ନୂଆଦିଲ୍ଲୀ,୧୨ ।୧: କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରା ମଙ୍ଗଳବାର ତାଙ୍କର ୪୯ ତମ ଜନ୍ମଦିନ ପାଳନ କରୁଛନ୍ତି । ଏବେ ସକ୍ରିୟ ରାଜନୀତିରେ ଥିବା ପ୍ରିୟଙ୍କା ମାତ୍ର ୧୬ ବର୍ଷ ବୟସରେ ଭାଷଣ ଦେଇଥିଲେ । ପ୍ରାୟ ରାଜନୀତିଠାରୁ ଦୂରେଇ ରହୁଥିବାରୁ ସେତେବେଳର ସେହି ଭାଷଣକୁ କେହି ଏତେଟା ଗୁରୁତ୍ୱ ଦେଇ ନ ଥିଲେ । ହେଲେ ଜେଜେମା’ ତଥା ଭାରତର ପୂର୍ବତନ ପ୍ରଧାନମନ୍ତ୍ରୀ ସ୍ୱର୍ଗତା ଇନ୍ଦିରା ଗାନ୍ଧୀଙ୍କର ସେ ଆଉ ଏକ ରୂପ ବୋଲି କୁହାଯାଏ । କେହି କେହି ତାଙ୍କୁ ୨୧ ଶହ ଶତାବ୍ଦୀର ଇନ୍ଦିରା ଗାନ୍ଧୀ ବୋଲି ମଧ୍ୟ କହିଥାଆନ୍ତି । କୁହାଯାଏ ଇନ୍ଦିରା ମଧ୍ୟ ମାତ୍ର ୧୬-୧୭ ବର୍ଷ ବୟସରେ ପ୍ରଥମ ଭାଷଣ ଦେଇଥିଲେ । ତେଣୁ ପ୍ରିୟଙ୍କାଙ୍କର ଇନ୍ଦିରାଙ୍କ ସହ ଖୁବ୍ ସାମଞ୍ଜସ୍ୟ ଥିବା ଆଲୋଚନା ହୁଏ । କିନ୍ତୁ ଏକ ସାକ୍ଷାତ୍କାରରେ ପ୍ରିୟଙ୍କା କହିଥିଲେ ସମସ୍ତେ ଭାବନ୍ତି ମୋର ମୋ ଜେଜେମାଙ୍କ ସହ ଅଧିକ ସାମଞ୍ଜସ୍ୟ ରହିଛି । ହେଲେ ମୋତେ ଲାଗେ ରାହୁଲଙ୍କର ଅଧିକ ସାମଞ୍ଜସ୍ୟ ଜେଜେମା’ଙ୍କ ସହ ରହିଛି ମୋର ସାମଞ୍ଜସ୍ୟ ବରଂ ମୋ ପିତା ରାଜୀବ ଗାନ୍ଧୀଙ୍କ ସହ ରହିଛି । ପ୍ରିୟଙ୍କା ବିଜନେସମ୍ୟାନ ରବର୍ଟ ଭଦ୍ରାଙ୍କୁ ବିବାହ କରିଛନ୍ତି । ହେଲେ ଏହା ପଛର ଏକ କାହାଣୀ ହୁଏତ ଅନେକଙ୍କୁ ଜଣା ନ ଥିବ । ଶୁଣିବାକୁ ମିଳେ ପ୍ରିୟଙ୍କାଙ୍କୁ ମାତ୍ର ୧୩ ବର୍ଷ ବୟସ ହୋଇଥିବା ବେଳେ ଉଭୟଙ୍କର ପ୍ରଥମେ ସାକ୍ଷାତ୍ ହୋଇଥିଲା ଓ ପ୍ରିୟଙ୍କା ପ୍ରଥମେ ବନ୍ଧୁତ୍ୱର ହାତ ବଢାଇଥିଲେ । ଏବେ ପ୍ରିୟଙ୍କା ସକ୍ରିୟ ରାଜନୀତିରେ ଯୋଗ ଦେଇଥିବା ବେଳେ ଦଳ ତାଙ୍କଠାରୁ ବହୁକିଛି ଆଶା କରେ ।
