ପାରଳାଖେମୁଣ୍ଡି,୨୨ା୬ (ଗିରିଧାରୀ ପରିଛା):ଗଜପତି ଜିଲା ଗୋଷାଣି ବ୍ଲକ ଅନ୍ତର୍ଗତ ରାଜ୍ୟ ରାଜପଥ ଉପରେ ପୋଖରୀ ମାଟି ଓ ପଥର କ୍ୱାରିର ଧୂଳି ଯୋଗୁଁ ନାନାଦି ସମସ୍ୟା ଉପୁଜୁଛି। ବିଶେଷ କରି ଦେବିତୀ ଗ୍ରାମ ଆନ୍ଧ୍ର ଦେଇ ଗୋଷାଣି, ଗାରବନ୍ଧ ଏବଂ ଲାବାଣ୍ୟଗଡ ରାଜପଥରେ ଏପରି ସମସ୍ୟା ଦେଖାଦେଉଛି। ହେଲେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବା ଯୋଗୁଁ ପଥର କ୍ୱାରି ମାଲିକ ଓ ପୋଖରୀ ଖନନ କରି ମାଟି ନେଉଥିବା ଠିକାଦାରଙ୍କ ମନମୁଖୀ ବଢିଚାଲିଛି । ବର୍ତ୍ତମାନ ବିଭିନ୍ନ ପୋଖରୀ ଖନନ କାର୍ଯ୍ୟ ଚାଲୁ ରହିଥିବା ବେଳେ ମାଟିକୁ ଠିକାଦାର ଅନ୍ୟତ୍ର ସ୍ଥାନାନ୍ତରିତ କରିବା ପାଇଁ ଟ୍ରାକ୍ଟର ଯୋଗେ ନେଉଛନ୍ତି। ଏହି ସମୟରେ ଟ୍ରାକ୍ଟରରୁ କାଦମାଟି ଖସିପଡି ରାଜପଥରେ ବିକ୍ଷିପ୍ତ ଅବସ୍ଥାରେ ପଡୁଛି। ଫଳରେ ଏହି ରାସ୍ତାରେ ଯାଉଥିବା ପଥଚାରୀ ତଥା ଯାନବାହାନ ଦୁର୍ଘଟଣାର ଶିକାର ହେଉଛନ୍ତି। ଏଥିସହ ପ୍ରବଳ ଖରା ଯୋଗୁ ମାଟିଗୁଡିକ ଶୁଖି ଧୂଳି ଉଡୁଥିବା ଯୋଗୁଁ ଯାନବାହନ ଚଳାଚଳରେ ସମସ୍ୟା ଦେଖାଦେଉଛି। ବର୍ତ୍ତମାନ ବର୍ଷା ଋତୁର ଆଗମନ ହେବାକୁ ଥିବା ଏବଂ କାଳବୈଶାଖୀ ପ୍ରଭାବରେ ବର୍ଷା ହେଉଥିବାରୁ ଏହି ମାଟି ପଡୁଥିବା ରାସ୍ତାରେ ଯିବାଆସିବା କଷ୍ଟଦାୟକ ହେଉଛି। ସେହିପରି ଦେବିତୀ ଗ୍ରାମଠାରୁ ଗାରବନ୍ଧ ପର୍ଯ୍ୟନ୍ତ ବିଭିନ୍ନ ପଥର କ୍ୱାରୀ ବା ଟାଇଲ କାରଖାନା ରହିଛି । ଏହି ପଥରକ୍ୱାରି ମାଲିକମାନେ ପଥର ପାଉଁଶ ବା ଧୂଳି ଗୁଡିକ ରାଜରାସ୍ତାରେ ନେବାଆଣିବା କରୁଥିବା ଯୋଗୁଁ ଏଗୁଡିକ ରାସ୍ତା ଉପରେ ପଡୁଛି। ଫଳରେ ପଥଚାରୀମାନେ ଧୂଳି ଧୂସର ହୋଇଯାଉଛନ୍ତି। ସେହିପିର ଜଙ୍ଗଲପାଡୁ ଗ୍ରାମ ସୀମାନ୍ତରେ ଥିବା ଆନ୍ଧ୍ରର ପଥର ଖାଦାନକୁ ଦୈନନ୍ଦିନ ଭାରୀଯାନଗୁଡିକ ବିରାଟକାୟ ପଥର ଉତ୍ତୋଳନ କରି ଯାତାୟତ କରୁଥିବାରୁ ବିଭିନ୍ନ ସମୟରେ ଓଡିଶା ରାସ୍ତା ତଥା ରାଜ୍ୟରାଜପଥ ଖାଲଖମା ସୃଷ୍ଟି ହେଉଛି । ଫଳରେ ଦୁର୍ଘଟଣାମାନ ହେଉଥିବା ବେଳେ ଏହି ଖାଲଖମାଗୁଡିକୁ ଭରିବାକୁ ଯାଇ ଓଡିଶା ସରକାର ତଥା ପୂର୍ତ୍ତ ବିଭାଗର ଲକ୍ଷ ଲକ୍ଷ ଟଙ୍କା ଅପଚୟ ହେଉଛି। ତେଣୁ ଏହି ସମସ୍ୟାର ସମାଧାନ ଲାଗି ପ୍ରଶାସନ ଦୃଷ୍ଟି ଦେଇ କାର୍ଯ୍ୟାନୁଷ୍ଠାନ ଗ୍ରହଣ
କରିବାକୁ ଦାବି ହେଉଛି।
