ପାଟନା,୩।୮: ତିନି ଦଶନ୍ଧି ପରେ ନିଜ ଗଡ଼ରେ ଭାଜପାକୁ ବଡ଼ ପରାଜୟର ସାମ୍ନା କରିବାକୁ ପଡ଼ିଛି। ପରିବର୍ତ୍ତନର ଲହରୀରେ ବିହାରର ବାଙ୍କିପୁର ବିଧାନସଭା ଆସନ, ଯାହା ଭାଜପାର ଦୃଢ଼ ଗଡ଼ ଭାବେ ପରିଚିତ ଥିଲା, ତାହା ଦଳ ହାତରୁ ଖସିଯାଇଛି।
ଅନ୍ତିମ ଫଳାଫଳ ଅନୁଯାୟୀ, ପ୍ରଶାନ୍ତ କିଶୋର ୬୩,୨୦୩ ଭୋଟ ପାଇଥିବା ବେଳେ ଦ୍ୱିତୀୟ ସ୍ଥାନରେ ଥିବା ଭାଜପାର ନୀରଜ କୁମାର ୪୪,୨୫୦ ଭୋଟ ପାଇଛନ୍ତି। ରାଷ୍ଟ୍ରୀୟ ଜନତା ଦଳ (ଆରଜେଡି) ପକ୍ଷରୁ ପ୍ରାର୍ଥୀ ହୋଇଥିବା ରେଖା କୁମାରୀ ୧୪,୦୮୫ ଭୋଟ ପାଇ ତୃତୀୟ ସ୍ଥାନରେ ରହିଛନ୍ତି।
ପାଟନା ସହରାଞ୍ଚଳରେ ଥିବା ବାଙ୍କିପୁର ବିଧାନସଭା ଆସନକୁ ଦୀର୍ଘ ଦିନ ଧରି ଭାଜପାର ଏକ ମଜବୁତ ଗଡ଼ ଭାବେ ଦେଖାଯାଉଥିଲା। ଏହି ଆସନରୁ ଭାଜପାର ଜାତୀୟ ଅଧ୍ୟକ୍ଷ ନିତିନ ନବୀନ ବିଧାୟକ ଥିଲେ। ପରେ ସେ ଭାଜପାର ଜାତୀୟ ଅଧ୍ୟକ୍ଷ ହେବା ସହ ରାଜ୍ୟ ସଭା ସାଂସଦ ଭାବେ ନିର୍ବାଚିତ ହୋଇଥିଲେ। ଏହା ପରେ ସେ ବାଙ୍କିପୁର ଆସନ ଛାଡ଼ିଥିବାରୁ ସେଠାରେ ଉପନନିର୍ବାଚନ ଆୟୋଜିତ ହୋଇଥିଲା।
ବାଙ୍କିପୁର ବିଧାନସଭା ଆସନରେ ହୋଇଥିବା ଉପନିର୍ବାଚନରେ ପ୍ରାୟ ୩୫ ପ୍ରତିଶତ ମତଦାନ ହୋଇଥିଲା। ଅନ୍ୟପକ୍ଷରେ, ୨୦୨୫ ବିଧାନସଭା ନିର୍ବାଚନରେ ଏହି ଆସନରେ ୪୧.୩୫ ପ୍ରତିଶତ ଭୋଟିଂ ରେକର୍ଡ କରାଯାଇଥିଲା।
୨୦୨୫ ବିଧାନସଭା ନିର୍ବାଚନରେ ଭାଜପାର ନିତିନ ନବୀନ ୯୮,୨୯୯ ଭୋଟ ପାଇ ବିଜୟୀ ହୋଇଥିଲେ। ସେହି ନିର୍ବାଚନରେ ଦ୍ୱିତୀୟ ସ୍ଥାନରେ ଥିବା ରାଷ୍ଟ୍ରୀୟ ଜନତା ଦଳ (ଆରଜେଡି)ର ରେଖା କୁମାରୀ ୪୬,୩୬୩ ଭୋଟ ପାଇଥିଲେ।
ସେହିପରି, ୨୦୨୫ ନିର୍ବାଚନରେରେ ଜନ ସୁରାଜ ପକ୍ଷରୁ ବନ୍ଦନା କୁମାରୀଙ୍କୁ ବାଙ୍କିପୁରରୁ ପ୍ରାର୍ଥୀ କରାଯାଇଥିଲା। ସେ ସେତେବେଳେ ମାତ୍ର ୭,୭୧୭ ଭୋଟ ପାଇଥିଲେ।
ଏବେ ସବୁଠାରୁ ବଡ଼ ପ୍ରଶ୍ନ ହେଉଛି, କେନ୍ଦ୍ର ଓ ବିହାର ଉଭୟ ସ୍ଥାନରେ ଭାଜପାର ସରକାର ଥିବା ସତ୍ତ୍ୱେ ଦଳ ନିଜର ଦୀର୍ଘଦିନର ଗଡ଼ ବାଙ୍କିପୁର ଆସନକୁ କାହିଁକି ବଞ୍ଚାଇ ପାରିଲା ନାହିଁ?
ସେହିପରି, ୨୦୨୫ ବିଧାନସଭା ନିର୍ବାଚନରେ ଯେଉଁ ଜନ ସୁରାଜ ପାର୍ଟିକୁ ମାତ୍ର ୭,୭୧୭ ଭୋଟ ମିଳିଥିଲା, ସେହି ଦଳ ଏଥର କିପରି ଭାଜପାକୁ ପରାସ୍ତ କରି ବାଙ୍କିପୁର ଆସନ ଦଖଲ କରିବାରେ ସଫଳ ହେଲା, ତାହାକୁ ନେଇ ରାଜନୈତିକ ମହଲରେ ଜୋରଦାର ଚର୍ଚ୍ଚା ଚାଲିଛି। ଆସନ୍ତୁ ଜାଣିବା ୫ କାରଣ ବାଙ୍କିପୁର ଆସନକୁ କାହିଁକି ବଞ୍ଚାଇ ପାରିଲା ନାହିଁ ଭାଜପା…
ବାଙ୍କିପୁର ଉପନିର୍ବାଚନରେ ନିଟ (NEET-UG) ଛାତ୍ର ଆନ୍ଦୋଳନର ପ୍ରଭାବ ମଧ୍ୟ ଦେଖିବାକୁ ମିଳିଥିଲା। ନିଟ ୟୁଜି ପ୍ରଶ୍ନପତ୍ର ଲିକକୁ ନେଇ ଛାତ୍ରୀଛାତ୍ରମାନେ ଦିଲ୍ଲୀର ଜନ୍ତର-ମନ୍ତରରେ ଧାରଣା ଓ ବିକ୍ଷୋଭ ଆରମ୍ଭ କରିଥିଲେ। ପରବର୍ତ୍ତୀ ସମୟରେ ଏହି ଆନ୍ଦୋଳନ ଅନ୍ୟ ରାଜ୍ୟ ସହ ବିହାରରେ ମଧ୍ୟ ବ୍ୟାପିଥିଲା।
ଦିଲ୍ଲୀ ସମେତ ବିହାରରେ ମଧ୍ୟ ପୋଲିସ ଛାତ୍ରୀଛାତ୍ରଙ୍କ ଉପରେ ଲାଠିଚାର୍ଜ କରିଥିଲା। ତେବେ ଶେଷରେ ସରକାର ଛାତ୍ରମାନଙ୍କ କିଛି ଦାବିକୁ ମାନିବାକୁ ବାଧ୍ୟ ହୋଇଥିଲେ। ଏହା ସହ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ନିଜ ପଦରୁ ଇସ୍ତଫା ଦେଇଥିଲେ।
ଏହି ନିର୍ବାଚନରେ ବିହାରରେ ସମ୍ପ୍ରତି ଘଟିଥିବା ଭରତ ତିୱାରୀ ଏନକାଉଣ୍ଟର ଘଟଣା ମଧ୍ୟ ବେଶ ଚର୍ଚ୍ଚାରେ ରହିଥିଲା। ୧୭ ଜୁନ ୨୦୨୬ରେ ବିହାରର ଭୋଜପୁର ଜିଲାରେ ଭରତ ଭୂଷଣ ତିୱାରୀଙ୍କୁ କଥିତ ଏନକାଉଣ୍ଟରରେ ହତ୍ୟା କରାଯାଇଥିବା ଅଭିଯୋଗ ହୋଇଥିଲା।
ଏହି ଘଟଣାକୁ ନେଇ ବିହାରର ବିଭିନ୍ନ ସ୍ଥାନରେ ବିରୋଧ ପ୍ରଦର୍ଶନ ହୋଇଥିଲା। ପରେ କିଛି ପୋଲିସ କର୍ମଚାରୀଙ୍କ ବିରୋଧରେ ତଦନ୍ତ ମଧ୍ୟ ଆରମ୍ଭ କରାଯାଇଥିଲା। ଉପନିର୍ବାଚନ ସମୟରେ ମଧ୍ୟ ଏହି ଏନକାଉଣ୍ଟରକୁ ନେଇ ଭୋଟରଙ୍କ ମଧ୍ୟରେ ଅସନ୍ତୋଷ ଓ କ୍ଷୋଭ ଦେଖିବାକୁ ମିଳିଥିଲା।
ବାଙ୍କିପୁର ଆସନକୁ ନେଇ ଭାଜପା ଅତ୍ୟଧିକ ଆତ୍ମବିଶ୍ୱାସରେ ଥିଲା ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି। ଅନେକ ବିଶ୍ଳେଷକଙ୍କ ମତରେ, ଏହି ଅତ୍ୟଧିକ ଆତ୍ମବିଶ୍ୱାସ ହିଁ ଦଳ ପାଇଁ କ୍ଷତିକାରକ ସାବ୍ୟସ୍ତ ହୋଇଛି ଏବଂ ବାଙ୍କିପୁର ପରି ଦୀର୍ଘଦିନର ଗଡ଼ ଦଳ ହାତରୁ ଖସିଯାଇଛି।
ଉପନିର୍ବାଚନ ସମୟରେ ଭାଜପାର ଜାତୀୟ ଅଧ୍ୟକ୍ଷ ନିତିନ ନବୀନ, ବିହାରର ମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀ, ଅନେକ କେନ୍ଦ୍ରୀୟ ମନ୍ତ୍ରୀ ଏବଂ ବିହାର ମନ୍ତ୍ରିମଣ୍ଡଳର ସଦସ୍ୟମାନେ ବାଙ୍କିପୁରରେ ବ୍ୟାପକ ପ୍ରଚାର କରିଥିଲେ। ଏତେ ବଡ଼ ପ୍ରଚାର ଅଭିଯାନ ସତ୍ତ୍ୱେ ମଧ୍ୟ ଭାଜପା ନିଜର ଏହି ପାରମ୍ପରିକ ଆସନକୁ ବଞ୍ଚାଇ ପାରିଲା ନାହିଁ ଏବଂ ନିତିନ ନବୀନ ନିଜର ରାଜନୈତିକ ଗଡ଼କୁ ସୁରକ୍ଷିତ ରଖିବାରେ ବିଫଳ ହେଲେ।
ଏହି ଉପନିର୍ବାଚନରେ କଂଗ୍ରେସ ପ୍ରତିଯୋଗିତାରେ ନଥିଲା। ସେହିପରି ରାଷ୍ଟ୍ରୀୟ ଜନତା ଦଳ (ଆରଜେଡି) ମଧ୍ୟ ଏହି ନିର୍ବାଚନକୁ ଗୁରୁତ୍ୱର ସହ ଲଢ଼ିନଥିଲା ବୋଲି ରାଜନୈତିକ ବିଶ୍ଳେଷକମାନଙ୍କ ମତ। ନିର୍ବାଚନ ପ୍ରଚାରର ଶେଷ ଦୁଇ ଦିନରେ ହିଁ ଆରଜେଡିର ନେତାମାନେ ପ୍ରଚାର ପାଇଁ ପହଞ୍ଚିଥିଲେ। ଏହାର ପ୍ରଭାବରେ ବିରୋଧୀ ଦଳର ଅନେକ ଭୋଟ ପ୍ରଶାନ୍ତ କିଶୋରଙ୍କ ସପକ୍ଷରେ ଯାଇଥିବା ଚର୍ଚ୍ଚା ହେଉଛି।
ରାଜନୈତିକ ବିଶ୍ଳେଷଣ ଅନୁଯାୟୀ, ବିହାରରେ ପ୍ରଥମ ଥର ପାଇଁ କୌଣସି ବଡ଼ ନିର୍ବାଚନରେ ଜାତି ସମୀକରଣର ପ୍ରଭାବ ଅପେକ୍ଷାକୃତ କମ ଦେଖିବାକୁ ମିଳିଛି। ଜାତି-ପାତିରୁ ଊର୍ଦ୍ଧ୍ୱକୁ ଉଠି ଅନେକ ଭୋଟର ପ୍ରଶାନ୍ତ କିଶୋରଙ୍କୁ ସମର୍ଥନ କରିଥିବା କୁହାଯାଉଛି। ଅନ୍ୟପକ୍ଷରେ, ବିଜେପି ଏବଂ ନିତିନ ନବୀନ ଅତ୍ୟଧିକ ଆତ୍ମବିଶ୍ୱାସରେ ଥିବାରୁ ଦଳ କ୍ଷତିର ସମ୍ମୁଖୀନ ହୋଇଥିବା ମତ ମଧ୍ୟ ପ୍ରକାଶ ପାଉଛି।
