ରାଇକିଆ,୧୭।୮(ଡି.ଏନ.ଏ): ଗତ ୩ ଦିନ ଲଗାଣ ବର୍ଷାରେ କନ୍ଧମାଳ ଜିଲା ରାଇକିଆ ବ୍ଲକ ସୁଗଡବାଡି ପଞ୍ଚାୟତ ମୁରୁଡି କୁପୁଡାଠାରେ ରାଇକିଆ – ଦାରିଙ୍ଗିବାଡିକୁ ସଂଯୋଗ କରୁଥିବା ଅସ୍ଥାୟୀ ପୋଲ ଧୋଇ ହୋଇଯାଇଛି। ଫଳରେ ବାଡାବାଙ୍ଗା, ସିମନବାଡି, ଦାରୀଙ୍ଗିବାଡି, ବ୍ରାହ୍ମଣୀଗାଁ ଅଞ୍ଚଳକୁ ଯାତାୟାତ ସମ୍ପୂର୍ଣ ବନ୍ଦ ରହିଛି । ରାଇକିଆ ସହର ଉପରେ ନିର୍ଭର କରୁଥିବା ୧୦ରୁ ଊଦ୍ଧର୍ବ ଗ୍ରାମବାସୀ ଅସୁବିଧାର ସମ୍ମୁଖୀନ ହେଉଛନ୍ତି। ଏପରିକି ଏହିସବୁ ଗ୍ରାମବାସୀଙ୍କ ଜୀବନ ଜୀବିକା ମଧ୍ୟ ପ୍ରଭାବିତ ହୋଇଛି। ପରିସ୍ଥିତି ଏପରି ଉପୁଜିଛି ଅଟୋ, ବାଇକ୍ ମଧ୍ୟ ଚଳାଚଳ ପାଇଁ କୌଣସି ବିକଳ୍ପ ନାହିଁ। ଏହି ରାସ୍ତାରେ ପ୍ରତ୍ୟେକ ଦିନ ପର୍ଯ୍ୟଟକଙ୍କ ଦାରିଙ୍ଗିବାଡ଼ି ଚଳ ପ୍ରଚଳ ରହୁଥିବା ବେଳେ ତାହା ମଧ୍ୟ ପ୍ରଭାବିତ ହୋଇଛ। ଅତି ଜରୁରୀ କାର୍ଯ୍ୟରେ ଲୋକେ ଜୀବନକୁ ବିପଦରେ ପକାଇ ପାଣିରେ ପଶି ଯାତାୟାତ କରୁଛନ୍ତି। ଏ ନେଇ ପୂର୍ତ୍ତ ବିଭାଗ ଯନ୍ତ୍ରୀ କେଦାର ନାୟକ କହିଛନ୍ତି, ଦୁଇ ଦିନ ହେଲା ରିଷ୍ଟୋରେଶନ ପାଇଁ ଉଦ୍ୟମ ଆରମ୍ଭ କରାଯାଇଥିଲେ ମଧ୍ୟ ଜଳ ସ୍ରୋତ ଅଧିକା ଥିବାରୁ କାମ କରିବା ସମ୍ଭବପର ହୋଇପାରୁନାହିଁ । ପାଣି କମିଲେ ତୁରନ୍ତ କାର୍ଯ୍ୟକ୍ଷମ କରାଯିବ । ଅନ୍ୟ ପକ୍ଷରେ ଚାରିବର୍ଷ ହେଲା ଏହି ପୋଲ ଧୋଇ ଯାଇଥିଲେ ମଧ୍ୟ ଏହାର ସ୍ଥାୟୀ ପ୍ରତିକାର କରାଯାଉନଥିବାରୁ ପ୍ରତ୍ୟେକ ବର୍ଷା ଦିନେ ଏହିପରି ପରିସ୍ଥିତି ଉପୁଜିଛି।
