁଅକୁ ପିଟି ହତ୍ୟା କରାଯାଇଛି ବୋଲି ଅଭିଯୋଗ କରିଥିଲେ। ଘଟଣାକୁ ନେଇ ପୋଲିସ ତଦନ୍ତ ଆରମ୍ଭ କରିଥିଲା। ସୁଦପଡା କପଡା ଦୋକାନରୁ ଯେଉଁ ଦୁଇଜଣ ଯୁବକ ସିଦ୍ଧାନ୍ତଙ୍କୁ ଡାକି ନେଇଥିଲେ ସେମାନଙ୍କ ସିସିଟିଭି ଯାଞ୍ଚ କରାଯାଇଥିଲା। ସାଇବର ବିଭାଗର ସୂଚନା ଆଧାରରେ ପୋଲିସ ଟିମ୍ ଏହି ହତ୍ୟା ଘଟଣାର ପର୍ଦ୍ଦାଫାଶ କରିବାରେ ସଫଳ ହୋଇଛି। ପୂର୍ବ ଶତ୍ରୁତାକୁ ନେଇ ଏହି ହତ୍ୟାକାଣ୍ଡ ହୋଇଥିବା ଏସ୍ଡିପିଓ ବାଗ କହିଛନ୍ତି। ସିନ୍ ରିକ୍ରିଏସନ୍ କଲାବେଳେ କିଭଳି ଭାବେ ଦୁଇ ଅଭିଯୁକ୍ତ ମନୀଷ ଏବଂ କୁନା ଏକ ସ୍କୁଟିରେ ବସାଇ ସିଦ୍ଧାନ୍ତଙ୍କୁ ଖୁଜେନପାଲି ମଦଭାଟି ନିକଟକୁ ଆଣିଥିଲେ କହିଥିଲେ। ସେଠାରେ ପୂର୍ବରୁ ଅଭିଯୁକ୍ତ ସୁଦୀନ, ଉଦିଲ ଏବଂ ରାକେଶ ଜଗିଥିଲେ। ସମସ୍ତ ୫ଜଣ ଯାକ ମିଶି ଠେଙ୍ଗାରେ ସିଦ୍ଧାନ୍ତଙ୍କୁ ନିସ୍ତୁକ ମାଡ ମାରିଥିଲେ। ମାଡ କାରିବା ପରେ ସେଠାରୁ ଫେରାର ହୋଇଯାଇଥିଲେ। ସିନ୍ ରିକ୍ରିଏସନ୍ ପରେ ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯାଇଛି।
