ଭବାନୀପାଟଣା,୮।୪(ଉତ୍ତମ କୁମାର ଦାଶ): ନିର୍ବାଚନ ପରେ ନିର୍ବାଚନ ଆସୁଛି। ପ୍ରତିଶ୍ରୁତି ପରେ ପ୍ରତିଶ୍ରୁତି ମିଳୁଛି। ହେଲେ ସମାଧାନ ହେଉ ନାହିଁ। ଏପରି ଏକ ଉଦାହରଣ ଭାବେ କଳାହାଣ୍ଡି ଜିଲା କଲମପୁର ବ୍ଲକ ଖଣ୍ଡି ଡଙ୍ଗରୀଗୁଡା ହାତୀ ନଦୀଘାଟରେ ପୋଲ ନିର୍ମାଣ କାମରେ ଦେଖିବାକୁ ମିଳିଛି। ଗତ ୨୦୧୯ ସାଧାରଣ ନିର୍ବାଚନ ବେଳେ ଭାଜପା ଏମପି ବସନ୍ତ ପଣ୍ଡା ଏହି ପୋଲ ନିର୍ମାଣ ପାଇଁ ପ୍ରତିଶ୍ରୁତି ଦେଇଥିଲେ। ପରବର୍ତ୍ତି ୨୦୨୨ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ସମୟରେ ପୂର୍ବତନ ମନ୍ତ୍ରୀ ତଥା ବିଜୁ ଜନତା ଦଳର ଜିଲା ସଭାପତି ପୁଷ୍ପେନ୍ଦ୍ର ସିଂଦେଓ ପୋଲ ନିର୍ମାଣ ପାଇଁ ପ୍ରତିଶ୍ରୁତି ଦେଇଥିଲେ। ନିର୍ବାଚନ ପରେ ଏମପି ପଣ୍ଡା ଗ୍ରାମବାସୀଙ୍କ ଦ୍ୱାରା ସମ୍ବର୍ଦ୍ଧିତ ସମୟରେ ପୁନଃ ପୋଲ ନିର୍ମାଣ ପ୍ରସ୍ତାବ ଉପରେ ମତବ୍ୟକ୍ତ କରିଥିଲେ। ଯାହା କେନ୍ଦ୍ରୀୟ ଅନୁଦାନରୁ ନିର୍ମାଣ ହେବ ବୋଲି ଘୋଷଣା କରିଥିଲେ। ପରବର୍ତ୍ତୀ ସମୟରେ ପୋଲ ନିର୍ମାଣ ପାଇଁ ମାଟି ପରୀକ୍ଷା ସହ ଅନ୍ୟ କିଛି ପ୍ରାଥମିକ ପଦକ୍ଷେପ ନିଆଯାଇଥିଲା। କିନ୍ତୁ ଏଥିମଧ୍ୟରେ ଦୀର୍ଘ ଦିନ ବିତି ସାରିଥିଲେ ମଧ୍ୟ କୌଣସି ପଦକ୍ଷେପ ନିଆଯାଇ ନାହିଁ। ଏହି ପୋଲ ନିର୍ମାଣ ହେଲେ କଲମପୁର ଜୁନାଗଡ ମୁଖ୍ୟ ରାସ୍ତା ସହ ବଙ୍କାପଲା ନିକଟରେ ସଂଯୋଗ ହେବ। ଯାହାଦ୍ୱାରା ଅଞ୍ଚଳବାସୀ ଜୁନାଗଡ, କୋକସରା, ଧର୍ମଗଡ ସମେତ ୨୬ ନଂ. ଜାତୀୟ ରାଜପଥରେ ସଂଯୋଗ ହେଇ ପଡୋଶୀ ନବରଙ୍ଗପୁର ଏବଂ ଛତିଶଗଡ ରାଜ୍ୟ ସହ ଯାତାୟାତର ସୁବିଧା ପାଇ ପାରିବେ। ସେମାନଙ୍କ ଅର୍ଥନୈତୀକ, ସାମାଜିକ ଏବଂ ସାଂସ୍କୃତିକ ବିକାଶ ହେଇ ପାରିବ। ପୁଣି ଶିକ୍ଷା, ସ୍ବାସ୍ଥ୍ୟା କ୍ଷେତ୍ରରେ ଉନ୍ନତି ହେଇ ପାରିବ। କିନ୍ତୁ ଏହି ଆଶା ଏବେ ଆଶାରେ ରହିଯାଇଛି। ଯେଉଁଥି ପାଇଁ ଅଞ୍ଚଳବାସୀଙ୍କ ମଧ୍ୟରେ ଅଶନ୍ତୋଷ ଲାଗି ରହିଛି। ବଡବଡ ନେତା ଆସିଲେ, ଏମ.ପି ଆସିଲେ। ପୋଲ ନିର୍ମାଣର ପ୍ରତିଶ୍ରୁତି ଦେଲେ। କିନ୍ତୁ ପୋଲ ନିର୍ମାଣ ହୋଇ ପାରିଲାନାହିଁ। ଦେଶୀ ଡଙ୍ଗାରେ ଆମେ ନଦୀ ପାର ହେଉଛୁ। କେତେବେଳେ ଡଙ୍ଗା ଦୁର୍ଘଟଣା ଘଟୁଛି। ତେଣୁ ଆମେ ଆଗାମୀ ନିର୍ମାଚନ ସମୟରେ ଭୋଟ ମାଗି ଆସୁଥିବା ନେତାଙ୍କୁ ଉଚିତ ଜବାବ ଦେବୁ ବୋଲି ସ୍ଥାନୀୟ ବାସିନ୍ଦା କହିଛନ୍ତି। ଖଣ୍ଡିଡଙ୍ଗରୀଗୁଡା-ବଙ୍କାପଲା ସଂଯୋଗ ପାଇଁ ହାତୀନଦୀରେ ଏକ ପୋଲ ନିର୍ମାଣ ପାଇଁ ପ୍ରସ୍ତାବ ରହିଛି। ଯାହାର ସ୍ବୀକୃତୀ ପାଇଁ ରାଜ୍ୟସ୍ତରୀୟ ଅଧିକାରୀଙ୍କ ପାଖରେ ରହିଛି। ଆଗାମୀ ଏକମାସ ମଧ୍ୟରେ ସ୍ବୀକୃତୀ ପାଇବା ପରେ ପୋଲ ନିର୍ମାଣର ଆନୁସଙ୍ଗିକ କାର୍ଯ୍ୟ ଆରମ୍ଭ ହେବ ବୋଲି କଳାହାଣ୍ଡି ପୂର୍ତ୍ତ ବିଭାଗ କାର୍ଯ୍ୟ ର୍ନିବାହୀ ଯନ୍ତ୍ରୀ ଇଂ. ପ୍ରକାଶ ଚନ୍ଦ୍ର ବେହେରା କହିଛନ୍ତି।
