ପାଟଣା,୭ା୮: ବିହାରର ଦରଭଙ୍ଗାରେ ଜଣେ ପୂଜାରୀ ମନ୍ଦିରକୁ ପୂଜା କରିବା ପାଇଁ ଆସିଥିବା ମହିଳାଙ୍କ ଚୁଟି ଧରି ପିଟିଛନ୍ତି। ଏହି ଘଟଣାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି। ପରେ ମନ୍ଦିର କମିଟି ପକ୍ଷରୁ ପୂଜାରୀଙ୍କ ନାମରେ ଥାନାରେ ଏତଲା ଦିଆଯାଇଛି।
ମନ୍ଦିର କମିଟି ପକ୍ଷରୁ କରାଯାଇଥିବା ଯାଞ୍ଚରୁ ଜଣାପଡ଼ିଛି ଯେ, ଦରଭଙ୍ଗାରେ ଥିବା ମା’ ଶ୍ୟାମା ମାଇ ମନ୍ଦିର ପରିସରରେ ପୂଜାରୀ ଜଣେ ମହିଳାଙ୍କୁ ଧରି ପିଟିଥିଲେ। କେହି ଜଣେ ଭିଡିଓଟିକୁ ପ୍ରସ୍ତୁତ କରି ସୋସିଆଲ ମିଡିଆରେ ଭାଇରାଲ କରିଦେଇଛନ୍ତି। ଦୁଇଦିନ ପୂର୍ବରୁ ଏହି ଘଟଣା ଘଟିଛି। ମହିଳା ଜଣକ ମନ୍ଦିର ଭିତରକୁ ଯାଇ ଶ୍ୟାମା ମାଇଙ୍କୁ ପୂଜା କରିବା ପାଇଁ ଅଡ଼ି ବସିଥିଲେ। ମାତ୍ର କରୋନା କଟକଣା ଗାଇଡ୍ଲାଇନ୍ ଯୋଗୁ ସାଧାରଣ ଲୋକଙ୍କ ପାଇଁ ମନ୍ଦିର ପ୍ରବେଶ ମନା ରହିଛି। ମହିଳା ବନ୍ଦ ଦ୍ୱାର ଖୋଲିବା ପାଇଁ ପୂଜକଙ୍କୁ ବାରମ୍ବାର କହିଥିଲେ। ଏହି କଥାକୁ ନେଇ ବିବାଦ ଆରମ୍ଭ ହୋଇଥିଲା। ଏଥିରେ ଅତିଷ୍ଠ ହୋଇ ପୂଜକ ଜଣକ ମହିଳାଙ୍କ ଗାଲକୁ ଚାପୁଡ଼ା ପରେ ଚାପୁଡ଼ା ମାରିଥିଲେ। ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ପୂଜକଙ୍କୁ ସ୍ପଷ୍ଟୀକରଣ ମଗା ଯାଇଥିବାବେଳେ ମହିଳାଙ୍କ ପକ୍ଷରୁ କୌଣସି ଅଭିଯୋଗ ହୋଇନାହିଁ। ଏହି ଘଟଣାର ଏବେ ଅଧିକ ଯାଞ୍ଚ କରାଯାଉଛି।
