କୋଡ଼ିଙ୍ଗା,୧୬।୨(ଡି.ଏନ୍.ଏ.): ଭୋଟ୍ ମାଗିବା ଆଳରେ ଘରୁ ଲୁଟିନେଲେ ଅଳଙ୍କାର ଓ ନଗଦ ୭୦ ହଜାର ଟଙ୍କା। ଏପରି ଘଟଣା ନବରଙ୍ଗପୁର ଜିଲା କୋଡିଙ୍ଗା ଥାନା ଜାହାଜଭଟ୍ଟାରେ ସୋମବାର ରାତିରେ ଘଟିଛି। ଖବର ପାଇ ପୋଲିସ ମଙ୍ଗଳବାର ସନ୍ଧାନୀ କୁକୁର ଓ ସାଇଣ୍ଟିଫିକ୍ ଟିମ୍ ସହ ଘଟଣାସ୍ଥଳରେ ପହଞ୍ଚତ୍ ତଦନ୍ତ ଆରମ୍ଭ କରିଛି।
ସୋମବାର ରାତି ପ୍ରାୟ ୮ଟାରେ ଜାହାଜଭଟ୍ଟା ଗ୍ରାମର ପିଙ୍କି ହରିଜନଙ୍କ ଘର କବାଟ କେତେଜଣ ବାଡ଼େଇଥିଲେ। ଏହି ସମୟରେ ବିଦ୍ୟୁତ୍ କାଟ ହୋଇଥିଲା ଓ ପିଙ୍କିଙ୍କ ସ୍ବାମୀ ଘରେ ନ ଥିଲେ। ପିଙ୍କି ବାହାରକୁ ଆସିବାରୁ ଦୁର୍ବୃତ୍ତମାନେ ଆମ ପାର୍ଟିକୁ ଭୋଟ ଦେବ ବୋଲି କହିଥିଲେ। ପିଙ୍କି ଚାର୍ଜ ଲାଇଟ୍ ଆଣିବାକୁ ଯିବା ସମୟରେ ସେମାନଙ୍କ ମଧ୍ୟରୁ ଜଣେ ତାଙ୍କ ହାତକୁ ଟାଣି ଧରିଥିଲେ। ଅନ୍ୟ ଜଣେ ତାଙ୍କ ବେକରେ ଛୁରି ରଖି ଆଲ୍ମାରି ଚାବିକାଠି ପାଇଁ ଧମକ ଦେଇଥିଲେ। ଚାବି ନେବାପରେ ଦୁର୍ବୃତ୍ତମାନେ ଆଲମାରିରୁ ସୁନା ଅଳଙ୍କାର ସହ ୭୦ ହଜାର ଟଙ୍କା ଲୁଟି ନେଇଥିଲେ। ମଙ୍ଗଳବାର ସକାଳେ ପିଙ୍କି କୋଡିଙ୍ଗା ଥାନାରେ ଅଭିଯୋଗ କରିଥିଲେ। ତାଙ୍କ ଏତଲାକୁ ଭିତ୍ତିକରି ଥାନାରେ ଏକ ମାମଲା ରୁଜୁ କରାଯାଇଛି। ମଙ୍ଗଳବାର ସନ୍ଧ୍ୟାରେ କୋରାପୁଟ ସାଇଣ୍ଟିଫିକ ଟିମ୍ ଓ ସନ୍ଧାନୀ କୁକୁର ଆସି ଘଟଣାସ୍ଥଳରେ ତଦନ୍ତ କରିଛନ୍ତି।
