ଆନନ୍ଦପୁର,୨୬ା୩(ସ୍ବ.ପ୍ର.): ଆନନ୍ଦପୁର ପୌରପାଳିକାର ନୂତନ ପୌରାଧ୍ୟକ୍ଷା ଭାବେ ରଜନୀରାଣୀ ଖଟୁଆ ନିର୍ବାଚିତ ହୋଇଛନ୍ତି। ଆନନ୍ଦପୁର ପୌରପରିଷଦ ଅଧ୍ୟକ୍ଷ ପଦବୀ ପାଇଁ ୫ ଜଣ ପ୍ରାର୍ଥୀ ନିର୍ବାଚନ ମଇଦାନକୁ ଓହ୍ଲାଇଥିଲେ। ପୌରପରିଷଦର ମୋଟ୍ ୩୦୬୬୭ ଭୋଟରଙ୍କ ମଧ୍ୟରୁ ୧୧୯୭୪ ଜଣ ପୁରୁଷ ଭୋଟର ଓ ୧୧୪୪୦ ଜଣ ମହିଳା ଭୋଟର ମୋଟ ୨୩୪୧୪ ଭୋଟର ନିଜର ମତଦାନ ସାବ୍ୟସ୍ତ କରିଥିଲେ। ବିଜେଡି ପକ୍ଷରୁ ପୌରାଧ୍ୟକ୍ଷା ପ୍ରାର୍ଥୀ ହୋଇଥିବା ରଜନୀରାଣୀ ଖଟୁଆ ୧୬ଟି ଓ୍ବାର୍ଡରୁ ୧୧୫୦୪ ଖଣ୍ଡ ଭୋଟ୍ ପାଇଥିବାବେଳେ ଭାଜପା ପ୍ରାର୍ଥିନୀ ଜ୍ୟୋତିର୍ମୟୀ ଖଟୁଆ ୯୯୩୫ ଖଣ୍ଡ ଭୋଟ୍ ପାଇଛନ୍ତି। ସେହିପରି କଂଗ୍ରେସର ପୌରାଧ୍ୟକ୍ଷା ପ୍ରାର୍ଥିନୀ ସବିତା ଦାସ ୧୫୧୦ ଖଣ୍ଡ ଭୋଟ୍, ସ୍ବାଧୀନ ପ୍ରାର୍ଥିନୀ ଅଶ୍ୱିନୀ ନାଇକ ୧୫୮ ଖଣ୍ଡ ଭୋଟ୍, ମୋହିନୀ ଦେହୁରୀ ୧୪୭ ଖଣ୍ଡ ଭୋଟ୍ ପାଇଥିବାବେଳେ ନୋଟାକୁ ୧୫୯ ଖଣ୍ଡ ଭୋଟ୍ ଆସିଛି। ବିଜେଡିରୁ ପ୍ରତିଦ୍ୱନ୍ଦ୍ୱିତା କରୁଥିବା ପୌରାଧ୍ୟକ୍ଷା ପ୍ରାର୍ଥିନୀ ରଜନୀରାଣୀ ଖଟୁଆ ଭାଜପା ପ୍ରାର୍ଥିନୀଙ୍କଠାରୁ ୧୫୬୯ ଭୋଟ୍ ବ୍ୟବଧାନରେ ବିଜୟୀ ହୋଇଛନ୍ତି।
