କେନ୍ଦୁଝର,୧୨।୧୦(ସ୍ବ.ପ୍ର.)-ଖଣିଖାଦାନ ସମୃଦ୍ଧ କେନ୍ଦୁଝର ଜିଲାରେ ଥିବା ବହୁ ପୁରୁଣା ଦୁଇ ଏୟାରଷ୍ଟ୍ରିପ୍ ରକ୍ଷଣାବେକ୍ଷଣ ଅଭାବରୁ ଅବହେଳିତ ହୋଇରହିଛି। କେନ୍ଦ୍ର ସରକାର ଉଡାନ ଯୋଜନାରେ ରାଜ୍ୟର ବିଭିନ୍ନ ଏୟାରଷ୍ଟ୍ରିପ୍ର ବିକାଶ ଓ ସମ୍ପ୍ରସାରଣ କରୁଥିବା ବେଳେ ଏହି ଜିଲାର ଏୟାରଷ୍ଟ୍ରିପ୍କୁ ଅଣଦେଖା କରାଯାଇଛି। ଖଣିଖାଦାନ ଲାଗି ବିଶ୍ୱରେ ପରିଚିତି ଲାଭ କରିଥିବା କେନ୍ଦୁଝର ଜିଲାକୁ ବହୁ କମ୍ପାନୀ ପ୍ରତିନିଧି ଯାତାୟାତ କରୁଥିବାରୁ ଏୟାରଷ୍ଟ୍ରିପ୍ର ବିକାଶ ସହ ସମ୍ପ୍ରସାରଣର ଆବଶ୍ୟକତା ରହିଛି। ଫଳରେ ସବୁସ୍ତରର ଲୋକମାନେ ରାଜ୍ୟ ତଥା ଦେଶର ବିଭିନ୍ନ ସ୍ଥାନକୁ ସୁବିଧାରେ ଯିବା ଆସିବା କରିପାରନ୍ତେ। ଏହାସହ ସରକାର ମଧ୍ୟ ଲାଭବାନ ହୋଇପାରନ୍ତେ।
ରାଜାରାଜୁଡା ଅମଳରୁ ସଦର ବ୍ଲକ ରାଇସୁଆଁଠାରେ ଏନ୍ଏଚ୍ ୨୦ ପାର୍ଶ୍ୱରେ ଏକ ଏୟାରଷ୍ଟ୍ରିପ୍ ରହିଥିବା ବେଳେ ଅନ୍ୟଟି ଯୋଡ଼ା ବ୍ଲକର ଟଣ୍ଟୋଠାରେ ଏନ୍ଏଚ୍ ୭୨୦ ପାର୍ଶ୍ୱରେ ରହିଛି। ବହୁ ଉଚ୍ଚମାନର ଲୁହା ଓ ଅନ୍ୟାନ୍ୟ ଖଣିଜପଥର ରହିଥିବାରୁ ଏହି ଜିଲା ଉପରେ ଦେଶ ଓ ବିଦେଶର ଖଣି ସଂସ୍ଥାଙ୍କ ନଜର ରହିଛି । ଏଣୁ ଯାତାୟାତର ସୁବିଧା ପାଇଁ ଏୟାରଷ୍ଟ୍ରିପ୍ର ଆବଶ୍ୟକତା ଅଧିକ ରହିଛି । ସଡ଼କପଥରେ ବହୁ ସଂଖ୍ୟାରେ ଲୁହାପଥର ବୋଝେଇ ଟ୍ରକ୍ ଚଳାଚଳ ଯୋଗୁ ଯାତାୟାତ ଅସୁରକ୍ଷିତ ହୋଇପଡ଼ିଛି। ଏଭଳି ସ୍ଥିତିରେ ଏୟାରଷ୍ଟ୍ରିପ୍ ଅନେକଙ୍କ ପାଇଁ ଆପାତକାଳୀନ ସମୟରେ ସୁବିଧାଜନକ ହୋଇପାରିବ।
ବେସାମରିକ ବିମାନ ଚଳାଚଳ ବିଭାଗ ଅଧୀନରେ ଥିବା ରାଇସୁଆଁ ଏୟାରଷ୍ଟ୍ରିପ୍ ପ୍ରାୟ ୩୮ ଏକର ଜମିରେ ନିର୍ମାଣ କରାଯାଇଛି। ଏଥିରେ ପ୍ରାୟ ୯୨୦ମିଟର ଲମ୍ବ ଓ ୩୦ ମିଟର ଓସାରର ରନ୍ଓ୍ବେ ରହିଛି। ବିଭିନ୍ନ ସମୟରେ ଖଣି କମ୍ପାନୀର ଉଚ୍ଚପଦସ୍ଥ ଅଧିକାରୀ ତଥା ସରକାରଙ୍କ ଉଚ୍ଚପଦସ୍ଥ ଅଧିକାରୀ, ମନ୍ତ୍ରୀ ଓ ଅନ୍ୟାନ୍ୟ ଭିଆଇପିମାନେ ଏଠାରେ ଅବତରଣ କରିଥାନ୍ତି । ଏହାର ରକ୍ଷଣାବେକ୍ଷଣ ପୂର୍ତ୍ତ ବିଭାଗ କରୁଛି । ସେହିପରି ଟଣ୍ଟୋ ଏୟାରଷ୍ଟ୍ରିପ୍ର ରକ୍ଷଣାବେକ୍ଷଣ ଘରୋଇ ଖଣି କମ୍ପାନୀକୁ ଦିଆଯାଇଛି । ଏହି ଏୟାରଷ୍ଟ୍ରିପ୍ ଲମ୍ବ ୧୧୧୨ ମିଟର, ପ୍ରସ୍ଥ ୮୦ ମିଟର। ରନ୍ଓ୍ବେର ଲମ୍ବ ୧୦୬୩ ମିଟର ।
ଖଣି ଅଞ୍ଚଳରୁ ଭୁବନେଶ୍ୱରର ଦୂରତ୍ୱ ପାଖାପାଖି ୩୦୦ କି.ମି. ଓ କେନ୍ଦୁଝରରୁ ଭୁବନେଶ୍ୱର ପାଖାପାଖି ୨୩୦କି.ମି.। ଏହି ଏୟାରଷ୍ଟ୍ରିପ୍ରେ ଯାତାୟାତ ଏବଂ ରୋଗୀ ନେବା ଆଣିବା ପାଇଁ ବେଶ୍ ଉପଯୋଗୀ । ଏଣୁ ଏହାର ସମ୍ପ୍ରସାରଣ କରାଯିବା ଜରୁରୀ ବୋଲି ପାଟଣା ବିଧାୟକ ଜଗନ୍ନାଥ ନାୟକ କହିଛନ୍ତି । ଜିଲାରେ ୧୦୦ରୁ ଊର୍ଦ୍ଧ୍ୱ ଲୁହା, ମାଙ୍ଗାନିଜ, ପାଇରୋଫିଲାଇଟ, କ୍ରୋମାଇଟ ଆଦି ଖଣି ରହିଛି। ଏହି ମାଟିରେ ସୁନା, ବକ୍ସାଇଟ, ପ୍ଲାଟିନମ ଆଦି ମୂଲ୍ୟବାନ ଧାତୁ ଥିବା ଚିହ୍ନଟ ହୋଇଛି। ସମଗ୍ର ବିଶ୍ୱର ନଜର ଏହି ଜିଲା ଉପରେ ଥିବା ବେଳେ ଆଗାମୀ ଦିନରେ ବହୁ ବଡ଼ ବଡ଼ କମ୍ପାନୀ ଏହି ଜିଲାରେ ବ୍ୟବସାୟ କରିବା ପାଇଁ ପୁଞ୍ଜି ବିନିଯୋଗ କରିବା ସମ୍ଭାବନା ରହିଛି। ଏଣୁ ଏୟାରଷ୍ଟ୍ରିପ୍ର ବିକାଶ କରାଗଲେ ରାଜ୍ୟର ସବୁଠାରୁ ଗୁରୁତ୍ୱପୂର୍ଣ୍ଣ ବିମାନବନ୍ଦର ହୋଇପାରନ୍ତା ବୋଲି ଜିଲାର ବିଶିଷ୍ଟ ଶିଳ୍ପପତି ଦେବବ୍ରତ ବେହେରା କହିଛନ୍ତି। ଏନେଇ ଅତିରିକ୍ତ ଜିଲାପାଳ ସନ୍ତୋଷ ନାୟକ କହିଛନ୍ତି, ନିଶ୍ଚିତ ଭାବେ ଏୟାରଷ୍ଟ୍ରିପ୍ଗୁଡିକର ବିକାଶ ହେଲେ ଜିଲାବାସୀ ସୁଫଳ ପାଇପାରିବେ। ସେଭଳି ପ୍ରସ୍ତାବ ଆସିଲେ ନିଶ୍ଚିତ ଭାବେ ପ୍ରଶାସନ ପକ୍ଷରୁ ଉଦ୍ୟମ କରାଯିବ।
