କେନ୍ଦୁଝର,୧୬।୩(ସ୍ବ.ପ୍ର) – କେନ୍ଦୁଝର ସଦର ବ୍ଲକ ଅନ୍ତର୍ଗତ ପଦ୍ମପୁର ରାଇସ୍ ମିଲ୍ ସ୍ଥାନୀୟ ଅଞ୍ଚଳରେ ପ୍ରଦୂଷଣ ବଢ଼ାଉଥିବାରୁ ଘୋର ଅସନ୍ତୋଷ ଦେଖାଦେଇଛି। ବର୍ତ୍ତମାନ ଗରମ ବଢ଼ୁଥିବା ବେଳେ ରାଇସ୍ ମିଲ୍ ନିକଟ ଦେଇ ବହି ଯାଇଥିବା ନାଳରେ ଲୋକମାନେ ନିତି ଦିନ ଗାଧୋଇବା ସହିତ ପଶୁପକ୍ଷୀ ଶୋଷ ମେଣ୍ଟାଇବାକୁ ଆସିଥାନ୍ତି। କିନ୍ତୁ ସେଠାରେ ରାଇସମିଲ ପାଚେରୀ କଡ଼ରୁ ପାଇପ ଯୋଗେ କେନାଲ ଜଳରେ ଦୂଷିତ ପାଣି ମିଶୁଛି। ଫଳରେ ସେଠାରେ ଗାଧୋଉଥିବା ଲୋକେ ଓ ପଶୁପକ୍ଷୀଙ୍କ ବିଭିନ୍ନ ରୋଗ ବ୍ୟାଧିରେ ପଡୁଛନ୍ତି। ସ୍ଥାନୀୟ ଲୋକଙ୍କ ଚାଷ ଜମିରେ ବିଭିନ୍ନ ପନିପରିବା ଫସଲ ଚାଷ ଆଦି ଦିଗରେ ଏହି ପାଣି ବ୍ୟବହାର କରାଯାଉଛି। ନିକଟବର୍ତ୍ତି ପଦ୍ମପୁର ପଞ୍ଚାୟତ ଦାବାଙ୍କ ଗ୍ରାମରେ ଶତାଧିକ ଆଦିବାସୀ ଜନଜାତି ବସବାସ କରୁଛନ୍ତି। ସମସ୍ତେ ପାଣି ପାଇଁ ବିଭିନ୍ନ ସମସ୍ୟାର ସମ୍ମୁଖିନ ହେଉଥିବା ଅଭିଯୋଗ କରିଛନ୍ତି। ଏହି ସମସ୍ୟା ବିଷୟରେ ବହୁବାର ରାଇସ ମିଲ୍ ମାଲିକଙ୍କୁ ଅବଗତ କରାଯାଇଥିଲେ ହେଁ ସେ ଶୁଣୁ ନ ଥିବା ଗ୍ରାମବାସୀ କହିଛନ୍ତି।
ସୂଚନା ଥାଉ କି, ଗତ ୩ ସପ୍ତାହ ହେଲାଣି ବୀରକିଶୋରପୁର ବାଲିସାହିର ସଙ୍ଗୀତା ଓ ଯୁଧିଷ୍ଠିର ମହାନ୍ତଙ୍କ ୫ବର୍ଷର ଶିଶୁ ଭେଙ୍କେଟଶ ଦାବାଙ୍କ ପୋଲ ହରଡ଼ଗୁଡ଼ା ନିକଟରେ ରାଇସ ମିଲ୍ ପକ୍ଷରୁ ପକାଯାଇଥିବା ଗରମ ବର୍ଜ୍ୟବସ୍ତୁରେ ପୋଡ଼ି ହୋଇ ଗୁରୁତର ହୋଇଛନ୍ତି। ତେବେ ଏହି ଘଟଣାରେ ମିଲ ମାଲିକ ଔଷଧ ଖର୍ଚ୍ଚ ଦେଇ ଚୁପ ବସିଥିବା ତାଙ୍କ ବାପା ଯୁୁଧଷ୍ଠିର କହିଛନ୍ତି। ଏହି ରାଇସ ମିଲ୍ ରାତିରେ ଚାଲୁଥିବାରୁ ଶବ୍ଦ ପ୍ରଦୂଷଣ ମଧ୍ୟ ବଢ଼ାଉଛି। ପିଲାମାନଙ୍କ ପାଠପଢା ଓ ଶୋଇବାବେଳେ ବହୁତ ହଇରାଣ ହେବାକୁ ପଡ଼ୁଛି। ତୁରନ୍ତ ଜିଲା ପ୍ରଶାସନ ଏହି ଘଟଣାରେ ଉଚିତ ପଦକ୍ଷପ ଗ୍ରହଣ କରିବାକୁ ଅଞ୍ଚଳବାସୀ ଦାବି କରିଛନ୍ତି। ଏନେଇ ମିଲ ମାଲିକ ଦିବ୍ୟ ରଞ୍ଜନ ସାହୁଙ୍କୁ ପଚାରିବାରୁ ଆହତଙ୍କୁ ଚିକିତ୍ସା କରାଯାଇଛି। ଲୋକଙ୍କ ସହମତିରେ ସବୁ କରାଯିବା ସହ ପ୍ରଦୂଷଣ ନିୟନ୍ତ୍ରଣ ବ୍ୟବସ୍ଥା ଗ୍ରହଣ କରାଯାଇଛି ବୋଲି କହିଛନ୍ତି।
