ଅହମ୍ମଦାବାଦ,୫।୩ : ଉଇକେଟକିପର ବ୍ୟାଟ୍ସମ୍ୟାନ ରିଷଭ ପନ୍ତ ଭବିଷ୍ୟତରେ ସମସ୍ତ ଫର୍ମାଟରେ ସର୍ବକାଳୀନ କିମ୍ବଦନ୍ତୀ ଆଖ୍ୟା ପାଇବେ ବୋଲି ପୂର୍ବାନୁମାନ କରିଛନ୍ତି ପୂର୍ବତନ ଭାରତୀୟ ଅଧିନାୟକ ତଥା ବିସିସିଆଇ ସଭାପତି ସୌରଭ ଗାଙ୍ଗୁଲି। ସ୍ଥାନୀୟ ନରେନ୍ଦ୍ର ମୋଦି ଷ୍ଟାଡିୟମରେ ଅନୁଷ୍ଠିତ ଅନ୍ତିମ ତଥା ଚତୁର୍ଥ ମ୍ୟାଚ୍ରେ ଉଭୟ ଦଳର ବ୍ୟାଟ୍ସମ୍ୟାନ ସଂଘର୍ଷ କରୁଥିବାବେଳେ ଶତକ ହାସଲ କରିଛନ୍ତି ପନ୍ତ। ପୂରା ଇନିଂସରେ ଆଟାକିଂ ବ୍ୟାଟିଂ କରିଥିବା ପନ୍ତ ୧୧୮ ବଲରେ ଖେଳିଥିଲେ ୧୦୧ ରନ୍ର ଇନିଂସ।
” ସେ ଏତେ ଭଲ ଖେଳୁଛନ୍ତି। ଚାପରେ ଥିବାବେଳେ ସେ ଯେଉଁଭଳି ଖେଳିଲେ, ତାହା ଅବିଶ୍ୱସନୀୟ। ତେବେ ଏହା ପ୍ରଥମ ଥର ନୁହେଁ ଓ ଶେଷ ଥର ମଧ୍ୟ ହେବ ନାହିଁ। ଆଗାମୀ ବର୍ଷରେ ପନ୍ତ ସମସ୍ତ ଫର୍ମାଟର ସର୍ବକାଳୀନ କିମ୍ବଦନ୍ତୀ ଭାବେ ପରିଗଣିତ ହେବେ। ଆଟାକିଂ ବ୍ୟାଟିଂ ଜାରି ରଖ। ଏହି କାରଣରୁ ତୁମେ ମ୍ୟାଚ୍ ଓ୍ବିନର ଓ ସ୍ବତନ୍ତ୍ର ହୋଇ ରହିବ “ ବୋଲି ଗାଙ୍ଗୁଲି ଟୁଇଟ୍ କରିଛନ୍ତି। ଉଲ୍ଲେଖଥାଉ କି, ସମସ୍ତ ଫର୍ମାଟରେ ଭାରତୀୟ ଦଳ ଚୂଡ଼ାନ୍ତ ଏକାଦଶରେ ସ୍ଥାନ ପାଇବା ପାଇଁ ସଂଘର୍ଷ କରୁଥିବା ପନ୍ତ ଗତ ବର୍ଷ ଅଷ୍ଟ୍ରେଲିଆ ବିପକ୍ଷ ସିରିଜ୍ରେ ଜବରଦସ୍ତ ପ୍ରତ୍ୟାବର୍ତ୍ତନ କରିଥିଲେ ।
