ବାରିପଦା ଅଫିସ, ୮।୭-ମୟୂରଭଞ୍ଜ ଜିଲାରେ ବସବାସ କରୁଥିବା ଗରିବ ଆଦିବାସୀ ପରିବାର ଲୋକେ ସବାଇ ଘାସରୁ ନିଜର ଗୁଜୁରାଣ ମେଣ୍ଟାଉଛନ୍ତି। ସବାଇଘାସରୁ ପ୍ରସ୍ତୁତ ଉନ୍ନତ ମାନର ହସ୍ତତନ୍ତ ସାମଗ୍ରୀର ଦେଶ ବିଦେଶରେ ଚାହିଦା ଥିବାରୁ ଏହାକୁ ଜିଆଇ ଟ୍ୟାଗ୍ ପାଇଁ କେନ୍ଦ୍ର ସରକାରଙ୍କ ନିକଟରେ ଆବେଦନ କରାଯାଇଛି। ଏ ନେଇ କୃଷି ବିଶ୍ୱ ବିଦ୍ୟାଳୟ ପକ୍ଷରୁ ପତ୍ର ସଂଖ୍ୟା ୭୬୪/୨୮ ଜୁନ ୨୦୨୧ରେ ଆବେଦନ କରାଯାଇଛି ା ଅର୍ଥନୀତି ବିକାଶରେ ସବାଇ ଘାସ ଚାଷର ଉଲ୍ଲେଖନୀୟ ଅବଦାନ ରହିଥିବାରୁ ସମଗ୍ର ମୟୂରଭଞ୍ଜ ଜିଲା ରାଜ୍ୟ ତଥା ଦେଶ ପାଇଁ ଗର୍ବ ଓ ଗୌରବ। ବର୍ଷ ତମାମ ଗରିବଙ୍କ ପାଇଁ ଦୀର୍ଘଦିନ ଧରି ପ୍ରମୁଖ ରୋଜଗାରର ପନ୍ଥା ଭାବେ ଏହା ସହାୟକ ହୋଇଥାଏ ା
ବଣପାହାଡ଼ ଘେରା ମୟୂରଭଞ୍ଜ ଜିଲାରେ ବସବାସ କରୁଥିବା ଅଧିକାଂଶ ଲୋକ ଚାଷବାସ ଅପେକ୍ଷା ଜଙ୍ଗଲଜାତ ଦ୍ରବ୍ୟ, ଶାଳପତ୍ର ଓ ସବାଇଘାସକୁ ସେମାନଙ୍କର ଜୀବନ ଜୀବିକାର ପ୍ରମୁଖ ମାର୍ଗ ଭାବେ ବାଛି ନେଇଛନ୍ତି। ଅଣଜଳସେଚିତ ଜମି ବା ଟାଙ୍ଗର କିସମ ଜମିରେ ସବାଇଘାସ ଭଲ ଭାବରେ ବଢ଼ିଥାଏ। ଥରେ ଘାସ ଚାଷ ଆରମ୍ଭ ହେଲେ ତାହା ୧୦/୧୨ବର୍ଷ ଲଗାତର ଅମଳ ଦେଇଥାଏ ା ସବାଇଘାସରୁ ପ୍ରସ୍ତୁତ ଦଉଡ଼ି ଓ ଘାସ ସେମାନଙ୍କ ପାଇଁ ‘ଟଙ୍କା ଗଛ’ (ମନି ପ୍ଲାଣ୍ଟ) ସଦୃଶ୍ୟ। ବର୍ତ୍ତମାନ ପ୍ରଶାସନ ସହାୟତାରେ ଏଥିରୁ ବିଭିନ୍ନ ସୌଖିନ ସାମଗ୍ରୀ ଓ ଗୃହ ଉପକରଣ ସାମଗ୍ରୀ ପ୍ରସ୍ତୁତ କରାଯାଉଛି। ଏହା ଜିଲାର ଆର୍ଥିକ ମାନଦଣ୍ଡକୁ ସ୍ବଚ୍ଛଳ କରିଛି ା ଜିଲାରେ ୨୨ହଜାର ୭୫୮ହେକ୍ଟର ଜମିରେ ସବାଇଘାସ ଚାଷ ହେଉଥିବା ବେଳେ ବିଶେଷ ଭାବେ ବାରିପଦା, ମୋରଡ଼ା, ଶୁଳିଆପଦା, କୁଳିଅଣା, ବେତନଟୀ ଓ କପ୍ତିପଦା ଅଞ୍ଚଳରେ ଏହି ଚାଷ ହୋଇଥାଏ। ନଭେମ୍ବରରୁ ଜୁନ ମାସ ମଧ୍ୟରେ ଘାସ ଆବଶ୍ୟକତା ଅନୁଯାୟୀ ବୃଦ୍ଧି ପାଇଲେ ଚାଷୀ ତାକୁ କାଟି ବିଡ଼ା ବାନ୍ଧି ସ୍ବତନ୍ତ୍ର ଭାବେ ଶୁଖାଇ ଉପତ୍ାଦନ ଆରମ୍ଭ କରିଥାନ୍ତି। ଜିଲାରେ ବର୍ଷକୁ ୨୦ହଜାର ମେଟ୍ରିକ ଟନ ଘାସ ଉପତ୍ାଦନ ହେଉଥିବା ବେଳେ ୩ଶହ କୋଟିରୁ ଊର୍ଦ୍ଧ୍ୱ ଟଙ୍କାର କାରବାର ହୋଇଥାଏ। ଏହି ଘାସରୁ ୨୧ଟି ଏସ୍ଏଚ୍ଜି ଗ୍ରୁପର ମହିଳାମାନେ ଅତ୍ୟାଧୁନିକ ସାମଗ୍ରୀର ୟୁନିଟ ସ୍ଥାପନ କରି ୧୦୬୨ପ୍ରକାର ସାମଗ୍ରୀ ପ୍ରସ୍ତୁତ କରୁଛନ୍ତି। ଏହାର ବିକ୍ରିବଟା ପାଇଁ ଜିଲା ସଦର ମହକୁମାରେ ଥିବା ସାମଗ୍ରୀର ବିକ୍ରୟ କେନ୍ଦ୍ର ଓ ଇ-କର୍ମସ, ପ୍ଲିପ୍କାର୍ଟ, ଜବାଙ୍ଗ ଓ ଆମାଜନ ପରି ଅନଲାଇନ ବିକ୍ରୟ ସଂସ୍ଥାରେ ସାମଗ୍ରୀ ମାନଙ୍କର ଚାହିଦା ବଢୁଛି। ସବାଇରୁ ପ୍ରସ୍ତୁତ ସାମଗ୍ରୀ ପ୍ରଦୂଷଣ ମୁକ୍ତ ତଥା ଇକୋ ପ୍ରେଣ୍ଡଲି ହୋଇଥିବାରୁ ଜିଲାରେ ଥିବା ଓରମାସ ମାଧ୍ୟମରେ ଏହାର ସୁବିନିଯୋଗ ହୋଇପାରୁଛି ା ଜିଲାରେ ଥିବା ମୟୂରଭଞ୍ଜ ସବାଇ ଫାର୍ମସ ପ୍ରଡ୍ୟୁସର କମ୍ପାନୀ ଲି. ପକ୍ଷରୁ ଶାମାଖୁଣ୍ଟା କୃଷି ବିଜ୍ଞାନ କେନ୍ଦ୍ର ଦ୍ୱାରା କୃଷି ବିଶ୍ୱ ବିଦ୍ୟାଳୟକୁ ଆବେଦନ କରାଯାଇଥିଲା ା ଜିଆଇ ଟ୍ୟାଗର ମାନ୍ୟତା ମିଳିଲେ ଜିଲାବାସୀଙ୍କ ସମେତ ମହିଳାମାନେ ସ୍ବାବଲମ୍ବୀ ହୋଇପାରିବେ ବୋଲି କୃଷି ବିଜ୍ଞାନ କେନ୍ଦ୍ର(୧)ର ବୈଜ୍ଞାନିକ ଡ.ସଂଘମିତ୍ରା ପଟ୍ଟନାୟକ ପ୍ରକାଶ କରିଛନ୍ତି ା
