ଛତ୍ରପୁର,୧୦ା୧(ଡି.ଏନ୍.ଏ.): ଛତ୍ରପୁର ତହସିଲ ଅଧୀନ କାଳିପଲ୍ଲୀଠାରେ ଟାଟା ଇଣ୍ଡଷ୍ଟ୍ରିଆଲ ପାର୍କ ପରିସରରେ ସ୍ମାର୍ଟକେମ୍ ଟେକ୍ନୋଲଜି କମ୍ପାନୀ ସ୍ଥାପନକୁ ବିରୋଧ ହେବାରୁ କାମ ବନ୍ଦ ରହିଛି । ଏହି ସାର କାରଖାନା ସ୍ଥାପନକୁ ପୂର୍ବଭଳି ବିରୋଧ ଜାରି ରହିବ ବୋଲି ଗାଁ କମିଟି ବୈଠକରେ ନିଷ୍ପତ୍ତି ହୋଇଛି । ଅନ୍ୟପକ୍ଷରେ ଆନ୍ଦୋଳନକାରୀଙ୍କ ମଧ୍ୟରୁ କେତେଜଣଙ୍କୁ ମୁମ୍ବାଇସ୍ଥିତ ତାଲୋଜା ପ୍ଲାଣ୍ଟ ପରିଦର୍ଶନ ପାଇଁ ପଠାଇବାକୁ ଗାଁ କମିଟିକୁ ଉପଜିଲାପାଳଙ୍କ ପକ୍ଷରୁ ଗତ ୩୦ ତାରିଖରେ ପ୍ରସ୍ତାବ ଦିଆଯାଇଥିଲା । ସେଠାକୁ କେହି ଯିବେନି ବୋଲି ମଧ୍ୟ ଉକ୍ତ ଆଲୋଚନା ବୈଠକରେ ନିଷ୍ପତ୍ତିି ହୋଇଛି । ଆସନ୍ତା ୧୦ ଦିନ ମଧ୍ୟରେ କମ୍ପାନୀ ଏଠାରୁ ଯନ୍ତ୍ରପାତି ଓ ଅନ୍ୟାନ୍ୟ ସରଞ୍ଜାମ ସ୍ଥାନାନ୍ତର କରିବାକୁ ଦାବି ହୋଇଛି । ଏ ସମ୍ପର୍କରେ ଛତ୍ରପୁର ଉପଜିଲାପାଳଙ୍କୁ ଲିଖିତ ଜଣାଇ ଦିଆଯାଇଥିବା କାଳିପଲ୍ଳୀ ଗ୍ରାମ୍ୟ କମିଟି ସଭାପତି ବି.ମୋହନ ପାତ୍ର ସୋମବାର ସୂଚନା ଦେଇଛନ୍ତି।
ସେପଟେ ଉକ୍ତ କମ୍ପାନୀ ବିରୋଧରେ ଭାରତୀୟ ବିକାଶ ପରିଷଦ ପକ୍ଷରୁ ହାଇକୋର୍ଟରେ ରିଟ୍ ପିଟିଶନ ଦାଖଲ ହୋଇଛି । ତେଣୁ କମ୍ପାନୀ ସ୍ଥାପନ କାର୍ଯ୍ୟ ଆରମ୍ଭ ନେଇ ଅନିଶ୍ଚିତତା ଦେଖାଦେଇଛି । ସୂଚନାେଯୋଗ୍ୟ, ପୂର୍ବରୁ ଏହି କମ୍ପାନୀ କାର୍ଯ୍ୟ ଆରମ୍ଭ ନେଇ ଛତ୍ରପୁର ଉପଜିଲାପାଳଙ୍କ ଅଧ୍ୟକ୍ଷତାରେ ଏକ ତ୍ରିପାକ୍ଷିକ ଆଲୋଚନା ବୈଠକରୁ କୌଣସି ନିଷ୍କର୍ସ ବାହାରି ପାରି ନ ଥିଲା । ଏପରିକି ପରେ ଗାଁରେ ପ୍ରଶାସନିକ ଅଧିକାରୀମାନଙ୍କ ଦ୍ୱାରା ହୋଇଥିବା ଆଲୋଚନା ବୈଠକ ମଧ୍ୟ ବିଫଳ ହୋଇଥିଲା । କମ୍ପାନୀ ହେଲେ ସେଥିରୁ ନିର୍ଗତ ହେବାକୁ ଥିବା ବିଷାକ୍ତ ଗ୍ୟାସରେ କାଳିପଲ୍ଳୀ, ଚମାଖଣ୍ଡି ଆଦି ପଞ୍ଚାୟତର ୨୦ ଖଣ୍ଡ ଗାଁର ଲୋକେ ପ୍ରଭାବିତ ହେବେ। ଏଥିସହ ବିନା ଜନଶୁଣାଣୀରେ ଏହି କାରଖାନା ପ୍ରତିଷ୍ଠା ହେଉଥିବାରୁ ସ୍ଥାନୀୟ ଲୋକେ ବିରୋଧ କରିଥିଲୋ ।
