ନୀଳଗିରି,୨୬।୧୨(ପ୍ରଶାନ୍ତ ବିଶ୍ୱାଳ): ବାଲେଶ୍ୱର ଓ ମୟୂରଭଞ୍ଜ ଜିଲାର ଜୀବନରେଖା ପାଲଟିଥିବା ଶେରଗଡ଼-ନୀଳଗିରି-ଝରଣଘାଟି (ଏସ୍.ଏନ୍.ଜେ) ୧୯ନଂ. ରାଜ୍ୟ ରାଜପଥ ମରଣଯନ୍ତା ପାଲଟିଛି। ଦୁଇ ବିଭାଗ ମଧ୍ୟରେ ଟଣାଓଟରା ଯୋଗୁ ପ୍ରଶସ୍ତୀକରଣ କାର୍ଯ୍ୟ ଅଧାପନ୍ତରିଆ ହୋଇ ପଡ଼ିରହିଛି।
ଏମ୍ପି ପ୍ରତାପ ଷଡ଼ଙ୍ଗୀ କେନ୍ଦ୍ରମନ୍ତ୍ରୀ ଥିବା ସମୟରେ କେନ୍ଦ୍ର ପରିବହନ ମନ୍ତ୍ରୀଙ୍କୁ ଭେଟି ଏହି ରାସ୍ତାର ଉନ୍ନତୀକରଣ ପାଇଁ ଦାବି ଉପସ୍ଥାପନ କରିଥିଲେ। ପରେ ୧୨୫ କୋଟି କେନ୍ଦ୍ରୀୟ ଅନୁଦାନରେ କାମ ଆରମ୍ଭ ହୋଇଥିଲା। ପୂର୍ତ୍ତବିଭାଗ ୨୦୨୨ ମାର୍ଚ୍ଚ ୨୭ ତାରିଖରେ କାର୍ଯ୍ୟ ଆରମ୍ଭ କରିଥିବା ବେଳେ ୨୦୨୪ ମାର୍ଚ୍ଚ ୨୬ ସୁଦ୍ଧା କାର୍ଯ୍ୟ ସାରିବାର ଅବଧି ରହିଛି। ରାସ୍ତାର ପ୍ରଶସ୍ତାକରଣ ସହ ମରାମତି ପାଇଁ ଗତ ଜୁଲାଇ ମାସରେ ସଡ଼କ ପରିବହନ ରାଷ୍ଟ୍ରମନ୍ତ୍ରୀ ଭିକେ ସିଂ ନୀଳଗିରି ଗସ୍ତରେ ଆସିଥିଲେ। ତାଙ୍କ ଉପସ୍ଥିତିରେ କେନ୍ଦ୍ର ସଡ଼କ ପରିବହନ ମନ୍ତ୍ରୀ ନୀତିନ ଗଡ଼କରି ଭିଡିଓ କନ୍ଫରେନ୍ସ ମାଧ୍ୟମରେ ପ୍ରଶସ୍ତାକରଣ କାର୍ଯ୍ୟର ଭିତ୍ତିପ୍ରସ୍ତର ସ୍ଥାପନ କରିଥିଲେ। ପୂର୍ତ୍ତ ବିଭାଗ ଏହି କାର୍ଯ୍ୟ କରୁଥୁବା ବେଳେ ବିଳମ୍ବ ସହ ବହୁ ସ୍ଥାନରେ ଅଧାପନ୍ତରିଆ ହୋଇପଡ଼ିଛି। ତେବେ ଏହି କାମରେ ଅନିମିୟତା ଅଭିଯୋଗ ଆଣି ପୂର୍ତ୍ତ ବିଭାଗକୁ ଅଟକାଇ ଦେଇଛି ବନ ବିଭାଗ। ସବୁଠୁ ରୋଚକ ଛବି ଦେଖିବାକୁ ମିଳିଛି ସଜନାଗଡ଼ ପରେ ଭାଲୁକାଶୁଣି ରାସ୍ତାରେ। ସଜନାଗଡ଼ ପରେ ଜଙ୍ଗଲ ପାଶର୍ବ ରାସ୍ତା ହୋଇଥିବାରୁ ଆଉ ପ୍ରଶସ୍ତୀକରଣ ତ ହୋଇପାରିବନି ଯାହା କେବଳ ମରାମତି ହେବ। ସେଥିରେ ମଧ୍ୟ ବିଳମ୍ବ କରାଯାଉଛି। ରାସ୍ତାର ମଝିରୁ ଗୋଟିଏ ପାଶର୍ବ ପିଚୁ କରାଯାଇଥିବା ବେଳେ ଅନ୍ୟପାର୍ଶ୍ୱ ଖାଲ ଖମାରେ ଭର୍ତ୍ତି ହୋଇଛି। ନା କାମ ଆଉ ହେଉଛି ନା କର୍ମଚାରୀଙ୍କ ଦେଖା ମିଳୁଛି। ରାସ୍ତା ଦୁଇଫାଳ ହୋଇ ପଡିରହିଛି। ଗୋଟେପଟ କୁଲଡ଼ିହା ବନ ବିଭାଗ ଅଧୀନରେ ଥିବା ଯୋଗୁ ଅଭିଯୋଗ ବିନା କାମ ହୋଇଯାଇଛି। କିନ୍ତୁ ରାସ୍ତାର ମଝିରୁ ଅନ୍ୟପଟଟି ନୀଳଗିରି ବନ ବିଭାଗ ଅଧୀନରେ ଯାଉଥିବାରୁ ପୂର୍ତ୍ତବିଭାଗ ବିନା ଅନୁମତିରେ କାମ କରୁଥିବା କହି କାମ ଅଟକାଇ ଦେଇଛନ୍ତି ନୀଳଗିରି ରେଞ୍ଜର। ଫଳରେ ଗତ ୧୦ଦିନ ମଧ୍ୟରେ ପ୍ରାୟ ୫ରୁ ୬ଟି ବାଇକ ଦୁର୍ଘଟଣା ଘଟିଲାଣି। ଜଣଙ୍କର ମୃତ୍ୟୁ ହୋଇଥିବା ବେଳେ ୫ରୁ ଊର୍ଦ୍ଧ୍ୱ ଆହତ ହୋଇଛନ୍ତି। ଘଟଣାକୁ ପ୍ରଶାସନ ହାଲକା ଭାବେ ନେଉଥିବାରୁ ଅଦ୍ୟାବଧି ବିଦ୍ୟୁତ୍ ଖୁଣ୍ଟ ସମ୍ପ୍ରସାରଣ, ଗଛକଟା ଇତ୍ୟାଦି ହୋଇ ପାରି ନାହିଁ।
