ନୂଆଦିଲ୍ଲୀ,୩୧।୭: ଲୋକସଭାର ବିରୋଧୀ ଦଳନେତା ରାହୁଲ ଗାନ୍ଧୀ ପୁଣିଥରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କୁ କଡ଼ା ସମାଲୋଚନା କରିଛନ୍ତି । ଶୁକ୍ରବାର ସେ କହିଛନ୍ତି ଯେ, ମୋଦି ଓ ଶାହା ‘ଭାରତର ଅତୀତ’, ତେଣୁ ସେମାନେ ‘ଭାରତର ଭବିଷ୍ୟତ’ ଯୁବପିଢ଼ିଙ୍କ ସହ କିପରି ବ୍ୟବହାର କରୁଛନ୍ତି, ସେଥିପ୍ରତି ସତର୍କ ରହିବା ଉଚିତ।
ରାହୁଲ ଗାନ୍ଧୀ ଦିଲ୍ଲୀରେ ୨୦ ଜୁଲାଇରେ ଆନ୍ଦୋଳନରତ ଛାତ୍ରଛାତ୍ରୀଙ୍କ ବିରୋଧରେ ପୋଲିସ କାର୍ଯ୍ୟାନୁଷ୍ଠାନକୁ ନେଇ ଲଗାତାର କେନ୍ଦ୍ର ସରକାରଙ୍କୁ ଘେରୁଛନ୍ତି। ଏହା ପୂର୍ବରୁ ୨୯ ଜୁଲାଇରେ ଲୋକ ସଭାରେ ରାହୁଲ ଗାନ୍ଧୀ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କ ଇସ୍ତଫା ଦାବି କରିଥିଲେ । ତାଙ୍କ ଅଭିଯୋଗ ଥିଲା ଯେ, ଯୁବପିଢ଼ିଙ୍କ ସ୍ୱରକୁ ଦମନ କରିବା ପାଇଁ ସରକାର କଠୋର ପଦକ୍ଷେପ ନେଉଛନ୍ତି । ଶୁକ୍ରବାର ଦିନ ସୋସିଆଲ ମିଡିଆ ପ୍ଲାଟଫର୍ମ X ରେ ଏକ ପୋଷ୍ଟ ସେୟାର କରି ରାହୁଲ ଗାନ୍ଧୀ କହିଛନ୍ତି, “ମୋଦି ଏବଂ ଅମିତ ଶାହା Gen Z ଙ୍କୁ ଭୟଭୀତ କରି ଚୁପ୍ କରିପାରିବେ ନାହିଁ। ପ୍ରଥମେ, ତୁମେ ସେମାନଙ୍କର ହାଡ଼ ଭାଙ୍ଗି ଦେଇଥିଲ । ଏବେ, ତୁମେ ସେମାନଙ୍କ ବିରୁଦ୍ଧରେ ଏଫଆଇଆର ପଞ୍ଜିକରଣ କରୁଛ ଏବଂ ସେମାନଙ୍କର ସୋସିଆଲ ମିଡିଆ ଆକାଉଣ୍ଟଗୁଡ଼ିକୁ ହଟାଇ ଦେଉଛ ।”
ବୁଧବାର ଦିନ ରାହୁଲ ଗାନ୍ଧୀ କହିଛନ୍ତି ଯେ, ଦିଲ୍ଲୀରେ ଛାତ୍ରମାନଙ୍କ ଉପରେ ହୋଇଥିବା ‘ନିଷ୍ଠୁରତା’ ପାଇଁ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଦାୟୀ ଏବଂ ତାଙ୍କୁ ତାଙ୍କ ପଦରୁ ବହିଷ୍କାର କରାଯିବା ଉଚିତ। ସେ ସୁପ୍ରିମକୋର୍ଟଙ୍କ ତତ୍ତ୍ୱାବଧାନରେ ଏକ ଉଚ୍ଚ କ୍ଷମତାସମ୍ପନ୍ନ କମିଟି ଦ୍ୱାରା ଏହି ଘଟଣାର ତଦନ୍ତ କରିବାକୁ ମଧ୍ୟ ଦାବି କରିଥିଲେ । ଅମିତ ଶାହା ସଂସଦରେ ଉପସ୍ଥିତ ହୋଇ ଏହି ପ୍ରସଙ୍ଗରେ ସ୍ପଷ୍ଟୀକରଣ ଦେବାକୁ କାହିଁକି ଭୟ କରୁଛନ୍ତି ବୋଲି ରାହୁଲ ଗାନ୍ଧୀ ପ୍ରଶ୍ନ କରିଥିଲେ।
