ମୁମ୍ବାଇ,୨୫ ।୭: ମହାରାଷ୍ଟ୍ରରେ ରାଜନୈତିକ କଳହ ପରେ ଏକନାଥ ଶିନ୍ଦେଙ୍କ ନେତୃତ୍ୱରେ ସେଠାରେ ସରକାର ଗଠନ ହୋଇ ସାରିଛି । ହେଲେ ଉଦ୍ଧବ ଠାକରେ ସରକାର ଓ ଏକନାଥ ଶିନ୍ଦେଙ୍କ ନେତୃତ୍ୱର ସରକାରଙ୍କ ମଧ୍ୟରେ ଶିବସେନା ନାମକୁ ନେଇ ଲଢେଇ ଜାରି ରହିଛି । ଉଦ୍ଧବ ଠାକରେ ଓ ଏକନାଥ ଶିନ୍ଦେ ଉଭୟେ ଶିବସେନା ନାମ ଓ ନିର୍ବାଚନ ଚିହ୍ନକୁ ନିଜର କରିବାକୁ ଚାହୁଁଛନ୍ତି । ଏହି ଲଢେଇ ମଧ୍ୟରେ ଅସଲ ଶିବସେନା ଚିହ୍ନ଼ ପାଇଁ ନିର୍ବାଚନ କମିଶନରେ ଚାଲିଥିବା ପ୍ରକ୍ରିୟା ବିରୋଧରେ ଉଦ୍ଧବ ଠାକରେ ଗ୍ରୁପ ସୁପ୍ରିମକୋର୍ଟ ପହଞ୍ଚି ଯାଇଛନ୍ତି ।
ଠାକରେ ଗ୍ରୁପ ନିର୍ବାଚନ କମିଶନଙ୍କ ଦ୍ୱାରା ଚାଲିଥିବା ପ୍ରକ୍ରିୟାକୁ ଅଟକାଇବା ପାଇଁ ସୁପ୍ରିମକୋର୍ଟରେ ଅପିଲ କରିଛନ୍ତି । ସେମାନେ କହିଛନ୍ତି ଯେପର୍ଯ୍ୟନ୍ତ ଶିନ୍ଦେ ଗ୍ରୁପର ବିଧାୟକଙ୍କ ଅଯୋଗ୍ୟତାକୁ ନେଇ କୌଣସି ନିଷ୍ପତ୍ତି ନିଆଯାଇ ନାହିଁ, ନିର୍ବାଚନ କମିଶନ ସେପର୍ଯ୍ୟନ୍ତ କୌଣସି କାର୍ଯ୍ୟ କରିବା ଉଚିତ ନୁହେଁ ।
ସୂଚନାଯୋଗ୍ୟ, ସୁପ୍ରିମକୋର୍ଟ ପୂର୍ବରୁ ରାଜ୍ୟରେ ଅସଲ ଶିବସେନାକୁ ନେଇ ଚାଲିଥିବା ଲଢେଇ ନିର୍ବାଚନ କମିଶନଙ୍କ ପାଖରେ ପହଞ୍ଚିଥିଲା । ଏହାପରେ ନିର୍ବାଚନ କମିଶନ ଉଦ୍ଧବ ଠାକରେ ଓ ଏକନାଥ ଶିନ୍ଦେ ଗ୍ରୁପକୁ ଶିବସେନାର ବହୁମତ ସାବ୍ୟସ୍ତ କରିବା ଲାଗି କହିଥିଲେ । ନିର୍ବାଚନ କମିଶନ ଏକନାଥ ଶିନ୍ଦେ ଗ୍ରୁପ ଓ ଉଦ୍ଧବ ଠାକରେ ଗ୍ରୁପକୁ ୮ ଅଗଷ୍ଟ ଦିନ ୧ଟା ସୁଦ୍ଧା ଜବାବ ଦେବାକୁ ସମୟ ଦେଇଛନ୍ତି । ଏହାପରେ ନିର୍ବାଚନ କମିଶନ ଶିବସେନା ଉପରେ ନିଜର ଦାବି ଉପସ୍ଥାପନ କରିବା ସହ ବିବାଦୀୟ ଘଟଣାକୁ ନେଇ ବିଚାର କରିବ ।
