ଦେବଗଡ଼,୨୨ା୬(ଶଶାଙ୍କ ଶେଖର ଝାଙ୍କର)କୋରଡକୋଟ ସଂରକ୍ଷିତ ଜଙ୍ଗଲରେ ଜନସ୍ବାସ୍ଥ୍ୟ ବିଭାଗ ତରଫରୁ ବେଆଇନ ଭାବେ ଜେସିବି ବ୍ୟବହାର କରି ଜଙ୍ଗଲ ନଷ୍ଟ କରି କଂକ୍ରିଟ ପିଲର ନିର୍ମାଣ କରାଯାଉଛି। କୋରଡକୋଟ ଜଳ ପ୍ରପାତରୁ ପାଣି ନେବା ପାଇଁ କାର୍ଯ୍ୟ ପ୍ରସ୍ତୁତି ଚାଲିଛି । ସରକାରୀ ନିୟମ ଅନୁସାରେ ସଂରକ୍ଷିତ ଜଙ୍ଗଲରେ କୌଣସି ପ୍ରକାର ସ୍ଥାୟୀ ନିର୍ମାଣ ହେବା କଥା ନୁହେଁ । କିନ୍ତୁ ଜନସ୍ବାସ୍ଥ୍ୟ ବିଭାଗ ଆଇନ ଉଲ୍ଲଂଘନ କରି ସେଠାରୁ ପାଣି ନେବା ପାଇଁ ସ୍ଥାୟୀ ଭାବେ ଯୋଜନା ପ୍ରସ୍ତୁତ କରୁଛି। ଏହାକୁ ନେଇ ବୁଦ୍ଧିଜୀବୀ ମହଲରେ ଉଦ୍ବେଗ ପ୍ରକାଶ ପାଇଛି।
ଦେବଗଡର କୋରଡକୋଟ ସଂରକ୍ଷିତ ଜଙ୍ଗଲ ଏକ ଐତିହାସିକ ପର୍ଯ୍ୟଟନ ସ୍ଥଳୀ। ଅତୀତରେ ବାମଣ୍ଡା ରାଜା ସଚ୍ଚିଦାନନ୍ଦଙ୍କ ସମୟରେ ଜଳପ୍ରପାତ ପାଣିକୁ ବ୍ୟବହାର କରି ଏକ ଜଳ ବିଦ୍ୟୁତ କେନ୍ଦ୍ର ସ୍ଥାପନ କରାଯାଇଥିଲା। ଏଥିରୁ ଦେବଗଡ ସହରକୁ ବିଜୁଳି ଯୋଗାଣ ହେଉଥିଲା। ଏଡାକୁ ଏସିଆ ମହାଦେଶର ଦ୍ୱିତୀୟ ଜଳବିଦ୍ୟୁତ୍ କେନ୍ଦ୍ର ଭାବରେ ଗଣା ଯାଏ । ଅନ୍ୟପକ୍ଷରେ ୨୦୧୬ ମସିହାରେ ତତ୍କାଳୀନ ଜିଲାପାଳ ଗୁହା ପୁନମ ତାପସ କୁମାର କୋରଡକୋଟରେ ଉକ୍ତ ବିଦ୍ୟୁତ୍ ପ୍ରକଳ୍ପର ଶତବାର୍ଷିକ ପାଳନ କରାଯାଇଥିଲା। ଉକ୍ତ ଐତିହାସିକ ପ୍ରକଳ୍ପରୁ ସେ ସମୟରେ ଟରବାଇନ ଦ୍ୱାରା କିପରି ବିଦ୍ୟୁତ୍ ବାହାରୁଥିଲା ଏବଂ ଦେବଗଡ ବାସୀ ବ୍ୟବହାର କରୁଥିଲେ ଏବଂ ସେହି ସ୍ଥାନରେ ଉକ୍ତ ପ୍ରକଳ୍ପର ପୁନରୁଦ୍ଧାର ନକରି ଜଙ୍ଗଲ ଓ ପରିବେଶ ନଷ୍ଟ କରିବାକୁ ଲୋକେ ସାଧାରଣରେ ଗ୍ରହଣ କରି ପାରୁ ନାହାନ୍ତ। ବର୍ତ୍ତମାନ ସେହି କୋରଡକୋଟ ଜଳପ୍ରପାତର ପାଣିକୁ ନିକଟବର୍ତ୍ତୀ ଅଞ୍ଚଳର ଚାଷୀମାନେ ଚାଷ ବଗିଚା କାର୍ଯ୍ୟରେ ବ୍ୟବହାର କରୁଛନ୍ତି। ଏହି ପ୍ରକଳ୍ପ ହେଲେ ଗରିବ ଚାଷୀଙ୍କ ଚାଷ କାର୍ଯ୍ୟ ଉଜୁଡି ଯିବ। କୋରଟକୋଟ ଜଳ ପ୍ରପାତର ଜଳପାନ କରି ବର୍ଷସାରା ପଶୁ ପକ୍ଷୀ ଜୀବଜନ୍ତୁମାନେ ଜୀବନ ଧାରଣ କରୁଛନ୍ତି। ସେହି ପାଣିକୁ ଅନ୍ୟଥା ବ୍ୟବହାର କଲେ ଜଙ୍ଗଲରେ ଥିବା ଜୀବଯନ୍ତୁ, ବୃକ୍ଷଲତା, ଔଷଧୀୟ ଗୁଳ୍ମ ଆଦି ପାଣି ଅଭାବରେ ବଞ୍ଚିବା କଷ୍ଟକର ହେବ ।
ରାଜ୍ୟ ସରକାର କୋରଡକୋଟ ଜଳପ୍ରପାତକୁ ଏକ ପର୍ଯ୍ୟଟନ ସ୍ଥଳୀ ଭାବେ ଚିହ୍ନଟ କରିଛନ୍ତି। ଏଣୁ ଏଠାକୁ ପ୍ରତିଦିନ ରାଜ୍ୟ ତଥା ରାଜ୍ୟ ବାହରୁ ଆନେକ ପର୍ଯ୍ୟଟକ ଜଳ ପ୍ରପାତର ମନୋରମ ଦୃଶ୍ୟ ଉପଭୋଗ କରିବା ପାଇଁ ଆସିଥାନ୍ତି। ପୁନଶ୍ଚ କୋରଡକୋଟ ଜଳପ୍ରପାତର ପାଣି ଷୋହଳ ବଖରି କଟାକୁ ଯୋଗାଉଥିବାରୁ ସହରରେ ଥିବା କୂଅ ପୋଖରୀର ଜଳ ରହିଥାଏ ।
ସୂଚନା ଥାଉକି ବ୍ରାହ୍ମଣୀ ନଦୀ ରେଙ୍ଗାଳିଡ୍ୟାମର ଗଚ୍ଛିତ ପାଣି ଦେବଗଡ ସହରରୁ ମାତ୍ର ୧୫ ରୁ ୨୦ କିଲୋମିଟର ଦୂରରେ। କିନ୍ତୁ ତାହା ଦେବଗଡ଼ ପାଇଁ ଉପଯୋଗରେ ଲଗେଇ ପାରୁନାହାନ୍ତି ସରକାର I ଆଗରୁ ବାରମ୍ବାର ଦାବି କରି ଆସୁଥିଲେ ମଧ୍ୟ ତାହା କାର୍ଯ୍ୟକାରୀ କରୁନାହାନ୍ତି। କିନ୍ତୁ ଏପଟେ ସଂରକ୍ଷିତ ଜଙ୍ଗଲ ଓ ପରିବେଶକୁ ନଷ୍ଟ କରିବାରେ ଲାଗିପଡ଼ିଛି ଜିଲା ପ୍ରଶାସନ। ତେଣୁ ଏହି ସବୁ ସମସ୍ୟା ଦୂର କରିବା ପାଇଁ ସେଠାରୁ ଜଳ ଅନ୍ୟତ୍ର ବ୍ୟବହାର ନ କରିବା ପାଇଁ ଦେବଗଡ ଜନସାଧାରଣ ଦାବି କରିଛନ୍ତି। ଏ ସମ୍ପର୍କରେ ଜନସ୍ବାସ୍ଥ୍ୟ ବିଭାଗ କନିଷ୍ଠ ଯନ୍ତ୍ରୀ ନେତ୍ର ନନ୍ଦ ସାହୁଙ୍କୁ ପଚାରିବାରୁ କୋରଡକୋଟ ଜଳପ୍ରପାତରୁ ବାଲିରଇରେ ନୂତନ ଭାବେ ନିର୍ମିତ ଡାକ୍ତରଖାନାକୁ ପାଣି ଯୋଗାଣ କରିବାକୁ ଆମକୁ ବନ ବିଭାଗ ପକ୍ଷରୁ ଅନୁମତି ମିଳିଛି କହିଥିଲେ। ଫରେଷ୍ଟର ଭୀମସେନ ଶତପଥୀ ଅନୁମତି ଦିଆଯାଇଥିବା କହିଥିଲେ।
