କୋଲକାତା,୧୨।୬: ଟିଏମସିରେ ଆରମ୍ଭ ହୋଇଥିବା ବିଭାଜନ ଏବେ ବିସ୍ଫୋରକ ରୂପ ନେଇଛି। ଦଳର ୨୦ ଜଣ ଏମ୍ପି ବିଦ୍ରୋହ ଘୋଷଣା କରିଥିବା କୁହାଯାଉଥିଲେ ହେଁ ଏବେ ଗୋଟିଏ ସାଂଘାତିକ ତଥ୍ୟ ସାମ୍ନାକୁ ଆସିଛି।
ଦିଦିଙ୍କ ହାତ ଛାଡିଦେଲେ କି ରଚନା ବାନାର୍ଜୀ। ପଶ୍ଚିମବଙ୍ଗର ସାଂସଦ ତଥା ଓଲିଉଡ଼ ସହ ଟଲିଉଡ଼ର ନାମକରା ହିରୋଇନ ରଚନା ଆଜି ଏମିତି ନିଷ୍ପତ୍ତି ନେଇଛନ୍ତି ଯାହାକୁ ନେଇ ଚର୍ଚ୍ଚା ଜୋର ଧରିଛି । ଦିନେ ନିଜର ଲୋକପ୍ରିୟ ସୋ ଦିଦି ନମ୍ବର ୱାନ ମାଧ୍ୟମରେ ପଶ୍ଚିମବଙ୍ଗବାସୀଙ୍କ ହୃଦୟ ଜିତିଥିବା ରଚନା ଆଜି ଦିଦିଙ୍କ ହାତ ଛାଡିଦେଇଛନ୍ତି।
ତୃଣମୂଳ କଂଗ୍ରେସ ମୁଖ୍ୟ ମମତା ବାନାର୍ଜୀଙ୍କୁ ଆଜି ଏକ ବଡ଼ ଝଟକା ଲାଗିଛି। ଦଳର ୨୦ ଜଣ ଏମ୍ପି ଏନଡିଏରେ ଯୋଗଦେବାକୁ ଇଚ୍ଛା ପ୍ରକାଶ କରି ଲୋକସଭା ବାଚସ୍ପତି ଓମ୍ ବିର୍ଲାଙ୍କୁ ଏକ ଚିଠି ଲେଖିଛନ୍ତି। ପିଟିଆଇ ଅନୁଯାୟୀ, ଏମ୍ପି କାକୋଲି ଦସ୍ତିଦାର କହିଛନ୍ତି ଯେ ତାଙ୍କ ସମେତ ୨୦ ଜଣ ଏମ୍ପି ବିଜେପି ନେତୃତ୍ୱାଧୀନ ଏନଡିଏକୁ ସମର୍ଥନ କରିବାକୁ ନିଷ୍ପତ୍ତି ନେଇଛନ୍ତି। କାକୋଲି ଦସ୍ତିଦାର କହିଛନ୍ତି ଯେ ସେମାନେ ପଶ୍ଚିମବଙ୍ଗ ନିର୍ବାଚନ ଫଳାଫଳକୁ ଗ୍ରହଣ କରନ୍ତି ଏବଂ ବିଶ୍ୱାସ କରନ୍ତି ଯେ ଏନଡିଏ ସହିତ ସେମାନଙ୍କର ରାଜନୈତିକ ଭବିଷ୍ୟତ ଅଧିକ ସୁରକ୍ଷିତ। ପୂର୍ବରୁ, ଦଳ ଭିତରେ ବିଭାଜନ ହେବାର କଳ୍ପନାଜଳ୍ପନା ମଧ୍ୟରେ, ସୁଖେନ୍ଦୁ ରାୟ ଏବଂ କାକୋଲି ଦସ୍ତିଦାରଙ୍କ ନେତୃତ୍ୱରେ ୧୬ ଜଣ ଟିଏମସି ଏମ୍ପି ଶୁଭେନ୍ଦୁ ଅଧିକାରୀଙ୍କୁ ସାକ୍ଷାତ କରିଥିଲେ।
ଯଦି ଦୁଇ-ତୃତୀୟାଂଶ ବିଦ୍ରୋହୀ ତୃଣମୂଳ କଂଗ୍ରେସ (ଟିଏମସି) ବିଧାୟକ ଦଳ ଛାଡିଦିଅନ୍ତି, ତେବେ ଦଳ ପରିବର୍ତ୍ତନ ବିରୋଧୀ ଆଇନ ସେମାନଙ୍କ ଉପରେ ପ୍ରଯୁଜ୍ୟ ହେବ ନାହିଁ। ସମ୍ବିଧାନର ଦଶମ ଅନୁସୂଚୀ ଅନୁଯାୟୀ, ଏହି ବ୍ୟବସ୍ଥା କାର୍ଯ୍ୟକାରୀ ହେବା ପାଇଁ ଲୋକସଭାରେ ଅତି କମରେ ୧୯ ଜଣ ଟିଏମସି ଏମ୍ପିଙ୍କୁ ଦଳ ଛାଡିବାକୁ ପଡିବ।
ଏହି ଏମ୍ପିମାନେ ଲୋକସଭାରେ ପୃଥକ ଆସନ ବ୍ୟବସ୍ଥା ପାଇଁ ବାଚସ୍ପତିଙ୍କୁ ମଧ୍ୟ ଚିଠି ଲେଖିଛନ୍ତି। ଶୁଭେନ୍ଦୁଙ୍କୁ ଭେଟିଥିବା ଏମ୍ପିମାନେ ହେଲେ କାକୋଲି ଦସ୍ତିଦାର, ପାର୍ଥ ଭୌମିକ, ଜଗଦୀଶ ବାସୁନିୟା, ଦେବ, ଶତାବ୍ଦୀ ରୟ, ରଚନା ବାନାର୍ଜୀ, କାଲିପଦା ସୋରେନ୍, ଅରୁପ ଚକ୍ରବର୍ତ୍ତୀ, ଅସିତ ମଲ, ଶତ୍ରୁଘ୍ନ ସିହ୍ନା, ପ୍ରସୁନ୍ ବାନାର୍ଜୀ, ପ୍ରତିମା ମଣ୍ଡଳ ଏବଂ ବାପା ହାଲିଦାର।
ରଚନା ବାନାର୍ଜୀଙ୍କ ରାଜନୈତିକ କ୍ୟାରିୟର ବାବଦରେ କହିବାକୁ ଗଲେ ସେ ୨୦୨୪ ମସିହାରେ ତୃଣମୂଳ କଂଗ୍ରେସରେ ଯୋଗ ଦେଇଥିଲେ। ସେ ୨୦୨୪ ମସିହାର ସାଧାରଣ ନିର୍ବାଚନରେ ହୁଗଲି ଲୋକ ସଭା ନିର୍ବାଚନମଣ୍ଡଳୀରୁ ଭାରତୀୟ ଜନତା ପାର୍ଟିର ସାଂସଦ ଲକେଟ ଚାଟାର୍ଜୀଙ୍କ ବିପକ୍ଷରେ ପ୍ରତିଦ୍ୱନ୍ଦ୍ୱିତା କରିଥିଲେ ଏବଂ ୭୬,୮୫୩ ଭୋଟ ବ୍ୟବଧାନରେ ନିର୍ବାଚନରେ ବିଜୟୀ ହୋଇଥିଲେ।
