କ୍ୱିଭ୍,୧୭।୩: ରୁଷିଆ ଓ ୟୁକ୍ରେନ ମଧ୍ୟରେ ଜାରି ରହିଥିବା ଯୁଦ୍ଧ ୨୨ ଦିନରେ ପହଞ୍ଚିଛି। ୟୁକ୍ରେନ ଉପରେ ଏବେ ବି ରୁଷିଆ ସୈନ୍ୟ ରକେଟ ଓ ମିଶାଇଲ ମାଡ଼ କରୁଥିବା ବେଳେ ଗୁରୁବାର ଦେଶର ୩ଟି ସହରରେ ବଡ଼ ଆକ୍ରମଣ ହୋଇଛି। ପ୍ରଥମ ଆକ୍ରମଣ ରାଷ୍ଟ୍ରପତି ଭବନଠାରୁ ପ୍ରାୟ ଅଢ଼େଇ କିଲୋମିଟର ଦୂରରେ ଥିବା ଏକ ଆବାସିକ ଅଟ୍ଟାଳିକା ଉପରେ ହୋଇଥିବା ବେଳେ ଦ୍ୱିତୀୟଟି ଖାର୍କ୍ୱିଭ ଉପକଣ୍ଠରେ ଥିବା ଏକ ସ୍କୁଲ ଏବଂ ସାଂସ୍କୃତିକ କେନ୍ଦ୍ରରେ ହୋଇଛି। ସେହିପରି ରୁଷୀୟ ସୈନ୍ୟଙ୍କ ପକ୍ଷରୁ ତୃତୀୟ ଆକ୍ରମଣ ମାରିୟୂପୋଲରେ ହୋଇଥିବା ଜଣାପଡ଼ିଛି। ସୂଚନା ମୁତାବକ, ପୂର୍ବ ୟୁକ୍ରେନ ସହରରେ ରୁଷିଆ ସୈନ୍ୟଙ୍କ ପକ୍ଷରୁ ହୋଇଥିବା ଗୁଳିମାଡ଼ରେ ପ୍ରାୟ ୨୧ଜଣଙ୍କ ମୃତ୍ୟୁ ହୋଇଥିବା ବେଳେ ୨୫ଜଣ ଆହତ ହୋଇଛନ୍ତି। ତେବେ ଆହତଙ୍କ ମଧ୍ୟରୁ ୧୦ଜଣଙ୍କ ଅବସ୍ଥା ଗୁରୁତର ଥିବା ଜଣାପଡ଼ିଛି। ଏନେଇ ଆଞ୍ଚଳିକ ଅଧିକାରୀ ଏକ ଫେସବୁକ ପୋଷ୍ଟରେ ସୂଚନା ଦେଇଛନ୍ତି। ଉକ୍ତ ପୋଷ୍ଟ ସହ ସେ ଏକ ଫଟୋ ମଧ୍ୟ ଶେୟାର କରିଛନ୍ତି। ଯେଉଁଥିରେ ଆକ୍ରମଣ ହେତୁ କୋଠାର ଅନେକ ମହଲା ନଷ୍ଟ ହୋଇଯାଇଥିବାର ଦେଖିବାକୁ ମିଳିଛି।
