ବୁଗୁଡ଼ା,୨୧ା୫(ଡି.ଏନ.ଏ.): ପ୍ରଧାନମନ୍ତ୍ରୀ ସଡ଼କ ପାଲଟିଛି ମରଣ ଯନ୍ତା। ଗୁହାରି ଶୁଣିବାକୁ ବୁଗୁଡ଼ାରେ ନାହାନ୍ତି ଅଧିକାରୀ। ଦୀର୍ଘ ଦିନ ହେଲା ସ୍ଥାୟୀ ଅଧିକାରୀ ନଥିବାରୁ ଭୂତ କୋଠି ପାଲଟି ଗଲାଣି ଗ୍ରାମ୍ୟ ଉନ୍ନୟନ ବିଭାଗ କାର୍ଯ୍ୟାଳୟ। ପ୍ରଧାନମନ୍ତ୍ରୀ ସଡ଼କ ଯୋଜନାରେ ବୁଗୁଡ଼ାଠାରୁ ମୋଟାବାଡ଼ି ପର୍ଯ୍ୟନ୍ତ ୧୦ କିଲୋମିଟର ରାସ୍ତା ନିର୍ମାଣ ହୋଇଥିଲା। ତେବେ ୫ ବର୍ଷ ସମ୍ପୂର୍ଣ୍ଣ ନ ହେଉଣୁ ରାସ୍ତା ଅବସ୍ଥା ଖରାପ ହୋଇଗଲା। ବର୍ତ୍ତମାନ କେବଳ ୫ କିଲୋମିଟର ରାସ୍ତାର ମରାମତି ଓ ଉନ୍ନତିକରଣ ହୋଇଥିବା ବେଳେ ବାକି ୫ କିଲୋମିଟର ରାସ୍ତା କାମ ନ କରି ଛାଡି ଦିଆଯାଇଛି। ଫଳରେ ମାଳ ମାଳ ଖାଲଖମାରେ ପରିପୂର୍ଣ୍ଣ ବାରିକପଲ୍ଲୀଠାରୁ ମୋଟାବାଡ଼ି ଯାଏ ରାସ୍ତାରେ ଗାଡି ମଟର ଯିବାତ ଦୂରର କଥା ସାଇକଲ ଗଡ଼ିବା ମଧ୍ୟ କଷ୍ଟକର ହୋଇପଡୁଛି। ବୁଗୁଡ଼ାରୁ ଏହି ରାସ୍ତା ଦେଇ ଭଞ୍ଜନଗର ସବ୍-ଡିଭିଜନ ଯିବାକୁ ୧୨ କିଲୋମିଟର ଦୂରତ୍ୱ କମ୍ ପଡୁଥିବାରୁ ଏହି ରାସ୍ତା ଦେଇ ଅଧିକାଂଶ ଲୋକ ଭଞ୍ଜନଗର, ସୋରଡ଼ା, ଫୁଲବାଣୀ ଆଦି ଦିଗକୁ ଯିବା ପାଇଁ ଚାହୁଁ ଥିଲେ ହେଁ ରାସ୍ତା ଖରାପ ଯୋଗୁ ଲୋକେ ନାନା ଅସୁବିଧାର ସମ୍ମୁଖୀନ ହେଉଛନ୍ତି। ଏହା ବ୍ୟତୀତ ମୋଟାବାଡ଼ି, ଝାଟିକା ବାଡ଼ି, ଠଣାପଲ୍ଲୀ, ନାଗିରି ଆଦି ବିଭିନ୍ନ ଗ୍ରାମର ଶହ ଶହ ଲୋକ ବିଭିନ୍ନ କାମରେ ବୁଗୁଡ଼ା ଆସୁଥିବା ବେଳେ ଅନେକ ଛାତ୍ରୀଛାତ୍ର ବୁଗୁଡ଼ାର ବିଭିନ୍ନ କଲେଜକୁ ଆସୁଛନ୍ତି। ରାସ୍ତା ଖରାପ ଯୋଗୁ ଅନେକ ସମୟରେ ସେମାନେ ଦୁର୍ଘଟଣାର ସମ୍ମୁଖୀନ ହେବା ସହ ସେମାନଙ୍କ ସମୟ ମଧ୍ୟ ଅପଚୟ ହେଉଛି। ଦୀର୍ଘ ବର୍ଷ ହେଲା ଏହି ରାସ୍ତା ପ୍ରଧାନମନ୍ତ୍ରୀ ସଡ଼କ ଯୋଜନାରେ ନିର୍ମାଣ ହୋଇ ବିଭିନ୍ନ ସମୟରେ ମରାମତି ଓ ପୁନଃ ନିର୍ମାଣ ନାମରେ କୋଟି କୋଟି ଟଙ୍କା ଖର୍ଚ୍ଚ ହେଉଥିଲେ ହେଁ ନିମ୍ନମାନର କାମ ଯୋଗୁ ରାସ୍ତା କାମ ସମ୍ପୂର୍ଣ୍ଣ ହେବାର ବର୍ଷେ ନ ପୂରୁଣୁ ଯଥା ପୂର୍ବଂ ତଥା ପରଂ ଭଳି ଅବସ୍ଥା ହେଉଛି। ଦୀର୍ଘ ଦିନ ହେଲା ଏହି ରାସ୍ତା ଅବସ୍ଥା ଶୋଚନୀୟ ହୋଇ ପଡିବା ପରେ ପ୍ରାୟ ୩ ମାସ ତଳେ ମାତ୍ର ୫ କିଲୋମିଟର ରାସ୍ତା କାମ କରାଯାଇ ବାକି କାମ ଛାଡି ଦିଆଯାଇଛି। ବୁଗୁଡ଼ାଠାରେ ଗ୍ରାମ୍ୟ ଉନ୍ନୟନ ସହକାରୀ ଯନ୍ତ୍ରୀଙ୍କ କାର୍ଯ୍ୟାଳୟ ଅଛି ହେଲେ ପ୍ରାୟ ୩ ବର୍ଷ ହେଲା ଏଠାରେ କୌଣସି ସ୍ଥାୟୀ ଯନ୍ତ୍ରୀ ନ ଥିବାରୁ ବିଭାଗୀୟ କାର୍ଯ୍ୟାଳୟ ଏବେ ଭୂତକୋଠିରେ ପରିଣତ ହୋଇଛି। ବୁଗୁଡ଼ା କାର୍ଯ୍ୟାଳୟ ଅତିରିକ୍ତ ଦାୟିତ୍ୱରେ ଥିବା କୋଦଳା ଗ୍ରାମ୍ୟ ଉନ୍ନୟନ ସହକାରୀ ଯନ୍ତ୍ରୀ ଦିଲ୍ଲୀପ ବେହେରାଙ୍କୁ ପଚାରିବାରେ ସେ କହିଛନ୍ତି ଯେ ବୁଗୁଡ଼ାଠାରୁ ମୋଟାବାଡ଼ି ରାସ୍ତାର ରକ୍ଷଣା ବେକ୍ଷଣ ପାଇଁ ଥିବା ୫ ବର୍ଷ ଅବଧି ଗତ ଡିସେମ୍ବରରୁ ସରିଲାଣି ତେଣୁ ନୂତନ ଭାବେ ଏହି ରାସ୍ତା କାମ ପାଇଁ ପ୍ରସ୍ତାବ ପଠାଯାଇଛି। ପ୍ରସ୍ତାବ ମଞ୍ଜୁର ହେଲା ପରେ କାର୍ଯ୍ୟ ଆରମ୍ଭ ହେବ। ତେବେ ଏଠି ପ୍ରଶ୍ନ ଉଠୁଛି ଯଦି ଡିସେମ୍ବରରୁ ଅବଧି ସାରିଲାଣି ତା’ ହେଲେ ଏହା ପୂର୍ବରୁ କାହିଁକି ପ୍ରସ୍ତାବ ଦିଆଗଲାନି ଏବଂ ଯଦି କାମ ହେଲା ତେବେ ଅଧା ରାସ୍ତା କାମ ହୋଇ ପୁଣି ଅଧାରେ କାହିଁକି ବନ୍ଦ କରାଗଲା। ଏହି ଖାଲଖମା ପୂର୍ଣ୍ଣ ରାସ୍ତାରେ ଦୁର୍ଘଟଣା ଘଟି କାହାର ଜୀବନ ଗଲେ ଏଥିପାଇଁ କିଏ ଦାୟୀ ରହିବ ବୋଲି ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।
