ସେଣ୍ଟ କିଟ୍ସ,୨।୯: ମ୍ୟାଚ୍କୁ ଜିତିବା ପାଇଁ ଟ୍ରିନବାଗୋ ନାଇଟ୍ ରାଇଡର୍ସ (ଟିକେଆର୍)କୁ ସୁପରଓଭରରେ ଦରକାର ଥାଏ ୭ ରନ୍। ଗୁଏନା ଆମାଜନ ଓ୍ବାରିଅର୍ସ ପାଇଁ ବୋଲିଂ କରିଥିଲେ ରୋମାରିଓ ଶେଫର୍ଡ। ପ୍ରଥମ ବଲରେ କିରନ ପୋଲାର୍ଡଙ୍କୁ ଆଉଟ୍ କରିଥିଲେ। ପରବର୍ତ୍ତୀ ୫ ବଲରେ ମାତ୍ର ୪ ରନ୍ ଖର୍ଚ୍ଚ କରି ଗୁଏନା ଓ୍ବାରିଅର୍ସକୁ ଆଣିଦେଇଥିଲେ ଚମତ୍କାର ବିଜୟ।
ଚଳିତ କାରିବିଆନ ପ୍ରିମିୟର ଲିଗ୍ (ସିପିଏଲ୍)ରେ ବୁଧବାର ଖେଳାଯାଇଥିବା ଲିଗ୍ ମ୍ୟାଚ୍ରେ ପ୍ରଥମେ ବ୍ୟାଟିଂ କରି ଟ୍ରିନବାଗୋ ୨୦ ଓଭରରେ ୯ ଉଇକେଟ ହରାଇ ୧୩୮ ରନ୍ କରିଥିଲା। ରୋମାରିଓ ଏବଂ ମହମ୍ମଦ ହାଫିଜ ୩ ଉଇକେଟ ହାତେଇଥିଲେ। ଜବାବରେ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା ଗୁଏନା ଓ୍ବାରିଅର୍ସ। ଦଳ ଏକଦା ୧୪ ଓଭରରେ ୬୮ ରନ୍ କରି ୫ ପ୍ରମୁଖ ବ୍ୟାଟ୍ସମ୍ୟାନଙ୍କୁ ହରାଇ ସାରିଥିଲା। କିନ୍ତୁ ନିକୋଲାସ ପୁରନ(୨୭)ଙ୍କ ସହ ନିମ୍ନକ୍ରମର ବ୍ୟାଟ୍ସମ୍ୟାନମାନେ ମ୍ୟାଚ୍ ବଞ୍ଚାଇ ଦେଇଥିଲେ। ଅନ୍ତିମ ବଲରେ ଗୁଏନାକୁ ଦରକାର ୨ ରନ୍। କିନ୍ତୁ ଉଇକେଟ ପଡ଼ିବାରୁ ମ୍ୟାଚ୍ ଡ୍ର ହୋଇ ଯାଇଥିଲା।
