କୋଲକାତା/ନୂଆଦିଲ୍ଲୀ,୧୭।୨(ପି.ଟି.): ପଶ୍ଚିମବଙ୍ଗ ଉତ୍ତର ୨୪ ପ୍ରଗଣା ଜିଲାର ସନ୍ଦେଶଖାଲି ବ୍ଲକ୍ ଅଞ୍ଚଳରେ ମହିଳାମାନଙ୍କୁ ଯୌନ ନିର୍ଯାତନା ଓ ସେମାନଙ୍କ ଜମିକୁ ବଳପୂର୍ବକ ଦଖଲ ଘଟଣାକୁ ନେଇ ଶାସକ ଓ ବିରୋଧୀ ଦଳ ପରସ୍ପରକୁ ଦୋଷାରୋପ କରୁଥିବାବେଳେ ଉତ୍ତେଜନା ବଢ଼ିବାରେ ଲାଗିଛି। ଶୁକ୍ରବାର ଭାଜପା ଓ କଂଗ୍ରେସର ବରିଷ୍ଠ ନେତାମାନେ ଉକ୍ତ ଅଞ୍ଚଳକୁ ଯାଉଥିବାବେଳେ ପୋଲିସ ସେମାନଙ୍କୁ ଅଟକାଇଥିଲା। ମୁଖ୍ୟମନ୍ତ୍ରୀ ମମତା ବାନାର୍ଜୀ ରାଜ୍ୟରେ ଆଇନ ଶୃଙ୍ଖଳା ସ୍ଥିତିକୁ ବଢ଼ାଇବା ସହ ଘଟଣାକୁ ସାମ୍ପ୍ରଦାୟିକ ରୂପ ଦେବାକୁ ଉଦ୍ୟମ କରୁଥିବା ବିରୋଧୀ ଅଭିଯୋଗ କରିଛନ୍ତି।
ଜାତୀୟ ଅନୁସୂଚିତ ଜାତି କମିଶନ (ଏନ୍ସିଏସ୍ସି) ପଶ୍ଚିମବଙ୍ଗରେ ରାଷ୍ଟ୍ରପତି ଶାସନ ଲାଗୁ କରିବା ପାଇଁ ସୁପାରିସ କରିଥିବା ଏହାର ଅଧ୍ୟକ୍ଷ ଅରୁଣ ହାଲଦାର କହିଛନ୍ତି। ସନ୍ଦେଶଖାଲିରେ ମହିଳାମାନଙ୍କୁ ଟିଏମ୍ସି ସମର୍ଥକମାନେ ହଇରାଣ କରିବା ସହ ନିର୍ଯାତନା ଦେଉଥିବା କମିଶନ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଦେଇଥିବା ରିପୋର୍ଟରେ ଉଲ୍ଲେଖ ରହିଛି। ଦିନକ ପୂର୍ବରୁ କମିଶନ ସନ୍ଦେଶଖାଲି ଗସ୍ତ କରିଥିଲେ।
ସନ୍ଦେଶଖାଲିରେ ଟିଏମ୍ସିର କେତେଜଣ ନେତା ଗାଁର ମହିଳାମାନଙ୍କୁ ଯୌନ ନିର୍ଯାତନା ଦେବା ସହ ଅତ୍ୟାଚାର କରୁଥିବା ଅଭିଯୋଗରେ ଆନ୍ଦୋଳନ ଜାରି ରହିଛି। ଏହାକୁ ନେଇ ରାଜନୈତିକ ବାକ୍ଯୁଦ୍ଧ ଜୋର୍ଦାର ହୋଇଛି। ଜାତୀୟ ସ୍ତରରେ ଇଣ୍ଡିଆ ମେଣ୍ଟରେ ଟିଏମ୍ସି ରହିଥିଲେ ମଧ୍ୟ ପଶ୍ଚିମବଙ୍ଗରେ କଂଗ୍ରେସର ବରିଷ୍ଠ ନେତାମାନେ ଟିଏମ୍ସିକୁ ସମାଲୋଚନା କରିବାକୁ ପଛାଇ ନାହାନ୍ତି। ସନ୍ଦେଶଖାଲି ମାମଲାରେ ସେମାନେ ମମତାଙ୍କୁ କଡ଼ା ସମାଲୋଚନା କରିଛନ୍ତି। ରାଜ୍ୟ କଂଗ୍ରେସ ସଭାପତି ଅଧୀର ରଞ୍ଜନ ଚୌଧୁରୀଙ୍କ ନେତୃତ୍ୱରେ ଏକ ଟିମ୍ ସନ୍ଦେଶଖାଲି ଯାଉଥିବାବେଳେ ପୋଲିସ ସେମାନଙ୍କୁ ଅଟକାଇବାରୁ ମୁହଁାମୁହିଁ ସ୍ଥିତି ଉପୁଜିଥିଲା। ମମତା ସନ୍ଦେଶଖାଲି ପ୍ରସଙ୍ଗକୁ ରାଜନୀତିକରଣ ଓ ସାମ୍ପ୍ରଦାୟିକୀକରଣ କରୁଥିବା ଅଧୀର ଅଭିଯୋଗ କରିଛନ୍ତି।
ସେହିପରି କେନ୍ଦ୍ରମନ୍ତ୍ରୀ ପ୍ରତିମା ଭୌମିକ ଏବଂ ଅନ୍ନପୂର୍ଣ୍ଣା ଦେବୀଙ୍କ ନେତୃତ୍ୱରେ ଭାଜପାର ଏକ କେନ୍ଦ୍ରୀୟ ପ୍ରତିନିଧି ଦଳ ସନ୍ଦେଶଖାଲି ଯିବାବେଳେ ପୋଲିସ ସେମାନଙ୍କୁ ରାମପୁର ନିକଟରେ ଅଟକାଇଥିଲା। ଘଟଣାସ୍ଥଳକୁ ମାତ୍ର ୪ ଜଣଙ୍କୁ ଛାଡ଼ିବା ପାଇଁ ଭାଜପା ପ୍ରତିନିଧି କହିବା ସତ୍ତ୍ୱେ ପୋଲିସ ସେମାନଙ୍କୁ ଅନୁମତି ଦେଇ ନ ଥିଲା ବୋଲି ମନ୍ତ୍ରୀ ଅନ୍ନପୂର୍ଣ୍ଣା ଦେବୀ କହିଛନ୍ତି। ଫଳରେ ପ୍ରତିନିଧି ଦଳ ସେଠାରେ ଧାରଣାରେ ବସିଥିଲେ। ପରେ ସେମାନେ ପଶ୍ଚିମବଙ୍ଗ ରାଜ୍ୟପାଳ ସି.ଭି. ଆନନ୍ଦ ବୋଷଙ୍କୁ ଭେଟିଛନ୍ତି। ପୋଲିସ ଅପରାଧୀମାନଙ୍କୁ ସୁରକ୍ଷା ଦେବାକୁ ଉଦ୍ୟମ କରୁଥିବା ମନ୍ତ୍ରୀ ଭୌମିକ କହିଛନ୍ତି। ୧୪୪ ଧାରା ଆଳରେ ଭାଜପାର ସତ୍ୟ ଅନୁସନ୍ଧାନକାରୀ ଟିମ୍କୁ ସନ୍ଦେଶଖାଲି ଯିବାକୁ ଦିଆଗଲା ନାହିଁ। ଏପରିକି ୨ ଜଣ ମହିଳା ସଦସ୍ୟଙ୍କୁ ଛାଡ଼ିବା ନିମନ୍ତେ ଅନୁରୋଧକୁ ମଧ୍ୟ ପୋଲିସ ପ୍ରତ୍ୟାଖ୍ୟାନ କରିଦେଇଥିଲା ବୋଲି ଭୌମିକ କହିଛନ୍ତି। ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡା ଗଠନ କରିଥିବା ୬ ଜଣିଆ ଫ୍ୟାକ୍ଟ ଫାଇଣ୍ଡିଂ ଟିମ୍ରେ ଅନ୍ୟମାନଙ୍କ ମଧ୍ୟରେ ସୁନୀତା ଡୁଗଲ, କବିତା ପଟିଦାର, ସଙ୍ଗୀତା ଯାଦବ ଏବଂ ବ୍ରିଜ୍ ଲାଲ୍ ରହିଛନ୍ତି।
