କାଳିଆପାଣି,୩୦।୧୦(ଡି.ଏନ.ଏ.): ଲୋକଙ୍କୁ ଶୁଦ୍ଧ ପାନୀୟ ଜଳ ଯୋଗାଇ ଦେବାକୁ ସରକାରଙ୍କ ପ୍ରାଥମିକତା ରହିଛି। ହେଲେ ତାହା ଲୋକଙ୍କ ନିକଟରେ ପହଞ୍ଚି ପାରୁନାହିଁ। ଫଳରେ ଲୋକେ ଚୁଆପାଣିରେ ଶୋଷ ମେଣ୍ଟାଉଛନ୍ତି। ଯାଜପୁର ଜିଲା ସୁକିନ୍ଦା ବ୍ଲକ କଅଁସ ପଞ୍ଚାୟତର ଟିକରପଡ଼ା ଗ୍ରାମରେ ଏପରି ଦୃଶ୍ୟ ଦେଖିବାକୁ ମିଳିଛି। ମାଓବାଦୀଙ୍କ ଗଡ଼ ରହିଥିବା ଏହି ଗ୍ରାମରେ ୬୦ ପରିବାର ବସବାସ କରୁଛନ୍ତି। ପାହାଡ଼ ଘେରା ଟିକରପଡ଼ା ଗାଁକୁ ସଡ଼କ ନ ଥିବାରୁ ମାଓବାଦୀ ସେ ସମୟରେ କ୍ୟାମ୍ପ କରି ରହୁଥିଲେ। ଏହାକୁ ଦେଖି ସେ ଅଞ୍ଚଳକୁ ରାସ୍ତା କରାଯାଇଥିଲା। ଟିକରପଡ଼ା ଉପରସାହିରେ ୩୭ ପରିବାର ଓ ତଳସାହିରେ ୨୩ ପରିବାର ଅଛନ୍ତି। ଉପରସାହିରେ ୨୦୧୮ରେ ସ୍କୁଲ ନିର୍ମାଣ କରାଯାଇଥିବା ବେଳେ ଗୋଟିଏ ନଳକୂପ ଖୋଳାଯାଇଛି। ହେଲେ ଏହି ନଳକୂପରେ ଜାନୁୟାରୀରୁ ଜଳସଙ୍କଟ ହୋଇଥାଏ। ଅନ୍ୟପଟେ ତଳସାହିରେ ଏକ ନଳକୂପ ପରିତ୍ୟକ୍ତ ହୋଇ ପଡ଼ିଥିବା ଅଭିଯୋଗ ହୋଇଛି। ତଳସାହିରେ ଲୋକେ ବର୍ଷ ତମାମ ପାନୀୟ ଜଳ ପାଇଁ ଚୁଆ ଉପରେ ନିର୍ଭର କରୁଛନ୍ତି। ନିକଟରେ ବୋହିଯାଇଥିବା ଝରଣା କଡ଼ରେ ଏକ ଗାତ ଖୋଳି ସେଥିରୁ ବାହାରୁଥିବା ପାଣି ବ୍ୟବହାର କରୁଛନ୍ତି। ତେବେ ଚୁଆରେ ଗଛର ପତ୍ର ପଡ଼ି ପତ୍ରପଚି ଯାଉଥିବାରୁ ସେ ପାଣିକୁ ବ୍ୟବହାର କରି ବହୁ ଦୁରାରୋଗବ୍ୟାଧିରେ ପୀଡ଼ିତ ହେଉଛନ୍ତି। ଏପରି କି ଚୁଆ ପାଣି ଶୁଖିଯିବା ପରେ ନାଳର ପାଣି ବ୍ୟବହାର କରିବାକୁ ଗ୍ରାମବାସୀ ବାଧ୍ୟ ହେଉଛନ୍ତି। ଗ୍ରାମର ନାରାୟଣ ସଏ, ତିରିଙ୍ଗ ମୁଣ୍ଡା ଓ ନରେନ ସଏ ପ୍ରମୁଖ ଲୋକପ୍ରତିନିଧିଙ୍କୁ ଭେଟି ପାନୀୟ ଜଳ ଯୋଗାଣ କରିବାକୁ ଅନୁରୋଧ କରିଥିଲେ ମଧ୍ୟ ତାହା ସମାଧାନ ହୋଇ ନ ଥିବା ଅଭିଯୋଗ କରିଛନ୍ତି। ତୁରନ୍ତ ସମାଧାନ ନ ହେଲେ ଗ୍ରାମବାସୀ ଜିଲାପାଳଙ୍କ ଦ୍ୱାରସ୍ଥ ହେବେ ବୋଲି ପ୍ରକାଶ କରିଛନ୍ତି। ଏ ସମ୍ପର୍କରେ ପ୍ରତିକ୍ରିୟା ଲାଗି ସୁକିନ୍ଦା ଭାରପ୍ରାପ୍ତ ବିଡିଓ ମହାପ୍ରସାଦ ମିଶ୍ରଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ତାହା ସମ୍ଭବ ହୋଇ ପାରିନାହିଁ।
