ଅଯୋଧ୍ୟା,୨୩।୮: ଅଯୋଧ୍ୟାରେ ରାମ ମନ୍ଦିରକୁ ଯାଉଥିବା ରାସ୍ତାର ନାମ କଲ୍ୟାଣ ସିଂ ମାର୍ଗ ହେବ। ଏହା ସହିତ ଲକ୍ଷ୍ନୌ, ପ୍ରୟାଗରାଜ, ବୁଲନ୍ଦଶହର ଏବଂ ଅଲିଗଡରେ ଗୋଟିଏ ଲେଖାଏଁ ରାସ୍ତା ପୂର୍ବତନ ମୁଖ୍ୟମନ୍ତ୍ରୀ କଲ୍ୟାଣ ସିଂଙ୍କ ନାମରେ ନାମିତ କରିବାକୁ ନିଷ୍ପତ୍ତି ଗ୍ରହଣ କରାଯାଇଛି। ଉତ୍ତରପ୍ରଦେଶରର ପୂର୍ବତନ ମୁଖ୍ୟମନ୍ତ୍ରୀ କଲ୍ୟାଣ ସିଂଙ୍କ ଦେହାନ୍ତ ପରେ ସୋମବାର ତାଙ୍କର ଶେଷ ରୀତିନୀତି ଅଲିଗଡର ଅତରୋଲିରେ ଅନୁଷ୍ଠିତ ହେବ। ତାଙ୍କ ମୃତ୍ୟୁରେ ରାଜ୍ୟରେ ତିନି ଦିନିଆ ଶୋକ ପାଳନ ଘୋଷଣା କରାଯାଇଛି।
ରବିବାର ଦିନ କଲ୍ୟାଣ ସିଂଙ୍କ ମୃତଦେହକୁ ଲକ୍ଷ୍ନୌରୁ ଅଲିଗଡକୁ ନିଆଯାଇଥିଲା। ଏହାପୂର୍ବରୁ ତାଙ୍କ ମୃତଦେହକୁ ଲକ୍ଷ୍ନୌର ବିଜେପି କାର୍ଯ୍ୟାଳୟରେ ରଖାଯାଇଥିଲା ସେଠାରେ ଦଳର କର୍ମୀମାନେ କଲ୍ୟାଣ ସିଂଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସମେତ ଅନ୍ୟ ବରିଷ୍ଠ ନେତା ଲକ୍ଷ୍ନୌସ୍ଥିତ ବାସଭବନ ତାଙ୍କର ଅନ୍ତିମ ଦର୍ଶନ କରିଥିଲେ।
ଅନ୍ତିମ ସଂସ୍କାର ପାଇଁ ଅତରୋଲିରେ ପୋଲିସ ଏବଂ ପ୍ରଶାସନ ପକ୍ଷରୁ ସମସ୍ତ ବ୍ୟବସ୍ଥା ଶେଷ ହୋଇଛି। ଏଠାରେ ଦୁଇଟି ହେଲିପ୍ୟାଡ ମଧ୍ୟ ନିର୍ମାଣ କରାଯାଇଛି। ଅନ୍ତିମ ସଂସ୍କାରରେ ଯୋଗଦେବାକୁ ଆସିଥିବା ଦଳୀୟ ନେତାଙ୍କୁ ପିଡବ୍ଲୁଡି ଗେଷ୍ଟ ହାଉସରେ ରହିବାକୁ ବ୍ୟବସ୍ଥା କରାଯାଇଛି। କଲ୍ୟାଣ ସିଂଙ୍କ ମୃତଦେହକୁ କେଏମଭି ଇଣ୍ଟର କଲେଜର ଆନେକ୍ସ୍ରେ ସର୍ବସାଧାରଣ ଦର୍ଶନ ପାଇଁ ରଖାଯିବ। ଏହା ପରେ, ଅପରାହ୍ନ ୧ ଟା ବେଳେ ବୁଲନ୍ଦଶହରସ୍ଥିତ ନରୋରା ଗଙ୍ଗା ଘାଟକୁ ଅନ୍ତିମ ସଂସ୍କାର କରାଯିବ। ନରୋରା ଗଙ୍ଗା ଘାଟରେ ବୁଲନ୍ଦଶହର ପ୍ରଶାସନ ଦ୍ୱାରା ଚାରିଟି ହେଲିପ୍ୟାଡ ମଧ୍ୟ ନିର୍ମାଣ କରାଯାଇଛି।
