ନୂଆଦିଲ୍ଲୀ,୧୮।୭: ଦେଶର ୧୫ତମ ରାଷ୍ଟ୍ରପତିଙ୍କୁ ବାଛିବା ପାଇଁ ସୋମବାର ନିର୍ବାଚନ ଶେଷ ହୋଇଛି। ପୂର୍ବାହ୍ନ ୧ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ପାର୍ଲାମେଣ୍ଟ ହାଉସ୍ ଏବଂ ବିଭିନ୍ନ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳ ଦିଲ୍ଲୀ ଓ ପଣ୍ଡିଚେରୀ ବିଧାନସଭାରେ ଭୋଟ ଗ୍ରହଣ କରାଯାଇଛି। ଇଲେକ୍ଟୋରାଲ କଲେଜର ମୋଟ ଭୋଟ ସଂଖ୍ୟା ୧୦,୮୬,୪୩୧ ଥିବାବେଳେ ୯୯.୧୮% ମତଦାନ ହୋଇଥିବା ନିର୍ବାଚନ ଅଧିକାରୀ ପି.ସି. ମୋଦି ସୂଚନା ଦେଇଛନ୍ତି। ଏଥିସହ ଭାଜପା ନେତୃତ୍ୱାଧୀନ ଜାତୀୟ ଗଣତାନ୍ତ୍ରିକ ମେଣ୍ଟ (ଏନ୍ଡିଏ) ପ୍ରାର୍ଥୀ ଦ୍ରୌପଦୀ ମୁର୍ମୁ (୬୪) ଓ ବିରୋଧୀଙ୍କ ମିଳିତ ପ୍ରାର୍ଥୀ ଯଶଓ୍ବନ୍ତ ସିହ୍ନା(୮୪)ଙ୍କ ଭାଗ୍ୟ ବାଲଟ ବାକ୍ସରେ ବନ୍ଦ ହୋଇଯାଇଛି। ଆସନ୍ତା ୨୧ ତାରିଖ ଅର୍ଥାତ୍ ଗୁରୁବାର ଭୋଟ ଗଣତି କରାଯିବ। ଅନ୍ୟପଟେ କେତେକ ରାଜ୍ୟ ବିଧାନସଭାରେ ଅନେକ ବିଧାୟକ ଦ୍ରୌପଦୀଙ୍କ ସପକ୍ଷରେ କ୍ରସ୍ଭୋଟିଂ କରିଥିବା ଜଣାପଡ଼ିଛି। ସେମାନଙ୍କ ମଧ୍ୟରେ ଝାଡ଼ଖଣ୍ଡ ଓ ଗୁଜରାଟର ଜଣେ ଲେଖାଏ ଏନ୍ସିପି ବିଧାୟକ ଏବଂ ଓଡ଼ିଶା ଓ ହରିୟାଣାର ଜଣେ ଲେଖାଏ କଂଗ୍ରେସ ବିଧାୟକ ରହିଛନ୍ତି। ସେହିପରି ପଞ୍ଜାବର ଜଣେ ଅକାଳୀ ଦଳ ବିଧାୟକ ତାଙ୍କ ରାଜ୍ୟରେ ବିଭିନ୍ନ ସମସ୍ୟାର ସମାଧାନ କରାଯାଉ ନ ଥିବା ଦର୍ଶାଇ ଭୋଟ ବର୍ଜନ କରିଥିଲେ। ଆସାମରେ ଆଇୟୁଡିଏଫ୍ ବିଧାୟକ କରିମୁଦ୍ଦିନ ବଡ଼ଭୂୟଁା କହିଛନ୍ତି, ରାଜ୍ୟର ପ୍ରାୟ ୨୦ କଂଗ୍ରେସ ବିଧାୟକ ଦ୍ରୌପଦୀଙ୍କୁ ଭୋଟ ଦେଇଛନ୍ତି। ଯଶଓ୍ବନ୍ତ ସିହ୍ନା ଏକଦା ଏସ୍ପି ପ୍ରତିଷ୍ଠାତା ମୁଲାୟମ୍ ସିଂ ଯାଦବ ଓ ତାଙ୍କ ଦଳକୁ ଆଇଏସ୍ଆଇ ଏଜେଣ୍ଟ କହିଥିବାରୁ ତାଙ୍କ ଭାଇ ଶିବପାଳ ଯାଦବ ବିରୋଧୀ ପ୍ରାର୍ଥୀଙ୍କ ବିରୋଧରେ ଭୋଟ ଦେଇଥିବା କହିଛନ୍ତି। ଗତମାସରେ ରାଜ୍ୟ ସଭା ନିର୍ବାଚନ ବେଳେ କ୍ରସ୍ଭୋଟିଂ କରିଥିବା ହରିୟାଣା କଂଗ୍ରେସ ବିଧାୟକ କୁଲଦୀପ ବିଷ୍ଣୋଇ ରାଷ୍ଟ୍ରପତି ନିର୍ବାଚନରେ ମଧ୍ୟ ନିଜ ବିବେକାନୁମୋଦିତ ଭୋଟ ଦେଇଥିବା ପ୍ରକାଶ କରିଛନ୍ତି। କଟକ-ବାରବାଟୀର କଂଗ୍ରେସ ବିଧାୟକ ମହମ୍ମଦ ମୋକିମ୍ ଦ୍ରୌପଦୀଙ୍କୁ ‘ଓଡ଼ିଶାର ଝିଅ’ କହି ତାଙ୍କ ସପକ୍ଷରେ ଭୋଟ ଦେଇଥିବା କହିଛନ୍ତି। ଝାଡ଼ଖଣ୍ଡରେ ଏନ୍ସିପି ବିଧାୟକ କମଳେଶ ସିଂ ମଧ୍ୟ ଏନ୍ଡିଏ ପ୍ରାର୍ଥୀଙ୍କୁ ଭୋଟ ଦେଇଛନ୍ତି। ଗୁଜରାଟର ଏନ୍ସିପି ବିଧାୟକ କନ୍ଧାଲ ଜାଡେଜା ଗାନ୍ଧୀନଗର ଆସେମ୍ବ୍ଲି କମ୍ପ୍ଲେକ୍ସରେ ମତଦାନ କରିବା ପରେ ତାଙ୍କ ଭୋଟ ଦ୍ରୌପଦୀଙ୍କ ସପକ୍ଷରେ ଯାଇଥିବା ସୂଚନା ଦେଇଛନ୍ତି। ପଞ୍ଜାବରେ ଶିରୋମଣି ଅକାଳୀ ଦଳ ଦ୍ରୌପଦୀଙ୍କୁ ସମର୍ଥନ କରିଥିବା ବେଳେ ଏହାର ବିଧାୟକ ମନପ୍ରୀତ ସିଂ ଆୟାଲି ନିଜ ଅଞ୍ଚଳର ସମସ୍ୟା ସମାଧାନ ହେଉ ନ ଥିବା ଦର୍ଶାଇ ଭୋଟ ବର୍ଜନ କରିଛନ୍ତି। ଅନ୍ୟପଟେ ୮ଜଣ ଏମ୍ପି ରାଷ୍ଟ୍ରପତି ନିର୍ବାଚନ ପାଇଁ ମତଦାନ କରିପାରିନାହାନ୍ତି। ଏଥିରେ ବିଏସ୍ପି ଏମ୍ପି ଅତୁଲ କୁମାର ସିଂହ ରହିଥିବା ବେଳେ ବର୍ତ୍ତମାନ ସେ ଜେଲ୍ରେ ଅଛନ୍ତି। ସେହିପରି ଭାଜପା ଏମ୍ପି ସନ୍ନି ଦେଓଲ ମଧ୍ୟ ବିଦେଶ ଯାତ୍ରାରେ ଅଛନ୍ତି। ଏତଦ୍ ବ୍ୟତୀତ ଶିବସେନା ଏମ୍ପି ଗଜାନନ କିର୍ତ୍ତିକର, ହେମନ୍ତ ଗୋଡସେ, ବିଏସ୍ପି ଏମ୍ପି ଫଜଲୁର ରେହମାନ, ସାଦିକ ରେହମାନ ଓ ସେୟଦ ଇମତିଆଜ ମଧ୍ୟ ଭୋଟ ଦେଇ ନ ଥିବା ଜଣାପଡ଼ିଛି।
