ବଡ଼ବିଲ, ୨୪।୩ (ସ୍ବ.ପ୍ର.): କେନ୍ଦୁଝର ଜିଲା ବଡ଼ବିଲ ପୌର କାର୍ଯ୍ୟାଳୟ ବ୍ୟାଙ୍କ ଖାତାରୁ ୨ କୋଟି ୪୪ ଲକ୍ଷ ଟଙ୍କା ଲୁଟ୍ ହେବା ସୂଚନା ପାଇ ପୌର ନିର୍ବାହୀ ଅଧିକାରୀ ଅଭିଷେକ ପଣ୍ଡା ବଡ଼ବିଲ ଥାନାରେ ଅଭିଯୋଗ କରିଛନ୍ତି। ତେବେ ମୋଟ ୪ଟି ଚେକ ଦ୍ୱାରା ଏହି ଟଙ୍କା ଦେଶର ବିଭିନ୍ନ ଅଞ୍ଚଳ ଯଥା କୋଲକାତା, ରାୟପୁର ଆଦି ସ୍ଥାନକୁ ଟ୍ରାନ୍ସଫର ହୋଇଛି। ଅଭିଯୋଗ ପରେ ସ୍ଥାନୀୟ ପୋଲିସ, ବିଭାଗୀୟ ବରିଷ୍ଠ ଅଧିକାରୀଙ୍କ ସହ ତୁରନ୍ତ ଆଲୋଚନା କରି ହସ୍ତକ୍ଷେପ କରିବା ଯୋଗୁ ୨ଟି ଚେକ୍ରେ ଥିବା ୧ କୋଟି ୭ ଲକ୍ଷ ଟଙ୍କାକୁ ଫ୍ରିଜ କରାଇବାରେ ସକ୍ଷମ ହୋଇଥିବା ଜଣାପଡିଛି। ଅନ୍ୟପକ୍ଷେ ଭୁବନେଶ୍ୱରସ୍ଥିତ ଇଓଡବ୍ଲ୍ୟୁ(ଇକୋନୋମିକ ଅଫେନ୍ସ ୱିଙ୍ଗ)କୁ ଏହି ଘଟଣାର ତଦନ୍ତ ଭାର ଦିଆଯାଇଥିବାବେଳେ ଏହି ଟିମ୍ ବୁଧବାର ଅପରାହ୍ନରେ ବଡ଼ବିଲ ପହଞ୍ଚିଛି। ପୋଲିସ ସହାୟତାରେ ଇଓଡବ୍ଲ୍ୟୁ ଟିମ ପୌରକାର୍ଯ୍ୟାଳୟର ଆକାଉଣ୍ଟ ଥିବା ବ୍ୟାଙ୍କରେ ପଚରାଉଚରା ପରେ ପୌର ନିର୍ବାହୀ ଅଧିକାରୀ ଓ ଅନ୍ୟ କେତେକ କର୍ମଚାରୀଙ୍କୁ ମଧ୍ୟ ପଚରାଉଚରା କରିଛି। ବଡ଼ବିଲ ଆଇଆଇସି ସୁଶାନ୍ତ ଦାଶ କହିଛନ୍ତି, ତଦନ୍ତ ଭାର ଇଓଡବ୍ଲ୍ୟୁକୁ ଦିଆଯାଇଛି। ଉକ୍ତ ଟିମ୍ ଏହାର ତଦନ୍ତ ଜାରି ରଖିଛି।
