ଲଣ୍ଡନ,୮ ।୨: ଶିଶୁ ଓ ମହିଳାମାନେ ଫାର୍ମା କମ୍ପାନୀ ଜନସନ ଆଣ୍ଡ ଜନସନର ବେବି ପାଉଡର ବ୍ୟବହାର କରିବାକୁ ବେଶ୍ ପସନ୍ଦ କରୁଥିଲେ । ହେଲେ ଏହା କ୍ୟାନସର ସୃଷ୍ଟିକାରୀ ବୋଲି ଜାଣିବା ପରେ ଏବେ ଏହା ଉପରେ ସାରା ବିଶ୍ୱରେ ପ୍ରତିବନ୍ଧକ ଲଗାଇବାକୁ ଯୋଜନା କରାଯାଉଛି । ବ୍ରିଟେରେ କମ୍ପାନୀର ଅଶିଂଦାରମାନେ ଏକାଠି ହୋଇ ପାଉଡର ବିକ୍ରି ଉପରେ ବିଶ୍ୱବ୍ୟାପି ପ୍ରତିବନ୍ଧକ ଲଗାଇବାକୁ ପ୍ରସ୍ତାବ ଦେଇଛନ୍ତି । ସୂଚନାଯୋଗ୍ୟ, ଏହି ପାଉଡର ଯୋଗୁ ପ୍ରାୟ ୩୪ ହଜାର ମହିଳା କ୍ୟାନସରର ଶିକାର ହୋଇଥିବା ମାମଲା ଚାଲୁ ରହିଛି ।
ଆମେରିକାରେ ଏହି ପାଉଡରରେ ଆଜବେସଟସର ଏକ ପ୍ରକାର କ୍ରେସୋଟାଇଲ ଫାଇବର ମିଳିଥିଲା, ଯାହା କ୍ୟାନସର ସୃଷ୍ଟି କରିପାରେ ବୋଲି କୁହାଯାଇଥିଲା । ଏହା ଚର୍ମ କର୍କଟ ସୃଷ୍ଟି କରିପାରେ ବୋଲି ସନ୍ଦେହ କରାଯାଇଥିଲା । ତେବେ ଏହି ପାଉଡର ଯୋଗୁ ହଜାର ହଜାର ମହିଳା ଗର୍ଭାଶୟ କର୍କଟରେ ପୀଡ଼ିତ ହୋଇଥିବା ନେଇ ମାମଲା ଦାୟର କରିଛନ୍ତି । ତେବେ ବିକ୍ରି କମ୍ ଦର୍ଶାଇ କମ୍ପାନୀ ୨୦୨୦ରେ ଆମେରିକା ଓ କାନାଡାରେ ଏହାର ବିକ୍ରି ବନ୍ଦ କରି ଦେଇଥିଲା । ହେଲେ ଏହା ଆଜି ବ୍ରିଟେନ ସମେତ ଆହୁରି କିଛି ଦେଶରେ ବିକ୍ରି କରାଯାଉଛି । ଏବେ ବ୍ରିଟେନର ଏକ ନିବେଶ ପ୍ଲାଟଫର୍ମ ଟ୍ୟୁଲିପ ଶେୟାର କମ୍ପାନୀର ଅଶିଂଦାରମାନଙ୍କୁ ପାଉଡର ବିକ୍ରି ବନ୍ଦ କରିବାକୁ ପ୍ରସ୍ତାବ ଦେଇଛନ୍ତି । ଅଫର ପାଇଁ ଆବଶ୍ୟକ ସଂଖ୍ୟକ ଅଶୀଂଦାରମାନେ ସେମାନଙ୍କର ଅଂଶଧନକୁ ଏକାଠି କରୁଛନ୍ତି । ଏହି ପ୍ରସ୍ତାବକୁ ଆମେରିକାର ଷ୍ଟକ ମାର୍କେଟ ନିୟାମକ ଏଜେନ୍ସି ଏସଇସିକୁ ପଠାଯାଇଛି । ଏପ୍ରିଲରେ କମ୍ପାନୀର ବାର୍ଷିକ ବୈଠକ ଥିବା ବେଳେ ସେହି ସମୟରେ ଏହି ପ୍ରସ୍ତାବକୁ ଆଣିବାକୁ ପ୍ରୟାସ କରାଯାଉଛି ।
