ଚଣ୍ଡିଗଡ଼,୧୦ ।୩: ପଞ୍ଜାବ ବିଧାନସଭା ନିର୍ବାଚନରେ ପରାଜୟକୁ ସ୍ୱିକାର କରି ନେଇଛି କଂଗ୍ରେସ । ମୁଖ୍ୟମନ୍ତ୍ରୀ ଚରଣଜିତ ସିଂ ଚନ୍ନି ହାରିବା ପରେ ଦଳିୟକର୍ମୀଙ୍କୁ ଧନ୍ୟବାଦ ଦେବା ସହ ପଞ୍ଜାବବାସୀଙ୍କ ନିଷ୍ପତ୍ତିକୁ ଗ୍ରହଣ କରି ନେଇଛନ୍ତି । ସେ ଦୁଇଟି ଯାକ ଆସନରୁ ପରାଜୟକୁ ସ୍ୱିକାର କରିଛନ୍ତି । ଏବେ ପଞ୍ଜାବରେ କଂଗ୍ରେସର ଗଡ ଭାଙ୍ଗି ଯାଇଥିବା ବେଳେ ଆମ ଆଦମୀ ପାର୍ଟି(ଏଏପି) ପଞ୍ଜାବରେ ନୂଆ ସରକାର ଗଠନ କରିବାକୁ ଲାଗି ପଡିଲାଣି । ହାରିବା ପରେ ମୁଖ୍ୟମନ୍ତ୍ରୀ ଚରଣଜିତ ସିଂ ଚନ୍ନି ପ୍ରଥମକରି ଟୁଇଟ୍ କରି କହିଛନ୍ତି, ମୁଁ ପଞ୍ଜାବବାସୀଙ୍କ ନିଷ୍ପତ୍ତିକୁ ବିନମ୍ରତାର ସହ ଗ୍ରହଣ କରୁଛି । ଏହାସହ ଆମ ଆଦମୀ ପାର୍ଟି(ଏଏପି) ଓ ଏହାର ମୁଖ୍ୟମନ୍ତ୍ରୀ ପ୍ରାର୍ଥୀ ଭଗୱନ୍ତ ମାନଙ୍କୁ ତାଙ୍କ ବିଜୟକୁ ନେଇ ଶୁଭେଚ୍ଛା ଜଣାଉଛି । ମୋର ଭରସା ରହିଛି କି ମାନ ଲୋକଙ୍କ ଆଶାକୁ ନିଶ୍ଚିତ ଭାବେ ପୂରଣ କରିବେ ।
ସୂଚନାଯୋଗ୍ୟ, ପଞ୍ଜାବ ବିଧାନସଭାର ମୋଟ ୧୧୭ ଆସନରୁ ଏଏପି ଖାତାକୁ ୯୨ଟି ଆସନ ଯାଇଥିବା ଲକ୍ଷ୍ୟ କରାଯାଉଥିବା ବେଳେ କଂଗ୍ରେସକୁ ୧୮ରେ ସନ୍ତୁଷ୍ଟ ହେବାକୁ ପଡିପାରେ । ସେହିପରି ଅକାଳି ଦଳ ମେଣ୍ଟକୁ ୪ ଓ ସ୍ୱାଧୀନଙ୍କୁ ୩ଟି ଆସନ ମିଳିପାରେ ।
