ଦିଗପହଣ୍ଡି,୨୦।୭(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି – ଆସିକା ମୁଖ୍ୟରାସ୍ତାର ଚାଞ୍ଚଡାପଲ୍ଲୀ ଗାଁ ଛକଠାରେ ନିର୍ମାଣଧୀନ ଶ୍ରୀ ଜଗନ୍ନାଥଙ୍କ ନୂତନ ମନ୍ଦିର ନିର୍ମାଣ ସହ ଶ୍ରୀ ଚତୁର୍ଦ୍ଧାମୂର୍ତ୍ତି କାଳିଆ ଠାକୁର ଶ୍ରୀ ଜଗନ୍ନାଥ, ଶ୍ରୀ ବଳଭଦ୍ର ଓ ଦେବୀ ସୁଭଦ୍ରା ଚତୁର୍ଦ୍ଧାମୂର୍ତ୍ତୀଙ୍କ ବିଗ୍ରହ ନିର୍ମାଣ କରାଯିବ। ସୋମବାର ଚତୁର୍ଦ୍ଧା ମୂର୍ତ୍ତୀ ନିର୍ମାଣ ନିମନ୍ତେ ସଂଗୃହୀତ ଦାରୁ ଗଣ୍ଡିକୁ ଶଗଡ଼ିରେ ସୁସଜ୍ଜିତ କରାଯାଇ ସାନଖେମୁଣ୍ଡି ବ୍ଳକ ପଳାସପୁର ଗ୍ରାମ ନିକଟସ୍ଥ ଶ୍ରୀ ବୁଦ୍ଧେଶ୍ବର ଶୈବପୀଠ ପରିସରରୁ ବିରାଟ ଶୋଭାଯାତ୍ରାରେ ଦିଗପହଣ୍ଡି ସ୍ଥିତ ଶ୍ରୀ ଗୁପ୍ତେଶ୍ୱର ଶୈବପୀଠରେ ପହଞ୍ଚିଥିଲା ।
ପୂର୍ବରୁ ଚତୁର୍ଦ୍ଧାମୂର୍ତ୍ତିଙ୍କ ନିର୍ମାଣ ସକାଶେ ଦାରୁ ଚିହ୍ନଟ ହୋଇଥିଲା । ରବିବାର ଦିଗପହଣ୍ଡି ସ୍ଥିତ ଗୁରୁକୃପା ସେବା ସମିତିର ଆବାହକ ପଣ୍ଡିତ ଭବାନୀ ଶଙ୍କର ତ୍ରିପାଠୀଙ୍କ ପୌରିହିତ୍ୟରେ ବୁଦ୍ଧେଶ୍ବର ଶୈବପୀଠରେ ଦାରୁ ଗ୍ରହଣ ପାଇଁ କଳସ ଯାତ୍ରା ସହ ହୋମଯଜ୍ଞ କରାଯାଇଥିଲା । ସୋମବାର ଦାରୁ ପୂଜନ ଓ ଗ୍ରହଣ ପ୍ରକ୍ରିୟା ଆରମ୍ଭ ହୋଇଥିଲା । ଏହାପରେ ୩ ଟି ସୁସଜ୍ଜିତ ଶଗଡ଼ରେ ବିରାଟ ଶୋଭାଯାତ୍ରାରେ ଦାରୁକୁ ଶ୍ରୀ ବୁଦ୍ଧେଶ୍ବର ଶୈବପୀଠରୁ ଅଣାଯାଇଥିଲା ।
ବହୁ ସଂଖ୍ୟକ ମହିଳା ଓ ପୁରୁଷ ଶ୍ରଦ୍ଧାଳୁଙ୍କ ସହ ବିଭିନ୍ନ ଗ୍ରାମରୁ ସଂକୀର୍ତ୍ତନ ମଣ୍ଡଳୀର ସଦସ୍ୟା ସଦସ୍ୟ ଦାରୁ ଶଗଡ଼ି ଶୋଭାଯାତ୍ରାରେ ସାମିଲ ଥିଲେ। ଏହି ଦାରୁ ଶଗଡ଼ି ସ୍ବାଗତ ଶୋଭାଯାତ୍ରାକୁ ଗୁରୁ କୃପା ସେବା ସମିତିର କର୍ମକର୍ତ୍ତା ବୃନ୍ଦ ସହଯୋଗ କରିଥିଲେ।
