ନୂଆଦିଲ୍ଲୀ/ନ୍ୟୁୟର୍କ, ୭।୫: ରେସଲିଂ ଫେଡେରେଶନ ଅଫ୍ ଇଣ୍ଡିଆ (ଡବ୍ଲ୍ୟୁଏଫ୍ଆଇ) ମୁଖ୍ୟ ବ୍ରିଜ ଭୂଷଣ ଶରନ ସିଂଙ୍କ ବିରୋଧରେ ମହିଳା କୁସ୍ତିଯୋଦ୍ଧାମାନେ ଯୌନ ନିର୍ଯାତନା ଅଭିଯୋଗ ଆଣି କାର୍ଯ୍ୟାନୁଷ୍ଠାନ ଲାଗି ନୂଆଦିଲ୍ଲୀର ଯନ୍ତରମନ୍ତରଠାରେ ଆନ୍ଦୋଳନ ଚଳାଇଛନ୍ତି। ଖବର ସଂଗ୍ରହ କରିବାକୁ ବୁଧବାର ସାମ୍ବାଦିକା ସାକ୍ଷୀ ଜୋଷୀ ସେଠାକୁ ଯାଇଥିବାବେଳେ ଦିଲ୍ଲୀ ପୋଲିସ ତାଙ୍କୁ ଆକ୍ରମଣ କରିବା ସହ ଅଟକ ରଖିଥିଲା। ୟୁଟ୍ୟୁବ୍ରେ ରିପୋର୍ଟ ପୋଷ୍ଟ କରୁଥିବା ଖବରଦାତା ଜୋଷୀ ମହିଳା କୁସ୍ତିଯୋଦ୍ଧାଙ୍କ ଧାରଣାସ୍ଥଳରେ ନିୟୋଜିତ ଥିବା ପୋଲିସ କର୍ମଚାରୀମାନଙ୍କ ଭିଡିଓ ରେକର୍ଡିଂ ପାଇଁ ଉଦ୍ୟମ କରୁଥିବାବେଳେ ଜଣେ ମହିଳା ପୋଲିସ୍ ଅଫିସର ତାଙ୍କୁ ବାରଣ କରିଥିଲେ। ପରେ କେତେଜଣ ପୋଲିସ ଅଫିସର ତାଙ୍କୁ ଚୁଟି ଧରି ଘୋଷାଡ଼ିଥିଲେ। ପୋଲିସ ବସ୍ ମଧ୍ୟକୁ ନେବା ପୂର୍ବରୁ ତାଙ୍କ ପ୍ୟାଣ୍ଟ ଚିରିଦେଇଥିଲେ ବୋଲି ଅଭିଯୋଗ ହୋଇଛି। ଘଣ୍ଟାଏ କାଳ ତାଙ୍କୁ ଅଟକ ରଖାଯିବା ପରେ ଛାଡ଼ିଦିଆଯାଇଥିଲା। ଭାରତୀୟ କର୍ତ୍ତୃପକ୍ଷ ତୁରନ୍ତ ଘଟଣାର ନିରପେକ୍ଷ ତଦନ୍ତ କରି କର୍ତ୍ତବ୍ୟରତ ସାମ୍ବାଦିକଙ୍କୁ ହଇରାଣ ହରକତ କରିବା ଓ ଅଟକ ରଖିବାରେ ସମ୍ପୃକ୍ତ ପୋଲିସ ଅଧିକାରୀମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଆମେରିକାର ସାମ୍ବାଦିକ ସୁରକ୍ଷା କମିଟି (ସିପିଜେ) ପକ୍ଷରୁ ଦାବି କରାଯାଇଛି। ବିଶ୍ୱ ପ୍ରେସ୍ ସ୍ବାଧୀନତା ଦିବସରେ ଖବର ସଂଗ୍ରହ ପାଇଁ ଯାଇଥିବା ଜଣେ ସାକ୍ଷୀଙ୍କୁ ହଇରାଣ କରିବା ସହ ଆକ୍ରମଣ କରିବା ଏବଂ ବେଆଇନ ଭାବେ ଅଟକ ରଖିବା ଘଟଣା ଭାରତରେ ମହିଳା ସାମ୍ବାଦିକମାନଙ୍କ ଅସୁରକ୍ଷିତ ପରିବେଶକୁ ସ୍ପଷ୍ଟ କରୁଛି ବୋଲି ସିପିଜେର ଏସିଆ ପ୍ରୋଗ୍ରାମ କୋଅର୍ଡିନେଟର ବେହ ଲିହ ୟି କହିଛନ୍ତି।
